تغيير موتور طرمبة بنزين - اكسنت 2011 بالتفصيل الممل
بسم الله الرحمن الرحيم سعيد جدا ان فيه ناس بدأت تتفاعل وتشتغل بأيدها والنهارده هانغير موتور طرمبة البنزين بأيدينا وكالمعتاد اى شغل حضرتك هاتعمله – هاتعمله على مسئوليتك الشخصيه – انا غير مسئول نهائيا فى حالة وجود اى معلومه خاطئه فى الموضوع بتاعى نبدء على بركة الله الشغل فى عربيه نيو أكسنت موديل 2011 – ومتهيألى ان نفس موتور طرمبة البنزين هو المستخدم فى الالنترا والماتريكس وتقريبا اغلب عربيات هيونداى الاعراض اللى خلتنى اغير موتور طلمبة البنزين – الموتور بيفصل – العربيه سحبها زى الزفت – اقصى سرعه 120 بالعافيه سعر الشراء - 140 جنيه من البنا - التوفيقيه يفضل قبل تغيير موتور الطلمبه ان العربيه متكونش متفوله – ويا ريت لو كان فيه 5 أو 6 لتر بنزين بالكتير نبدأ بسم الله الرحمن الرحيم ونفصل كابل البطاريه السالب من العربيه a (2) http://s4.postimg.org/dn75ri1q5/a_2.jpg
بعد كده هانروح على شنطة العربيه زى الشاطرين – هانلاقى جواها حاجه كده لونها احمر أسمها الطفايه بتاعت الحريق – نخليها جنبنا لدواعى الامان نشيل الكنبه الخلفيه هنلاقى المنظر ده a (3) http://s29.postimg.org/5a7tgzmzb/a_3.jpg
هاتفك الجاكات بتعتك بهدوء ويفضل انك تصور قبل ما تعمل اى حاجه علشان لو نسيت يبقى عندك مرجع هام جداااااااااااااااااااا واغلب الصنايعيه مش بتعمل كده نظف كويس قبل ما تفك أى حاجه – أول لما تفك الخراطيم هاتلاقى شوية بنزين وقعوا على مكان الطرمبه – افضل وزع البنزين زى ما تكون بترش على الطلمبه وبعدها نظف تانى – كل ده وانت لسه مفكتش ولا مسمار بهدوء فك المسامير – شيل الحلقه السوداء الكبيره اللى بتثبت الطرمبه على جسم التانك – حرك الطرمبه شمال ويمين لغاية لما تطلعها - وطلعها بالراحه علشان متبوظش العوامه بتاعت البنزين (اللى بتديك القراءه بتاعت التانك) الطرمبه بقت فى ايدك وشكلها كده a (5) http://s4.postimg.org/pev12awcd/a_5.jpg
زى الشاطر بمفك عاده صغير هتفك الكلبسات اللى تحت زى اللى فى الصوره اللى تحت ديه عند الاسهم الحمراء – هاتلاقى جسم الموتور بقى باين تمسكه بأيدك وتسحبه بالراحه لتحت مسافه صغيره – هاتلاقى الفيشه بتاعت الكهرباء بانت عند السهم الازرق كده تفكها وتطلع الموتور a (5-2) http://s4.postimg.org/8gw0ggmyl/a_5_2.jpg
أرجع ركب كل حاجه تانى مكانها
مبروك عليك تسارع رائع – سرعه قصوى أعلى – هدوء نسبى فى صوت الموتور
وطبعا انتوا عارفين ان مفيش حاجه ببلاش فى الدنيا ديه
اذا كنت استفدت بأى حاجه من الشغل اللى انا عملته ده – أسألك الدعاء لوالدى بالرحمه ولوالدتى بالشفاء ---- طبعا عايز تفتكرنى انا وعيالى بأى حاجه اهو كله فى ميزان حساناتك