السلام والتحية علي كل أعضاء المنتدي الكرام

اولا: احب ابدا بشكر الجميع ومش التيوتاوية فقط لأن مشاركتكم هي اللي ساعدتني وساعدت ناس كتير في أختيار العربية اللي تناسبهم.

ثانيا: أنا للأسف من الناس اللي دايما بتجري بسرعة بداعي وبدون داعي (أن شاء الله أبطل الموضوع ده قريب) وحصلت معايا مواقف خطيرة كتير وربنا كان بيسترها معايا (الحمد لله والشكر لله) وساعات العربية القديمة (كورولا 2004) كانت تعوم مني علي خفيف في الملفات الحادة أو لو باخد غرز علي سرعة عالية .

ثالثا: بعد ما ربنا وفقني لشراء كورولا 2014 وسوقت العربية علي نفس السرعات (120-170) وتعرضت لمواقف خطيرة مفاجأه ووجدت أن تفادي المواقف دي بقي اسهل بكتير بستر ربنا ثم وجود نظام ESP أو زي تويوتا ما بتسميه VSC وعرفت أهمية وجود ESP من واقع التجربة.

رابعا : أنا حبيت أنصح الناس اللي ناوية تشتري انهم ميتنزلوش عن وجود ال ESP في العربيات اللي هيختروها.

خامسا: أنا دورت علي أجابة السؤال ده: ماهي العربيات السيدان cc1600 التي بها ESP في مصر وسعرها أقل من 200 ألف جنيه؟

وكانت الاجابة بعد البحث في مواصفات أشهر العربيات في مصر في حدود من 150 الي 200 ألف في كل الفيئات كالاتي:

كورولا
هوندا
استرا
والأتي لا يوجد
ميتسوبيشي EX
النترا
سيراتو
مازدا 3
فلوانس
امبريزا
كروز
صني
ميجان

سادسا: من 200-300 :

جيتا
باسات
سيتروين C5
بيجو 508
انسيجنيا

سابعا:من300-400 ألف

BMW 316i
مرسيدس C180
فولفو V80


تعليق: الالنترا و السيراتو كمثال عربيات شكلها تحفة وبتنزل في أمريكا وأوروبا بخاصية ESP لكن توكيلاتهم المحترمة في مصر بتتنازل عن الخاصية دي علشان تكسب أكتر. فاذا معظم الناس خدت موقف جماعي ايجابي وطالبت توكيلاتهم انهم ينزلوا الخاصية دي في كل العربيات والا الناس مش هتشتري العربيات دي، التوكيلات هتضطر انها تستجيب علشان تحافظ علي عملائها ، وبكده تزيد وسائل الامان في جميع العربيات وتقل الحوادث باذن الله.

المهم أنك كعميل محترم تعرف أن بأيدك تغير السياسة التجارية لتوكيلات العربيات في مصر بقانون العرض والطلب.

بكرر شكري ,أتمني يكون الموضوع مفيد