فى الواقع أنا حبيت أحكى لكم عن قصتى مع الربع جنيه لعل الموضوع يكون فيه فائده
الموضوع بإختصار إنى إشتريت عربيتى الجديده بالتقسيط ومن الآخر القسط عبء عليا وبما إنى من المواطنين محدودى الدخل فهدانى ربى لفكره حققت معى نجاح لا بأس به
إيه هى الفكره ؟
الفكره هى أحوش ربع جنيه عن كل كيلو أعمله وطبعا مش بالحرف لكن كل لما أمون ألاقى نفسى عملت مثلا 300 كم أروح حاطط مبلغ 75 جنيه فى حصاله خاصه بالعربيه بس بدفع منهم البنزين وأشيل الباقى
مونت بعد 400 أحط 100 جنيه أدفع البنزين وأشيل الباقى
المهم عن كل كيلو بعمله ربع جنيه
بعد ما عديت 5000 كم لقيت معايا مبلغ 690 جنيه
رحت الصيانه بتاعة ال 5000 دفعت فيها 380 تقريبا
إتبقى معايا 310 جنيه تحفظت عليهم
للأسف بعد صيانه ال 5000 البنزين زاد
فإضطريت إنى أرفع المبلغ إلى 35 قرش عن كل كيلو
وبرضه بمون منهم
المهم إنى دلوقتى وصلت 12000 كم حوشت فيهم 1300 جنيه بعد البنزين وغسيل العربيه كل فتره من المبلغ اللى بحوشه
المهم المرايه إتكسرت إشتريت القزازه والكفر بحوالى 360 جنيه
إتبقى معايا حاليا 1250 جنيه
خلاصة الكلام إن المبلغ اللى بحوشه مبحسش بيه وبصرف منه على العربيه والحمد لله معايا فائض للصيانه والغسيل
حبيت اشرككم معايا فى التجربه دى لعلها تفيد