السلام عليكم ورحمة الله وبركاته

ازيكم يا سياتاوية


إن شاء الله رايح اظبط التكييف يوم السبت .. أخدت ميعاد مع مهندس فارس ورشة أحمد أنور اللى فى فيصل ..

وكنت أخدت منه ميعاد قبل كده وروحت متاخر شوية فاعتذر عن الشغل فى العربية لأن جالوا عربيات تانية.. لكن بص بصه سريعة وان التكييف محتاج شغل ..

قال ان السربنتينه شكلها تعبان بس هيكشف عليها وممكن تتغير .. بكام ؟ بــ 450 جنيه.

المروحه عندى بتسخن العربية .. قال ربما تكون بتلف عكس لكن لو هتتغير .. بكام ؟ 250 جنيه.

بص على الكباس قالى انه مهبب زيت شوية فده عمره كده قريب، فهيشوف هتعمل فيه ايه .. وانا قلتله انه عايز الكلتش يتغيير ..

شاف التلاجه قالى كويسه .. بس انا قلتله انها مكتومة وعايز انضفها ..

وقالى الفريون اللى عنده احدث وانه مش بيتعامل مع الفريون القديم ؟؟ بس هيتصرف ...

وقلتله يلغى السخن لأن العربية لما بتسحن بيدخلى صهد جامد ..

وعندى مشكلة تانية بس نسيت اقوله عليها ان الموتور بيعلى ع السلانسيه لما بشغل التكييف بيبقى 2 rpm وبنزله عن طريق المسمار (السورنيت ) اللى راكب ف الكاربراتير، وبيتظبط وبعدين يرجع تانى .. فلو حد يعرف السبب يقولى ..


المطلوب من حضراتكم ... ؟

عايز رأيكم فى التكاليف اللى قدرت اتحصل عليها زى السربنتينه والمروحه مثلا ؟ والتكلفة الإجمالية المتوقعة ..؟

رأيكم ونصايحكم ازاى الم الموضوع ده بأقل تكلفة وأفضل أداء ؟

هل أروح توكيل ساندن لأن التكييف ساندن ولا أروح للمهندس فارس اللى معادى معاه يوم السبت ؟