تحياتي لكل أعضاء منتدى نايل موتورز.. بجد قبل ما أشتري عربية استفدت كثير بخبراتكم

أنا لسه جايب - سوزوكي بالينو موديل 1998 أوتوماتيك .. ده أول ركوبه لي وأدعوا الله أن يرزقني خيرها ويكفيني شرها.

كنت عايز أسألكم فقط على شوية حاجات مطلوبة تتعمل في العربية .. يعني سعرها وأيه أفضل نوع لها والمصنعية بتاعتها علشان متخمش من الميكانيكية .. خاصة أن ده أول تعامل لي معاهم.

1- طقم سيرفيس + بوجيهات

2- طقم سيور (كاتينة ودينامو)

3- جوان كارتيرة + أويل سيل كوبلن يمين (علشان العربية بتسرب زيت بعد ما بركنها)

4- تنظيف ريداتير (ممكن يتكلف كام)

5- سلك سرعة

6- كشف كهرباء العربية + تظبيط نور الصالون علشان الأبواب لو مفتوحة أو متقفلتش كويس ينور النور (يتكلف كام)

7- تغيير زيت الماتور+ الفلتر (ايه أفضل نوع لـ 3000 وبكام)

8- عندي زيت الباور في الوعاء بتاعه بعد علامة الحد الأدنى بشوية صغيرة هل محتاج أزوده ؟ وبيتكلف كام وايه أفضل نوع ؟

9- هل من المهم تغيير فلتر البنزين كاحتياط بالمرة ؟

10- عندي أوكرة أحد الأبواب الخارجية مفوته .. هل أغيرها كلها ولا هي الحكاية سوستة ؟؟ ولو غيرتها ممكن تتكلف كام ؟

--

معلش أسئلة فنية كمان ؟؟ أعذروني للإطالة

- في صوت طقطقة خفيف لما أجيب الدريكسيون أقصى اليمين أو الشمال .. هل في حاجة في الباور ؟

- العربية بطلت مني وانا ماشي "مشوار التجربة بتاع العربية" بعد ما دوست فرامل لفترة طويلة نسبياً في زحمة .. ناس قالتلي بوجيهات لكن هل في شئ تاني ممكن يكون السبب ؟

هل في حاجة تنصحوني أعملها غير تغيير الحاجات اللي فوق كده بحكم ان العربية مستعملة .. وانا عايز اروقها صراحة علشان تكون بإذن المولى عز وجل جاهزة للمشاوير بتاعتي ومتعذبنيش ؟

آسف مرة أخرى للإطالة وأتمنى اللي يعرف اي حاجة يشاركني بيها وشكراً لكم جميعاً مقدما