م / أسامة عفيفى
القبطان / شنورى
أولا شكرا لدعائكم لصديقى ولكنى مختلف معكما فى نقطة هامة وهى ان الراجل اتعامل مع بنك ما اتعاملش مع الخواجة ليشع المرابى زى مابيطلق عليه شنورى ... وتعاملات البنوك متاحة للجميع وفقا لظروف كل شخص والله أعلم بأحوال الناس ...فمافيش داعى اننا نحكم على الناس بردود من نوعية يستاهل دى
انتم شايفين ان شيخ الجامع صح وأنا شايف انه ماينفعش شيخ جامع أصلا..ليه بقى؟
شيخ الجامع مش شغلته يقفل باب الرحمة فى وش الناس...ما بنتناقش فى نقطة ربا ومش ربا... حانمشيها ربا وصاحبى اضطر له لظروفه اللى مايعلم بيها غير ربنا ... غلط ودلوقتى عاوز يصلح غلطه... لجأ لبيت ربنا ياخد قرض حسن باعتباره من الغارمين يروح الشيخ المبجل يقفل باب بيت الله فى وشه ويخلليه يلف يدور على بنك تانى يسلفه أو فيزا جديدة يفتحها ويسحب منها عشان يلبس طاقية ده لده ؟
هو ربنا لما قال الغارمين استثنى ديون الفيزا ؟ وهل أنا لما سلفته فلوس أساعده أبقى شاركت فى ربا؟
ده من باب أولى أستغل مال الله فى ابعاد المخطىء عن طريق الخطأ مش أزقه فيه
فاكرين حدوتة اليهودى اللى قتل 99 واحد وراح لراهب قال له أتوب قال له مالكش توبة انت قاتل 99 واحد راح قتله وكمل ال 100 لما سدها فى وشه وراح لراهب تانى قال له باب التوبة مفتوح لكن هاجر من هذه الأرض فالراجل مات فى الطريق واختلفت عليه ملائكة الرحمة والعذاب فقاسوا المسافات لقوه أقرب للأرض المهاجر اليها فرفعته ملائكة الرحمة لصدق نيته ؟
مساعدة الناس أطهر عند الله من التنظير عليهم .... ربنا مايوقعكمش فى ظروفهم يارب
المفضلات