ارجو المساعده انا محتار ما بين استرا انجوي سيدان و كرولا تاني فاه اوتمتك
تم نقل الموضوع من قسم اوبل لقسم المقارنات
6ب مشرف القسم
عرض للطباعة
ارجو المساعده انا محتار ما بين استرا انجوي سيدان و كرولا تاني فاه اوتمتك
تم نقل الموضوع من قسم اوبل لقسم المقارنات
6ب مشرف القسم
استرا طبعا
مفيش وجه مقارنه (استرا طبعا) وافتكرني بعد ٣ سنين إن كان لنا عمر بالفرق بين الاتنين بعد الاستخدام وميغنيش برده ان اقولك المقارنه ولونها ظالمه فهي لصالح الاسترا
اركب دي واركب دي وانت تحكم
كورولا طبعا وابقى افتكرنى بعد ٣ سنين لما تبيع الاسترا بنص تمنها ولو معاك كورولا يمكن تكسب فيها بعد الاستعمال
لا اللي بيركب الماني بيركبها عشان يستمتع بيها وبامكانيتها مش عشان يتاجر فيها ويكسب عندك مثلا الانسر من اول عيون صفيه لغايت الشارك ماسكه سعر هل دا عشان عربيه محترمه مثلا لا الفكره انها ليها سوق انما تركبها وتقارن بينها وبين بي ام شارك مو ٩٠ هتعرف الفرق وشوف مثلا الريو بكام النهارده وال ام جراند بكام اركب واحده فيهم واركب فكترا مو ٩٥ مثلا مش هقولك بي او بي ٢ عشان مظلمش العربيه وانت تعرف الفرق
هههههههههه
خلاص يا باشا اركب استرا واخسر فلوسك والبس وللعلم انا كان معايا فكترا سي والحمد لله غورتها فداهية
طب نستني راي الناس اللي معاها السي بس مغورتهاش فداهيه نسألهم ليه مغوروهاش فداهيه مع العلم بان خالي معاه واحده هاي لاين وجايب لابنو واحده مانوال مالزيروا ولسه مغوروهاش فداهيه مش عارف ليه
وضح احتياجك واستخدامك ونساعدك اكتر فى الاختيار والكرولا الجديده ممتازه مفيش كلام
مع احترامي لكل الاخوة الزملاء
نصيحة من واحد جرب الكورولا القديمة والفيكترا سي
الكورولا سيارة نادرة الاعطال ، مناسبة للجو الحار ، اقتصادية ، سعر إعادة بيع ممتاز
الاوبل ، تتفوق في الثبات ولكن سعر اعادة بيع ضعيف
ومع علمي بأنه لولا اختلاف الاذواق لبارت الاسواق
بس لو انا مكانك اشتري الكورولا بدون ادنى تردد
معلش ياجماعه انا شايف انها ميول ..... وزى ماقال الاستاذ احمد فهمى وضح احتياجاتك واحنا نقول اللى يناسبك ووضح برضه استعمالك اليومى والشهرى عامل اذاى وبأذن الله نقدر نفيد حضرتك
المشكلة إن القديم مفيش زيه.
الكورولا بقت تقفيل تركي والله أعلم هتبقي عمله زي الكورولا الجنوب افريقي فيها مشاكل ولا هتبقي نادرة الأعطال.
عامة تقريباً كل عربيات تويوتا خالية الأعطال وهي دائماً الاولي في المبيعات وفي الإعتمادية (مع هوندا). بس أنا عمري مركبت عربية تويوتا وحسيت اني راكب عربية مميزة أو فخمة أو الخامات الداخلية ذات جودة عالية. يمكن إحساس شخصي بس الألماني في فخامة داخلية اعلي بالنسبالي عن التويوتا.
حضرتك على حسب استخدامك لو عايز سيارة عائلية في المقام الاول وواسعة يبقى انصحك بالكورولا اما لو ميهمكش سعر اعداة بيع و لو اني شايف ان الاسترا هتمسك سعرها ، و عايز من الاخر شياكة و عربية شبابي يبقى استرا و من ناحية قطع الغيار اظن الاتنين متقاربين
اما بقى بالنسبة للفيكترا سي فالعربية دي حاسس انها حظوظ ناس تمشي معاها زي الفل و ناس تعبانة معاها انا عن نفسي لو حد في 2008 جه قالي اركب كورولا و لا فيكترا اقوله الكورولا دي متتركبش الكورولا من اول الجنوب افريقي قرف و ده عن تجربه لا تكيف و لا نعومة عدا سلاسة الدركسيون اخف من الفيكترا بس مهياش ميزة مغرية يعني و الفتيس بلاش نتكلم عنه كتيير لو بنتكلم على اعتمادية كورولا يبقى من قبل الموديل الجنوب افريقي هو ده اللي اعتمادي فعلا و اسقع تكيف جربته في اي عربية و شايف للكورولا الجديدة مستقبل كويس بس الايام الجاية هتبين في اعطال و لا لأ يعيب الكورولا الجديدة من وجهة نظري الشخصية الخامات مش مهتمين بيها اوي و ووطوها غير كده مش شايف فيها مشاكل ففي كلا الحالتين استرا او كورولا العربيتين كويسين
انا رأيي لو مش فارق معاك المساحة الداخلية خليك فـ الاسترا بدون تفكير
لو ركبت الاتنين هتحس بفرق كبير وانت قاعد في الاسترا عن الكورولا الفرش الداخلي والخامات والطبلوه غير التويوتا كلها بلاستك وقماش مش اد كده والطابلوه شكله رخيص شوية غير الاسترا طبعا
والعفشة الخلفية لصالح الاسترا برضه دي واتس لينك والكورولا تورشن بيم يعني ثبات افضل
ميزة الكورولا استهلاك بنزين اقل والماتور تقريبا ملوش صوت وتسارع افضل من الاسترا وطبعا اوسع
تحياتي
اتا معايا استرا و ندمت اني مجبتش الكورولا
طلعتها تقيلة بزيادة و سحبها تعبان عكس الكورولا
التحكم فيها ممل مش حاسس العجل رايح فين مش فاهم ايه الرياضي اللي الناس شايفاه فيها و الفتيس الاوتو اللي مفيهوش اي فكرة
مفروض يتحطلها 95 لان انا بحطلها 92 و بترعش و تكركر و لو روحت التوكيل حيقولك بنزين مش نضيف
عفشتها ناشفة بسبب الجنط ال17 اللي حيطلع بلالين.
الشاشة اللعبة المعفنة و مينفعش تغيرها لكن الكورولا ممكن تجيب الشاشة الاصلي التاتش من التوكيل و النافيجاشين حتي شغال.
انوار تعبانة زي القديم ولا ليد ولا زينون و حتي مش لاقي الاضواء النهارية الابيض منها بدل الاصفر ده و الفوج مبيجبش حاجة
حاجات مستفزة زي استخدام اللون الاحمر في الشاشتين و الاريال اللي في 2014 لسة ممكن يتسرق و شكلو رخيص.
اللي عاجبني فيها شكلها التحفة و الثبات و الخامات.
والله أنا معايا الاسترا 2014 برضه بس مش متفق معاك في أي حاجة.
الطلعة بالنسبالي حلوة عشان بحط 95 والرعشة حلها سوفت وير في التوكيل والكركرة دي بتروح لما الموتور يتأقلم مع البنزين.
العربية رياضية جداً والدريكسيون بيقلك العجل رايح فين وبيحسسك بالشارع كويس اوي. ويعني إيه فتيس مفهوش فكرة !!!!!!!!!!!!!!!!!!!! إيه الأفكار اللي حضرتك عايزها ؟؟؟؟؟
العفشة مش ناشفة ومريحة جدا جدا, النشوفية ممكن من الضغط العالي اللي في الكواتش المفروض تنزله ل32. ومش بتطلع بلالين.
الشاشة عادية مش معفنة وواضحة.
الأنوار زي الفل وبتجيب مساحات واسعة وعريضة. الفوج مش شغلته أنه يجيب حاجة الفوج من اسمه كده معمول عشان يبان في الشبورة.
حضرتك بتحطلها 95 ليه؟ عشان توكيل بيستهبل و العربية حساسة بزيادة متنفغش مع معظم بنزينات مصر و ادائها التعبان مع ال92.
علي الفكرة المدح الزيادة ده هو اللي خلاني اجبها و بعدين جربت بنفسي و سافرت بالكورولا بتاعت واحد صاحبي و عرفت الفرق.
موضوع رياضية ده انا برده مش فاهمه انا كان معايا كورسا سيدان و ديه كانت رياضية بجد يعني خفيفة و دريكسيون خفيف ده غير انها كانت جراية عشان 1600.
الضغط عندي 32 بس احنا بنقارن و الكورولا انعم بكتير
انا مقولتش ان الشاشة مش واضحة بس مفيش مقارنة بيها و بالشاشة التاتش اللي في الكورولا
و برده مقولتش ان الانوار مش بتجيب مساحات بس مفيش مقارنة بالزينون او الليد من حيث الشكل
بحط 95 عشان ده المنصح بيه من الشركة الأم مش عشان التوكيل, وعلي فكرة انا بحط 95 في الأسترا ال2004 بتاعتي برضه لأنها برضه المنصح بيه 95.
المدح في عربية تستحق مش عيب, والاسترا عربية ناعمة جداً ومريحة جداً مش عارف حضرتك إزاي بتقول عليها ناشفة ؟؟؟؟؟؟. العفشة برغم إنها 17 ولكنها في نفس نعومة الكورولا إن مكنتش أنعم.
هو الدريكسيون الخفيف يعني رياضي !!!!!!!!!!!!!!. العكس يا باشا...الدريكسيون الخفيف لعربيات المدينة والزحمة عشان سهولة المناورات......الدريكسيون الرياضي هو اللي بيبقي تقيل شوية عشان يحسسك بالعجل. والاسترا خفيف عالسرعات الواطية وبيتقل عالسرعات العالية.
و أفهم من كلام حضرتك أن الكورولا رياضية مثلاً ؟؟؟؟؟؟ ولا الكورسا رياضية اكتر من الاسترا ؟؟؟؟.
بعدين يا باشا الشاشة والايريال والحاجات دي بتبان في المعرض مش لازم تشتريها عشان تعرفها !!!! لو مكنتش عاجباك من الاول مكنتش تجيبها وهات الكورولا عشان الشاشة اللي فيها احلي و العفشة أنعم. يعني إحتياجات حضرتك بترجح الكورولا....ليه جبت الاسترا ؟؟؟؟
النور بوظيفته مش بشكله ولوشكله مش عاجبك مكنتش تجيبها برضه !!!!!!!!
حضرتك جبت عربية مش مستريحلها ودي أكبر غلطة حضرتك عملتها.
كورولا تاني فئه عربيه محترمه جدا .. إستهلاك أقل للبنزين .. ثباتها كويس .. بعد التعديل بقت مرتفعه عن الارض إرتفاع مناسب .. الأوبشن فيها حلو ..
مع إني كنت دافع عربون أسترا كوزمو بلاس من 6 شهور .. و بعدها أشتريت فلوانس أصلا ..
بس ما أريد لك إلا النصيحه .. الأسترا وهميه .. في التابلوه الخرافي .. و التصميم الخارجي العصري جدا .. و شكلها من ورا حلو ..
علي عكس التويوتا شكلها من ورا غير من قداااام خااااااااااااااااالص
صعب نقرر ايهما افضل الموضوع احتياح وفى نظري مصر انسب لها الكرولا
الاسترا بيركبلها شاشة تتش على فكرة ب gps و كل ما تتمناه ده اولا ، ثانيا ممكن تغير الانوار النهارية بلمض بيضة انت دور بس و هتلاقي ناس كتيير معاها استرا و بتحط 92 و عادي و التوكيل بيعمل update للسوفتوير تظبط العربية عادي طلعتها اه ممكن تكون اقل عشان تقيلة متفق معاك بس بتشد كويس اوي بعد و بالنسبة للتحكم فصعب اوي حد يقول كده كل اللي جربها اجمع على ان التحكم بتاعها كويس و ثبات رائع و شكلا هى احلى من الكورولا لست متحيز للاسترا لكن العربية اثبتت نفسها و الا مكنتش انتشرت كده عيبها ان حجمها صغير من ورا و ديقة عن الكورولا .
اوبل استرا و العربية انتشرت جامد و الفترة دي بشوف الاسترا في الشارع اكتر من الكورولا
يا باشا كله ممكن انا هديك لينك لجروب على الفيس بوك تطرح فيه اسألتك ناس جربت المواضيع دي
https://m.facebook.com/groups/302485...4?ref=bookmark و هتلاقي بوست على جروب واحد جايب للانسجنيا عنده نور day light ابيض اسأله و ان شاء الله تلاقي اجابة و حل وافي
انا جربت الكورولا بتاعت واحد صاحبى ومحسستنيش خالص انها بالمبلغ دا ..
هى كل ميزتها من الاخر موتور وفتيس و طلعات ناعمين جداا .. الباقى كله عادى ان مكانش تحت العادى فى حجات زى الفرامل مثلا .. الباور اتقل من بتاع باسات 99 بشويه صغيرين !!
مش عارف .. ماحستهاش نهائى ..لو مكانك هاروح للاسترا بشده
1000000 شكر لاراكم الجميله
انا بدور علي عربيه ادا قوي .معدل استهلاك الوقوض مقبول ثبات قوي علي الطيق
انا ميفرش معايا قطع الغيار باسعارها لاكن يفرق معايا باتعيش اد اه
راى الشخصى كورولا وانا لو مكانك هجيب كورولا
الواتس لينك تعديل علي ال تورشن بيم بيخلي العربية تؤدي نفس اداء المالتي لينك
الي بيكلم عن سعر اعادة بيع استرا يا ريت ينزل السوق يشوف الاسترا السيدان سعر اعادة بيعها كويس جدا و ده بسبب ان العربية انتشرت آوي في السوق فا سعر اعادة بيعها اتحسن جدا و مقارب جدا للكورولا ٢٠١٤ دلوقتي و الي مش مصدق ينزل السوق او يدخل علي كونتاكت . الاسترا دي اكتر عربية باعت لوابل في مصر من زمن و نجحت بقوة في السوق ف ان كانت اعادة البيع في صالح الكورولا بس الفرق مبقاش كبير الاسترا انتشرت جامد و ده بسبب انها عربية كويسة لأن توكيلها وحش فا انتشارها كده رغم التوكيل دليل علي قوة العربية.
اتمني ان يكون كلامي منطقي و فيه حيادية عشان ميتفهمش غلط .
الزميل الفاضل طلب الاسترا انجوي مش الكوزمو و هنا مربط الفرس لو جينا اتكلمنا علي الاوبشنز فالكورولا في هذه الفئة بها اوبشنز اعلي :
http://nileup.com/up/uploads/nilemotors_14013035981.jpg
بالنسبة للاداء كما طلب صاحب الموضوع فهو كلمة عامة , لو حضرتك تقصد اداء الموتور فالكورولا افضل خصوصا في الطلعة الاولي .
اما لو تقصد اداء كثبات فالكورولا في الموديل ده ثباتها رائع ولكن الاسترا تتفوق لوجود الواتس لينك .
معدل استهلاك الوقود الكورولا افضل عشان الفتيس ال CVT الموفر و لو بتبقي ماشي بمثبت السرعة علي 110 كم/س بتستهلك 4.5 لتر كل 100 كم فقط .
قطع الغيار سعرها مناسب في الكورولا سعر التيل 500 جنيه , سعر فلتر الزيت 70 جنيه , فلتر الهوا 120 ., اما في الاسترا مش عارف و معنديش معلومة للامانة و ياريت حد ملاك العربية يفيدونا .
قطع الغيار بتعيش قد ايه كمثال سير الكاتينة في الكورولا جنزير و مش بيتغير قبل 120 الف كم و نفس الشئ للبوجيهات كل 120 الف كم .
صاج الاسترا محمل اكتر من الكورولا
عيب الاسترا انها ضيقة خصوصا من ورا و من مدخل الشنطة , بطئ الطلعة الاولي و انا لو مكنش فارق معايا النقاط دي مع اعادة البيع و توكيل منصور كنت جبتها فورا لأنها عربية ممتازة بس كنت هجيب الكوزمو مش الانجوي عشان الاوبشنز .
تحياتي للجميع , وهذه وجهة نظري تحتمل الصواب والخطأ .
قولا واحدا الاسترا انجوي مفهاش شوية اوبشنات تعكنن
والبروشور مش موضحها
زي مثلا لو دخلت ع الرابطة انا سئلت عن الفرق طلع الانجوي مفهاش حساسات مطر ولا خلفية حتى ولا فوجات ولا نواكل اللي بتبقى تحفة مع الغوامق ومدية للعربية شخصية
وكمان مفهاش مسند ذراع؟
ليه يا جماعة هو انا مش دافع فلوس ولا إيه؟١ :(
وجب التوضيح ان الاسترا انجوي مفهاش اوبشتز مقبلوة حتىى!!
اوافقك في كل حاجة ماعدا ان الاسترا شنطتها مدخلها ضيق ده انا مشفتش شنطة واسعة في الفئة دي زي الاسترا و مدخلها واسع يعني ضيق الكنبة الخلفية معوضينه في الشنطة. السعة اللترية واحدة في الشنطة في ال ٢ بين ٤٦٠ و ٤٧٠ بس شنطة الاسترا مدخلها غويط و واسع.امال شنطة السيفيك ام ٣٩٠ ليتر ولا شنطة المازدا ام ٤٢٠ ليتر تعتبر ايه لما الاسترا ضيقة؟! أكيد حضرتك مش قصدك علي شنطة الاسترا يمكن الفوكس مثلا
انا مش معترض ان هما ضيقو القاعدة في الكنبة علي حساب الشنطة , بس فعلا مدخل الشنطة او فتحة الشنطة تصميمها مضيع الوسع ده , يعني جوة الشنطة واسعة و ممكن تدخل حاجات كتيرة جدا بس يكون حجمها من ضخم لكن عشان تدخل حاجة كبيرة او ضخمة صعب مش سهل لضيق فتحة الدخول , لأن انا مجرب الاتنين في السفر مع واحد صديقي واضطرينا نحط كل الشنط الكبيرة عندي عشان الدخول اوسع وانا بوضح ان الموضوع نسبي فبقول ان في الكورولا افضل نسبيا في وسع دخول الشنطة اما الوسع الكلي للشنطة فالكورولا اكبر ب 10 لتر مش حاجة يعني.
في نقطة بصراحة انا مستغربها جدا وهي ان ابعاد الاسترا اكبر من الكورولا في الطول و العرض هو مش فرق كبير يدوبك 4 سم رغم كدة من الداخل و الشنطة الكورولا اوسع بكتير و حجم الاسترا الخارجي لا يعكس ابدا الوسع الداخلي .
سعيد جدا بالنقاش الراقي مع حضرتك
ده جدول اسعار الصيانات اللي إيدهولي مع العربية لما جبتها.....اسعارها اعلي من الكورولا فعلاً.
https://imageshack.com/i/nex9yhdj
تسلم يا هشام باشا علي الجدول ده ,
بس انا ليا ملاحظات مش عارف حضرتك اخدت بالك منها ولا لأ :
تيل الفرامل بيتغير كل 15000 كم ؟ يعني هو عمره كدة و لا التوكيل بيعمل حركة مش ولا بد ؟
نفس الكلام للبوجيهات كل 25000 كم ليه ؟ انا عندي كل 120 الف كم
و سعر طقم السيور ب 4500 جنيه كل 45 الف كم مبالغ فيه جدا من منصور , انا عندي ب 1400 كل 100 الف كم .
تحياتي