الموضوع: معلومة عن العمر الافتراضي لاي سيارة

السبب الأساسي لارتفاع أسعار السيارات في مصر راجع لسياسة الحكومة في فرض جمارك مبالغ فيها على أي سلع داخلة البلد

الموضوع ده ما بقالوش سنتين ولا تلاتة.. الجمارك موجودة من بداية تطبيق السياسات الاشتراكية في الستينات

في المقابل... أسعار البنزين تعتبر تالت أرخص سعر للبنزين في العالم بعد السعودية والكويت

تفكير متخلف طبعا.. ﻹن لو الجمارك اتشالت والدعم اتشال من البنزين ( اللي هو بيحصل دلوقتي شوية شوية ) .. أسعار العربيات هتبقى أرخص كتير.. بس سعر البنزين الغالي هيخلي الناس تشتري عربيات صغيرة واستهلاك بنزينها قليل.

وكده .. العربيات القديمة هتختفي ويحل محلها عربيات جديدة موفرة في البنزين وأريح للناس.


المهم. ..

لما تعرف إن جمارك العربيات أقل من 1600 cc بتبقى إجمالي حوالي 67% من سعرها الأصلي
وجمرك العربيات تحت ال2000 cc بتبقى حوالي 217% من سعرها الأصلي
وجمرك العربية فوق 2000 cc بيبقى حوالي 273%

والأرقام دي على الأقل طبعا.

هتعرف ساعتها قد إيه الحكومة بتدور على المكسب الوقتي بدون النظر للمستقبل..

الموضوع ما لوش ارتباط كبير بالاستيراد قد ما له ارتباط بسياسات واعية تسهل على الناس عيشتها وتأثيرها على الاقتصاد يكون إيجابي.

على فكرة.. العربيات اللي بتتصنع في مصر نسبتها مش قليلة .. المشكلة إن مبيعات العربيات في السوق المصري قليلة جدا بالنسبة لعدد السكان.. وده سببه حاجتين:

1- سعر العربيات المبالغ فيه علشان الجمرك
2- اقتصاد البلد التعبان وتدني القدرة الشرائية

مصانع تجميع السيارات في مصر لو اشتغلت بكامل طاقتها الإنتاجية ممكن ننافس دول زي تركيا والبرازيل .. اللي وصل حجم الإنتاج في كل واحدة منهم لمليون عربية في السنة الواحدة

الكلام ده معناه إن تكلفة إنتاج العريية الواحدة هيبقى أقل .. والمفروض سعرها يرخص كمان.. خصوصا لما تعرف إن كل القطع المستوردة اللي بتتجمع معفية من الجمارك..

ده غير إن حجم الإنتاج العالي هيخلي المصانع تصدر.. وهيبقى عندك عربيات مصرية بتتصدر للعالم.. زي ما بيجيلنا عربيات من تركيا والبرازيل وجنوب أفريقيا.. وده معناه عملة صعبة ودخل زيادة وتحسن في سعر الجنيه المصري.

إنما أصحاب المصانع مش محتاجين يقللوا التكلفة ولا يزيدوا الإنتاج.. ﻹن الجمرك العالي على العربيات المستوردة مخليهم يعلوا سعر عربياتهم بحيث يغطوا التكلفة العالية ويكسبوا مكسب كبير جدا وتفضل عربياتهم أرخص من المستورد ب5000 جنيه.


...

المشاركة الأصلية كتبت بواسطة حماده المصري

يعني بغض النظر عن ان الموضوع تحول الى نقطه تانيه وهي اسعار العربيات في مصر والزباله والمرور والجمارك والكلام ده كله


انا شايف ان الكلام ده مبالغ فيه الي هو عمر افتراضي5 ل 7 سنين

خاااااالص مش كده لان اوروبا نفسها وامريكا فيها ناس فقيره وبتركب عربيات تعبانه برضو وال american muscles عمرها برضو قديم جدا من التمانينات والتسعينات

ولو العربيه فعلا عمرها الافتراضي كده كانت هتتكهن بص على عربيات 2005 هتلاقيها ماشيه زي الفل

انا ركبت النترا 2005 ف 2011 زي الفل لحد ما بعتها وكان معايا صني برضو 2006 زي الفل لغايه ما عملت بيها حادثه

ولانوس 2000 برضو نفس الكلام وكل الناس بتعمل كده

هو الفكره في الاستخدام والفكره ان في حاجات بتبوز حاجات يعني لو العربيه سخنت منك تجيب جوان وش وممكن الوش كله وممكن تدخل بقى في المتور والشمبر والعمره الكامله

لو المساعد بايز يبوز بقيت العفشه مثلا

حاجات زي كده كتير

انما في الطبيعي مفيش الكلام ده

هو الحقيقة إحنا محتاجين الأول نحدد تعريف "العمر الافتراضي" علشان نعرف نتكلم وما نطلعش برا الموضوع.

المشكلة إن تعريف العمر الافتراضي بيختلف من حاجة للتانية

يعني مثلا.. العمر الافتراضي للإنسان ييبقى65 سنة في المتوسط.. كده نفهم إن العمر الافتراضي في الإنسان هو من أول ما يتولد لحد ما يموت.

المباني عمرها الافتراضي هو من إول ما تتبني لحد ما تقع..

المشكلة إن الماكينات عموما - والسيارات زيها - ما تقدرش تقول إن ليها عمر افتراضي بمعنى إنها تتدمر بعد وقت معين

العمر الافتراضي ﻷي ماكينة تقدر تسميه "العمر الاقتصادي"

وده تقدر تعرفه بالوقت اللي بتستفيد من الماكينة وتاخد منها الفايدة وتصرف عليها مبالغ بسيطة..

بمعنى إن الماكينة تبقى مجدية اقتصاديا.

لو لقيت إنها ما بقتش مجدية اقتصاديا فالمؤكد إنك هتفكر في حلول أخرى تقلل مصاريفك.

الفكرة إن طبيعة أسعار العربيات العالية في مصر بيخلي قرار التخلي عن العربية صعب جدا... وبنحاول نزود من عمر العربية بالصيانة - الرخيصة في مصر - بدل ما نشتري عربية جديدة .



...