نيسان تيدا

**ibrahim9** · 31-05-2014 01:53 AM

معروض عليا نيسان تيدا 2008 عامله 90000 كيلو وراشه اكصدامين مطلوب 81000 بس كفاءه الموتور 78% دا كويس ولا لاء ارجوا الرد بسرعه

**xil_fox_lix** · 31-05-2014 03:25 AM

بالنسبه للسعر اعتقد كويس جدا ع كيلومتر وانها مرشتش
لكن موضوع الموتور ده معرفش شكله مريب
هو العداد ده مضبوط ؟

**samsong** · 31-05-2014 09:02 AM

بالنسبه للسعر يعتمد علي الحاله العامه للعربيه ككل ويمكن التفاوض شويه معاه ولكن بالنسبه للموتور وكفائته فهل قمت بقياسه في المحطه ام التوكيل ويجب فحصه مره اخري وتاكد من كمبيوتر الاعطال

**matawfeek** · 31-05-2014 11:35 AM

انا شارى تيدا 2007 سيدان اعلى فئة عاملة 85 الف كيلو رشة اكصدامين و رفرفين ب 83500 جنيه .
الكلام ده من 10 ايام بالظبط و هى محتاجة الصيانة العادية بس و قاعدة موتور و احتمال مساعد . و كنت قيست الموتور فى البنزينة كان عامل 75 % و قالولى فى البنزينة ان ده كويس قوى .
و كان ساعتها ال 2008 قدامى فى معرض فى شارع الميثاق جنب سوق السيارات لونها اسود فبريكا بالكامل اعلى فئة سيدان و حالتها احسن سنة و بيقوللى معمولها كل الصيانة و كانت ماشية حوالى 92 الف كيلو كان اخره فيها 93 الف جنيه (وهى لسة موجودة عنده على فكرة لسة شايفها امبارح لو عاوز تروح تبص عليها قبل ما تشترى عشان تشوف الحالة الكويسة عاملة ازاى .

انا رأيى اللى قدامك دى حاجة من الاتنين لا اما ملعوب فى عدادها لا اما لقطة.

الخلاصة شوفها و اكشف عليها لااااااازم فى التوكيل و خدها قاعدة اللى تقوله اكشف فى التوكيل و و يهرش فى دماغه ثوانى قبل ما يرد عليك او يطلب عربون قبلها او يماطل بأى حجة عشان مايروحش سيبه و امشى و انسى العربية تماما.

معلومة بس مهمة : اولا التوكيل بيحتاج حجز قبلها
ثانيا توكيل ابو رواش مابيرضاش يعمل كشف بيع و شراء ( اللى هو شاسيه و دواخل و دهان خارجى و كبس موتور) انما بقيت الفروع تقريبا بترضى عادى . اتصل و شوف ايه النظام.
معلومة تانية: انا قبل التيدا كنت هاشترى مازدا 3 و كانت عاملة 88 الف كيلو و روحنا كشفنا فى التوكيل التوكيل قال لصاحبها انت مشتريها من سنة من فولان قاله اه. قاله فولان ده كان بيعمل عندنا صيانة فى 2012 و كانت عاملة 226 الف كيلو .

الخلاصة خلى بالك من موضوع لعب العداد ده و بتتعرف لا اما من حد صايع قوى يبص للعربية يقولك العربية دى اكيد ماشية اكتر من كده . يا اما توصل او تسأله عن اخر صيانة عملها فين ولتكن صيانة ال 60 الف و تروح التوكيل او تتصل بيهم تسألهم عن العربية ( برقم الشاسيه و الموتور و رقم العربية و اسم صاحبها ) و هم يقولولك ايه البيانات اللى عندهم ليها

نمرة نيسان 16244 و نمرة اوتو ايجيبت 16666

بشكل عام . ربنا يوفقك و التيدا عربية تحفة بس لو انت مش غاوى جرى على الطريق فوق ال 120 و ال 140 هاتبقى افضل اختيار لأنها عملية جدا اعتماديةو عائلية جدا واسعة جدا عالية جدا يابانى جدا جدا .

**ibrahim9** · 01-06-2014 06:52 PM

انا عاجز عن الشكر لكل اللي رد عليا ودا المتوقع من ناس محترمه بتقدر الياباني انا الحمد لله بعد الاستخاره مرحتش شوفتها وقررت تأجيل الوضوع شويه لحد ما اقدر اشتري جديد لان انا رحت شوفت عربيتين تيدا قبل كدا ويقوللي فابريكه يا استاذ اروح اكشف في البنزينه يقوللي دي كهنه يا استاذ واخر عربيه بصيت عليها كانت تيدا 2008 فابريكه ما عدا رفرف وراني انا صعبت علي الفني والمهندس لدرجه انه نطق وقاللي باللفظ كده ياابني ماتخدش العربيه دي دي متشخرمه جوه وبره انا زهقت من المستعمل ومن الناس المقرفه المفروض انه راكب تيدا ياباني ومش مقدر ان كل مره اروح ادفع تمن الكشف واكراميات وخلافه وبعدين تطلع عربيات زباله وللمره التانيه شكرا لكل اللي رد عليا

**samyyousef** · 01-06-2014 08:03 PM

المشاركة الأصلية كتبت بواسطة ibrahim9

انا عاجز عن الشكر لكل اللي رد عليا ودا المتوقع من ناس محترمه بتقدر الياباني انا الحمد لله بعد الاستخاره مرحتش شوفتها وقررت تأجيل الوضوع شويه لحد ما اقدر اشتري جديد لان انا رحت شوفت عربيتين تيدا قبل كدا ويقوللي فابريكه يا استاذ اروح اكشف في البنزينه يقوللي دي كهنه يا استاذ واخر عربيه بصيت عليها كانت تيدا 2008 فابريكه ما عدا رفرف وراني انا صعبت علي الفني والمهندس لدرجه انه نطق وقاللي باللفظ كده ياابني ماتخدش العربيه دي دي متشخرمه جوه وبره انا زهقت من المستعمل ومن الناس المقرفه المفروض انه راكب تيدا ياباني ومش مقدر ان كل مره اروح ادفع تمن الكشف واكراميات وخلافه وبعدين تطلع عربيات زباله وللمره التانيه شكرا لكل اللي رد عليا

لا تيأس شراء المستعمل يحتاج الى صبر......فكما يوجد نصب كثير و عدم امانه في بيع المستعمل ...فهناك ايضا مبالغة شديدة في اسعار الزيرو لسيارات لا تساوي ثمنها

**matawfeek** · 02-06-2014 12:20 PM

يا باشا صلى على النبى و ماتاخدش الموضوع على اعصابك شراء المستعمل مقرف و صعب طبعا و انا عن نفسى تقريبا قعدت شهور على ما استقريت و روحت المطرية و الهرم و المعادى و سافرت بنها و رحت المريوطية و لفيت القاهرة كلها تقريبا و الجيزة لحد ما وقعت فى حاجة ان شاء الله تكون كويسة . اهم حاجة اهم حاجة اهم حاجة الاستخارة عشان مع احترامى لكل الناس والله ما فى حد هايفيدك ولا هاينفعك قد الاستخارة و اوعى تزهق من كتر الاستخارة . صدقنى انا كنت بعمل استخارة على عربية و تروح منى و ازعل بس لازم العربية اللى بعدها تبقى احسن منها .

مبدأيا انا مهندس و شغلى فى السراج فى مدينة نصر و عندى راحة كل يوم من 12 ل 1 و بخلص الساعة 6 و ساكن فى الزهراء . شوف لو حبيت تيجى افرجك على العربية و تجربها و اوريك التقارير اللى اتعملت عن العربية فى البنزينة و مراكز الصيانة و اقولك انا شخصيا انطباعى عنها ايه و بشتكى منها فى ايه انا تحت امرك و كمان عشان تحس فى فرق بينها و بين اللى شوفته ولا لأ. و هابعتلك رقمى على الخاص .

انا فكرت فى الزيرو كتير بس اللى منعنى عنه انى هافضل اقسط مدة طويلة و غالبا هاركب كورى و انا مش بحبه قوى و احب اركب يايانى مستعمل حالته كويسة احسنلى . بس النيسان صنى الجديدة (الشكل الجديد) متهيألى ممكن تبقى كويسة رغم ان فى ناس مش بتشكر فيها قوى بس انا بحس انها شبه التيدا جدا ولما بتفرج على النت على التيدا بلاقيها برة اسمها فيرسا و الشكل القديم منها هو بتاعى و الجديد منها هو الصنى الشكل الجديد مش عارف ازاى.

على كل حال ربنا يوفقك و انا تحت امرك