الموضوع: اخبار اليوم و خالد و الزلزال

طيب ايه الزلزال او الفائده فى كده ؟

انا موش عارف بجد ، لكن فى المقالة ان للموضوع بقية بالنسبة لمصر
وكيل جديد للعربية هاتفرق ايه ، ولكن تجميع عربية جديدة وانخفاض اسعار ده اللى يهمنا
هوة بيفرق معانا ايه مين اللى بيكسب مننا احنا مشترين العربيات ، ده يفرق مع التجار موش المستهلكين
اللى يفرق معانا سعر يقل وموديل جديد كليا فى السوق
طيب لسة يعنى هانستنى ، ده احنا لينا الجنة

كل الحكاية إنه بيتريق على الأهرام علشان إتريقوا على رجال الأعمال دول و قالوا إن العربية الكومودو لسه لحد دلوقتى ما نزلتش الأسواق و إتأخر تسليمها عن الحاجزين
و شككوا فى فى رجال الأعمال دول حبايب خالد أباظة

فلما عرف الخبر دا كان كل همه إنه يثبتوا إنهم ناس جامدة و كلام من عينة صفقة القرن

لكن لا وجود للخبر حتى الان أى فايدة لمصر كل الفايدة إن الناس دى نيسان بتثق فيهم لا أكثر

و مافيش فايدة فى خالد أباظة كل يوم بيفقد المصداقية أكتر من اليوم إللى قبله

فعلا الهيصة اللي عاملها خالد اباظة والحركات بتاعته زادت عن حدها وبقت بايخة وماسخة. والدليل على كده إن ملحق الأهرام للسيارات كتب على الخبر امس الجمعة بدون المهرجانات اللي عاملها خالد في الأخبار النهاردة...لان إيه الفايدة اللي حتعود علينا كمشترين من الزلزال ده؟ صفر
وإذا كان الكلام ده مهم للموزعين والتجار، فــ 99% من قراء الملحق هم من المشترين... بدليل هذا الكم الهائل من الإعلانات الموجهة للمستهلك

فعلا بقيت اقرف من طريقته في الكتابة وخاصة لما اقارن بينها وبين كتاب محترمين زي هشام الزيني في الأهرام مثلا

علشان كده انا قررت اقاطع ملحق اخبار اليوم للسيارات واسيبه لبائع الجرائد ... يمكن يحسوا في اخبار اليوم ويعرفوا ان الملحق مسؤل عن شخص كريه وكتاباته بايخة ومفضوحة

أنا فعلا زي كل الشباب اللي علقوا على موضوع زلزال أخبار اليوم انصدمت فعلا لما حدث .
1 - في الواقع ملحق أخبار السيارات على الرغم من تحفظي وتحفظ الكثيرين عليه ... إلا أنه وللأسف يعتبر من أحسن ملاحق السيارات .
2 - المشكلة عندنا في مصر إن الحقائق بتضيع وللأسف المستهلكين هم الذين يدفعون الثمن ...
3 - صراع القط والفار بين ملحق أخبار اليوم & وملحق أهرام الجمعة :
أيهما أكثر مصداقية ؟ أيهما أكثر وصولا للقارئ ؟ أيهما أكثر مرجعيا ؟ .. فهذين الملحقين يوزعان مع أكثر الجرائد توزيعا في مصر .. لذا فيتابعهما الملايين ومن الطبيعي أن يحتويا على كم إعلانات كبير وذلك أراه في صالح المستهلك فيقارن بين الأسعار ... أما من حيث صراعهما فأنا أراه من مصلحة المستهلك المصري .
4 - أنا أرى وعلى الرغم مما يقال على ملحق أخبار اليوم فإنه أكثر احترافية في عرض مادتة الإخبارية وحتى الإعلانية ... أسلوب الأهرام هادئ أكثر من اللازم .
5 - أنا فى اعتقادي أن ملاحق السيارات عموما تعتبر وسيلة دعائية وليست مرجعية .
6 - أعتقد أنه توجد في مصر مجلات للسيارات جديرة بالاهتمام والاحترام ... ولكنها للأسف لا ترتقي لمستوى المجلات العربية الأخرى .
7 - إننا نشاهد تجارب ومقارنات فى جرائدنا ومجلاتنا عن سيارات فخمة وسوبر رياضية وصراعات شرسة بين البورش والفيراري ومنافسة اللامبرجيني ...
8 - فأين سوقنا المصرية ( أريد تجربة قيادة ومقارنة عملية بين المازدا 3 & هوندا سيفيك & ميتسوبيشي لانسر ) على سبيل المثال ... هل قامت جهة ما بعمل مقارنة بين ( ميجان & فوكاس & A5 ) .
كل المجلات والملاحق تظهر كل السيارات عندنا ( تحتل المركز الأول في فئتها ) كل السيارات تحتل المركز الأول ... أنا أعتقد أن عدد من يكتب على السيارات في مصر ويعرف الفئات الكاملة لتصنيف السيارات لا يتعدون أصابع اليد الواحدة .
10 - المشكلة يا سادة ليست في اخبار اليوم ولا الأستاذ خالد ...
من وجهة نظري المشكلة في منظومة الإعلام الخاص بالسيارات ومدى اهتمامه بهذا المجال ووجهة نظر الوكلاء لهؤلاء ....
.................................................. .................................................. .................................................. .................................................. ......
.................................................. .................................................. .................................................. .................................................. .................................................. .................................................. ...........
ونكمل بإذن الله إن كان في العمر بقية