الموضوع: سؤال بخصوص موتور قربه المساحات؟؟

المشاركة الأصلية كتبت بواسطة ALI SOLIMAN

خلى بالك الصوره اللى انت رافعها مش طلمبه الاوبل فيكترا B
بص يا هندسه انا الطلمبه عندى شكلها زى اللى فى الصوره اللى انا رافعها
بس طبعا شكل الفيشه مختلف المهم انك لما تفكها هتلاقى الفلتر راكب فى البوز اللى عليه دايره حمرا

والبوز التانى بيركب فيه الخرطوم اللى رايح للمساحات والفلتر شكله زى العلبه و اسطوانى بس خامته بتكون كاوتشه طريه وانا عندى لونه رمادى و مخرمه من الجنب و من تحت

طريقه فك الطلمبه

1- هتمد ايدك من تحت الاكصدام وهتلاقى الطلمبه فى جنب القربه فى اتجاه الكاوتش
2- هتلاقى فيشه فوق الطلمبه وفكها سهل اسحبها لفوق مع الضغط على الفيشه من الجنب عشان بتبثى ماسكه بكلبسات معدن حسس عليها وهتاخد بالك عشان كل العمليه دى مش هاينفع تشوف حاجه بعينك عشان مزنوقه قوى بس فكها سهل

3- بعد ما تشيل الفيشه امسك الطلمبه كويس واسحبها لفوق وهى بتكون راكبه كبس بس سهله قوى وبعد ما تسحبها هتلاقى فى الجزء السفلى اللى عليه دايره حمرا الفلتر الرمادى الكاوتش ولو مالقتهوش يبقى لزق فى القربه مكان ما بتركب الطلمبه

ساعتها هاتمد صباعك جوه الفتحه اللى بتركب فيها الطلمبه و هاتسحبه بسهوله جدا و نصفه كويس و سلك كل الاخرام و ركبها تانى

ومش هاتحتاج تفك البطاريه خالص عشان الفيشه بعيده عن المياه وكمان القربه مكانها خلف الرفرف و ملهاش علاقه بالبطاريه خالص

دى كل المشاكل اللى قابلتنى و انا بحلها

و ياريت اكون بعرف اوصف واسف على الرغى الكتير

ربنا يكرمك..

المشاركة الأصلية كتبت بواسطة sherif moneer

انا نزلت الساعه 2 بليل جربتها
بص يا باشا عشان توصل للماتور
اكسر العجل يمين
فك مسمار الكارتيره اللي رابط في الاكصدام وشد الكارتيره عشان توصل للقربه
شد الماتور طلعه
انا طلعته ونضفت الفلتر كان فيه رواسب
بس تركيبه غلبني شويه عشان الخرطوم كان اتخلع من الوصله بتاعت الكابوت
اما تيجي تفكه اخلع الخرطوم منه عشان متغلبكش ف التركيب
الملاحظ بقى ان مية الرشاشات بقت اشد شويه
بس اعرف هتجيبه جديد منين وقولي بقى عشان الماتور بيتأخر ف تحضير الميه برده وكان عندي امل يظبط
ينفع أبلعه مزيل صدا مثلا؟

حبيبي يا شريف. :018a1d~146:
اجرب كده واقولك هنعمل ايه..

بصوا يا جماعه ..
اولا احب اشكر كل اللي رد علي الموضوع..
تجربتي ...
-رفعت العربيه من ناحيه العجله الشمال وفكيت الفرده..
-فكيت جزء من الكارتيره المرتبط بالاكصدام ومسمار واحد كمان جوه الفجوه
-هتلاقي الموتور واضح جداا ورا الاكصدام .
-قبل ماتفكر تفك فيشته او خرطومه . فكه هو نفسه عن طريق انك تشده لفوق
او مفك عاده وتدخله تحته وترفع (رافعه من النوع التاني) حد فاكر الكلام ده؟!!
-في مصفه كاوتش بين القربه وبين الموتور , غالبا هتلاقيها لازقه في القربه , شدها برده
-جرب افتح الكونتاكت وشغل موتور المساحات . لو له صوت يبقي شغال نظف القربه ونظف
المصفه هيشتغل.لو مالوش صوت يبقي غيره جديد او استيراد وفي الحالتين سعره رخيص جداا
- لا اعتقد انك ينفع تحط جوه الموتور wd-40 لتليينه او تنظيفه . سواء هو موتور dc ومروحه
او موتور مغناطيسي ترددي ( زي بتاع اسماك الزينه) فمش هينفع معاه او مفيش تاثير ايجابي من الزيت

- مشكلتي الشخصيه كانت في اوساخ في القربه سدت المصفه . اول مانظفتها كله بقي تمام..
-الاوساخ دي كانت عباره عن حجات لزجه زي الجيلي لونها ابيض وحجمها كبير.

اعتقد ان دي ترسبات ناتجه عن استخدامي لسوائل منظفات زجاج رخيصه واحيانا شامبو
مع ميه المساحات
والحمد لله اوله واخره..تقبلوا تحياتي