الموضوع: عمره فتيس

السلام عليكم احبتى فى الله

مبدئيا بدأت المشكله عندما نويت ان اغير اللانوس بعربيه المانى محترمه
الكله قالى على الاوكتافيا a5 وكنت عاوز اجيب لانسر زيرو بس النصيب جبت اوكتافيا a5 موديل 2007
وبعد مجبتها بشهر واحد ظهرت المشاكل
وانا على الطريق الزراعى دخلت افول من بنزينه وخلصت ادوس بنزين عداد rpm يعلى ومفيش عزم كلمت الميكانيكى قالى عاوزه فتيس طب قلتله الحل ايه دلوقتى قالى امشى عليها براحه وهتهالى
وبعدين قالى الفتيس استيراد حيعمل 17 ألف جنيه كنت لسه جايب العربيه ومعيش المبلغ ده
قلتله فى حل تانى قالى عمره فتيس وحيرجع احسن من الاستيراد واحسن من الجديد
طب حيتكلف كام قالى 7 الاف جنيه
قولت اهون وبعد معمل الفتيس لقيته ناعم وسلس حمدت ربنا
وبعد 3 شهور كنت راجع من السفر لقيت العربيه سخنت والأربه المياه مطحنه ( يعنى فيها ميه على زيت فتيس) والفتيس معملش 3 ألاف كيلو
رحت تانى للميكانيكى ومع العمل ان الميكانيكى ده تخصص فتايس جتا واوكتافيا وباسات
المهم قالى مستحيل يكون فى حاجه فى التأفيل قالى المشكله من مبرد الفتيس وجابلى واحد استعمال بــ 600 جنيه وبعد التركيب حطينا زيت بــ 1200 جنيه
وطلعنا نجرب ... العربيه كانت طياره وبعد 3 كيلو العربيه مبتسحبش تانى
رحنا الورشه ونزلنا الزيت لقينا الزيت حل ( اى اصبح فى سيوله المياه)
قالى ده كده بقا فيه سده فى مجرى الزيت ... خلع عليه البلوف وحطها فى جاز ابيض ونضف الفتيس وهو راكب بكمبروسر هواء وغسله بجاز ابيض وسابه ينشف
المهم جبنا زيت تانى بــ 1200 جنيه وجربنا وعملت نفس المشكله
قالى ده حتلاقى طرمبه الزيت هى الى مبترفعوش فالزيت بيتحرق
جابلى طرمبه بـ 800 جنيه وحط زيت بــ 1200 جنيه
ولسه حيجرب
وهو قالى المره دى ان شاء الله حتظبط

انا عاوز اسأل أهل الخبره هل المشكله فى التأفيل ولا المشكله فين وايه الى بيخلى الزيت يتحرق
ملحوظه : فيه سمره فى كرتيره الزيت لونها اسود وعمله زى الطينه بتتكون بعد الزيت ميتحرق
العربيه بعد منحط الزيت الجديد بتبقى كويسه جدا وبتنقل وبتجيب سرعه بس بتقطع ساعات وده عشان الزيت بيحضر على حسب كلامه وبعدين فجأه بيتحرق وعزم الفتيس بيروح والشاشه فى العربيه بتسود ( يعنى بتظلل على كل الخيارات )