مشكلة مش لاقيلها حل فى تكييف الافيو و عايز رأيكم

السلام عليكم و رحمة الله

المشكلة اللى عندى شرحها هيطول لكن هاحاول اختصر ..

الموضوع بدأ من حوالى 10 شهور -و كان ضمان العربية خلص- بان الهواء اللى خارج من الهويات بيقل جدا" بعد ربع ساعة من المشى على سرعة عالية ..

واحد دلنى على صنايعى عند مدينة الطلبة فى شارع السودان ... قالى ده بلف الكنترول و هيتكلف 400 جنيه ...
بعد التغيير التكييف فضل كويس كام اسبوع بعد كده التبريد قل و بدأت اسمع صوت هسهسة من ناحية التابلوه ..

مارضيتش ارجعله تانى و روحت للاسطى احمد فى ارض اللواء (لاقيت فى ناس شكرت فيه فى المنتدى) ... بعد الكشف لاقى الفريون ناقص و الابرة مسربة !!

تم تثبيت الابرة و شحن الفريون و تغيير الفلتر و التكييف بقى تمام (التكلفة 250 جنيه )

بعد كام اسبوع ... بدأ التبريد يقل و رجع تانى صوت الهسهسة ... رجعت للاسطى احمد تانى .. قالى كده لازم نكشف على دورة التبريد بالكامل حتة حتة لان اكيد فى تسريب و مش باين بالكشف العادى ..

و فعلا" روحت تانى يوم و على مدار 5 ساعات تم الكشف على جميع الاجزاء (المواسير . السربنتينة . الكويل . الكومبرسور )و عمل اختبار بالضغط ليها منفصلة ..و كانت النتيجة ان كله سليم !!
قالى خلاص هنغير طقم الاولسيه كله اللى فى المواسير لانى شاكك فيه يكون هو اللى عامل التسريب البسيط ده و هنشحن تانى ... قلت ماشى (التكلفة تقريبا" 450 جنيه)
و بعد مارجع كل حاجة مكانها ضغط الدائرة بالهواء و بصينا على العداد لمدة نصف ساعة و المؤشر ماتحركش ... فقالى كده تمام .. انا مطمئن المرة دى

و دلوقتى و بعد شهرين تقريبا" بدأ التبريد يقل تانى و صوت الهسهسة يرجع تانى :Copy of m-s5:

رجعت للاسطى احمد تانى ... كان عنده عربيات كتير - موسم الصيف و الحر بدأوا - ... قولتلوا على المشكلة .. قعد فى العربية و حط ايده على الهوايات و سمع صوت الهسهسة .. لاقيته بيقولى مافيهاش حاجة ..!! .. اقوله ازاى يعنى اومال الصوت ده ايه ؟ .. يقولى اصل ده صوت الاكسبنشن مش عارف بيحصل فى ايه و بيعمل ايه :36_1_31:
و من غير حتى ما يقيس درجة التبريد او شحن الفريون ...حسيت انه عايز يزحلقنى و خلاص علشان الزحمة اللى عنده ...
اضايقت جدا" و قررت انى مش هارجعله تانى و مش هانصح حد انه يتعامل معاه تانى ..

المهم دلوقتى .. انا عايز اعرف ايه الاسباب اللى تعمل تسريب بسيط زى ده تبان اعراضه بعد شهرين من شحن الفريون

و مش عارف هل اروح التوكيل و استغل فرصة الكشف المجانى على التكييف اللى عاملنها اليومين دول و لا هايشتغلونى دول كمان ؟ ..
لانى زهقت بصراحة من الفلوس اللى بتدفع على الفاضى و من المشواير رايح جاى على الورش و المشكلة زى ما هى ؟

معلش طولت عليكم

اكشف على حساس الضغط بتاع الفرريون غالبا هتلاقية بينفس خفيف اوى وساعات ينفس وساعات لأ

أخى العزيز
حصل معايا أمر مشابه وهو أن السيارة طول ما أنا ماشغلتش التكييف محتفظ بالشحنة تمام ومع الضغط والكشف وكل حاجة تبقى تمام ، ولكن عند تشغيل التكييف يبدأ التسريب الخفيف
ودوخت السبع دوخات مع الصنايعية لحد ما تم اكتشاف إن التسريب يمون حين تشغيل التكييف فقط وكان العيب من أولسيه فى التكييف نفسه وبيسمو العيب شافت أولسيه وتم تغييره والحال بقى تمام وكان ذلك عند واحد فى الجيزة اسمه أحمد الاسناوى تانى شارع من شارع مراد من اتجاه ميدان الجيزة يمين

اقتباس:

---

المشاركة الأصلية كتبت بواسطة fadi ezzat

اكشف على حساس الضغط بتاع الفرريون غالبا هتلاقية بينفس خفيف اوى وساعات ينفس وساعات لأ

---

شكرا" لردك يا باشا
لكن هو فين مكان حساس ضغط الفريون ؟
هل قصدك البلف بتاع الكنترول اللى انا غيرته ؟

اقتباس:

---

المشاركة الأصلية كتبت بواسطة harphosh

أخى العزيز
حصل معايا أمر مشابه وهو أن السيارة طول ما أنا ماشغلتش التكييف محتفظ بالشحنة تمام ومع الضغط والكشف وكل حاجة تبقى تمام ، ولكن عند تشغيل التكييف يبدأ التسريب الخفيف
ودوخت السبع دوخات مع الصنايعية لحد ما تم اكتشاف إن التسريب يمون حين تشغيل التكييف فقط وكان العيب من أولسيه فى التكييف نفسه وبيسمو العيب شافت أولسيه وتم تغييره والحال بقى تمام وكان ذلك عند واحد فى الجيزة اسمه أحمد الاسناوى تانى شارع من شارع مراد من اتجاه ميدان الجيزة يمين

---

شكرا" لردك يا باشا
المفروض انى غيرت طقم الاولسيه كله
طب ممكن اعرف من حضرتك مكان الاولسيه اللى حضرتك غيرته كان فين بالظبط و انا ممكن اتأكد اذا كان من ضمن اللى اتغيروا و لا لأ ؟

اقتباس:

---

المشاركة الأصلية كتبت بواسطة dr_essam

شكرا" لردك يا باشا
المفروض انى غيرت طقم الاولسيه كله
طب ممكن اعرف من حضرتك مكان الاولسيه اللى حضرتك غيرته كان فين بالظبط و انا ممكن اتأكد اذا كان من ضمن اللى اتغيروا و لا لأ ؟

---

العفو يا باشا
أما بالنسبة للأولسيه فهو الأولسيه الموجود أسفل طمبورة الكمبريسور على الأكس الرئيسى

السلام عليكم اولا صوت الهس ده ناتج من الاكسبنشن ومعناه ان الشحنه ضعيفه ثانيا تسريب الشحنه بيكون من الاشيا الاتيه 1 اساتك اللى بين المواسير 2 ممكن يكوم اساتك الكمبيروسر اى اللى بيقولو عليه طقم اصلاح 3 ممكن حشوه الكمبيروسر اللى على الاكس بتاعه
عموما علشان تعرف منين لاذم تكون العربيه سخنه علشان فى بعض المشاكل بتظهر عند السخونه ثانيا لازم تضغط على ضغط عالى جدا علشان يبان فين التنفيس ولازم يتساب الضغط فتره طويله جدا مش نصف ساعه ويقولك تمام

اقتباس:

---

المشاركة الأصلية كتبت بواسطة alassaby5

السلام عليكم اولا صوت الهس ده ناتج من الاكسبنشن ومعناه ان الشحنه ضعيفه ثانيا تسريب الشحنه بيكون من الاشيا الاتيه 1 اساتك اللى بين المواسير 2 ممكن يكوم اساتك الكمبيروسر اى اللى بيقولو عليه طقم اصلاح 3 ممكن حشوه الكمبيروسر اللى على الاكس بتاعه
عموما علشان تعرف منين لاذم تكون العربيه سخنه علشان فى بعض المشاكل بتظهر عند السخونه ثانيا لازم تضغط على ضغط عالى جدا علشان يبان فين التنفيس ولازم يتساب الضغط فتره طويله جدا مش نصف ساعه ويقولك تمام

---

و عليكم السلام و رحمة الله و بركاته
أشكرك على المشاركة
و فعلا" كلام حضرتك منطقى ... التنفيس البسيط ده مش هيبان الا على ضغط عالى جدا" و لفترة طويلة ...
و بصراحة مابقاش عندى ثقة فى الصنايعية ... خاصة ان الموسم بتاعهم بدأ و عندهم زحمة و بيبقوا عايزين يخلصوا من الزبون بسرعة علشان يشوفوا غيره ....
ان شاء الله هاروح التوكيل الاسبوع اللى جاى و هابلغكم بالنتيجة ..

المشكلة عند حضرتك بنسبة كبيرة تهريب من الكباس
الاسباب :
1- لما بتضغط والعربية واقفة مفيش تهريب
2- التهريب بيحصل والعربية ماشية
3- اتأكد ان الطنبورة بتاعت الكباس مش ملوحة نتيجة لشد السير زيادة عن اللزوم

يا جماعة أنا روحت التوكيل إمبارح فرع رابعة ....
تم فحص دائرة التكييف بالكامل و ابلغونى انهم لم يجدوا اى تسريب ...
و كنت شايف العربية من ورا الزجاج الشفاف و شايفهم خلعوا الاكصدام الامامى و الفوانيس الامامية علشان يكشفوا على كل حتة على مدار 3 ساعات و برده مالاقيوش مكان تسريب ...

المهندس قالى احنا هنعيد شحن الفريون و هنحتها تحت الاختبار 15 يوم ... و لو حسيت بتسريب هترجعلنا تانى و هنضطر نفك الدائرة بالكامل
تم شحن الفريون و التكلفة بالمصنعية و الفريون كانت 240 جنيه (طبعا" ارخص و احسن من الصنايعية اللى بره)

ملحوظة : بعد شحن الفريون ... التكييف بقى حاجة تانية خالص ...تبريد ممتاز ... ماحستش بيه من زمان .... ماكنتش بحس بدرجة البرودة دى بعد شحن الفريون مع الصنايعية اللى اتعاملت معاهم .... و ماعدش فى صوت هسهسة و لا حتى فى اول تشغيل التكييف و لا لما باقفله ... رغم انهم دائما" كانوا بيقولولى ان عادى انك تسمع الصوت ده لما تشغل او تطفى التكييف ..!!! .:11:..

المهم انا يوميا" هاشغل التكييف و هاتابع و يا رب ما يحصل تسريب تانى :ask:

بالتوفيق ان شاء الله وربنا يباركلك فيه

أولا" .. كل سنة و انتم طيبين .. رمضان كريم ..

حبيت اقولكم الموضوع وصل لايه ...
بعد شحن الفريون فى التوكيل و ابلاغى انه لا يوجد تسريب و تم وضع التكييف تحت الاختبار لمدة 15 يوم ...
فى خلال ال15 يوم بقيت باشغل التكييف على طول و سافرت الساحل كمان و النتيجة كانت ...
التكييف كويس جدا" لكن أحيانا" كنت باحس انه ضعيف او بياخذ وقت طويل شوية علشان يسقع ..

قولت برده اروح التوكيل بعد ال15 يوم اللى التكييف فيهم تحت الاختبار .. و فعلا" استقبلونى كويس جدا" و طلبت منهم انهم يكشفوا تانى على ضغط الفريون علشان اطمن ان مافيش تسريب حصل ...

كشفوا تانى فعلا" و لقيوا الحمد لله مافيش تسريب لكن اكتشفوا ان الزرار اللى بيمنع دخول الهواء من بره و بيدور الهواء داخل العربية مش شغال ...

و كنت فعلا" بفالى فترة ملاحظ ان اللمبة بتاعته مابقتش بتنور لما بادوس عليه و كنت فاكر ان اللمبة بس هى اللى اتحرقت ...

قالولى هو ده اللى بيخليك تحس احيانا" ان التكييف ضعيف لان دائرة الهواء مش مقفولة و محتاج طقم مفاتيح تكييف ...

سالت عليه فى مركز منصور لقطع الغيار اللى جنبهم قالى تمنه 690 جنيه و مش موجود دلوقتى و لو حابب تحجزه هيجى بعد يومين ..

رجعتلهم تانى فى مركز الصيانة قالولى خلاص لو مش عايز تغيره هانقفلك البوابة و هنلغى وظيفة الزرار و ممكن ماتغيروش ..:F_eyeb1[1]:

الحمد لله خرجت من عندهم و مادفعتش و لا مليم ... و الحمد لله التكييف تمام اوى ... و جربته فى الايام الحر الشديد اللى فاتت و كان ممتاز ..

اتعلمت من التجربة دى ان التكييف من الحاجات الحساسة جدا" فى العربية و اى غلطة او تشخيص غلط من الصنايعية اللى بره هيكلفك مئات الجنيهات ... ده غير حرقة الدم و المشواير رايح جاى ... و ان احسن مكان لصيانة التكييف هو التوكيل .