الموضوع: تحذير هام جدا

الاخوة الكرام

لدي تحذير هام جدا ارجو نقله في كل المنتديات الفرعيه و ابلاغه لكل من حولك ( اخواتك - اصحابك - جيرانك ) و كل من يمتلك سياره.

في هذة الايام الجميله اصبح الضمير منعدم و البلطجيه و الصييع كتييير جدا و سوف احكلي لكم ما حدث :

منذ حوالي شهرين كان الكاوتش عندي مهوي شويه قولت ازود هوا ( عادي يعني العربيه مش باخرج بيها كتير و لازم تريح كل اسبوعين كده ) و الحمد لله علي كل حال عديت علي واحد ( منه لله و حسبي الله و نعم الوكيل فيه ) في شارع البحر الاعظم بعد اشاره شارع المدبح علي اليمين دخلت عليه و طلبت تزويد هوا قالي ايه دا يا باشا كانت فين الحادثة دي اكسر العجل عليا كده

رديت و قولتله حادثة ايه - قالي العجل مليان قزاز و راح جايب قزازة اللي فيها صابون عشان يوريني ان العجله مليانه اخرام - ابص الاقي فقاقيع هوا من كل ناحيه - الله الله الله ايه دا ؟؟ دا انا في الضياع بقي ؟

المهم النصاب لازم ياخدك في دوكه زي ما بيقولوا و ما يخليكش تلحق تفكر و هوب يروح جايب الخوابير و يروح مخبور الفردة كام يا حاج خبور 14 خبور لدرجه اني قولتله بس بس كفايه انت بوظت العجله و طلب كام بقي 130 جنيه ( يا نهارك مش فايت انا كنت جيبت عجله مستعمله احسن بقي علي كده

و طبعا اتدبست في 80 مع الخناااااااق و الزعيق

و فضلت احسبن عليه طول ما انا ماشي مش بس عشان انه نصب عليا و سرقني في فلوس لا
دا بووووووظ الفرد منه لله


المهم بقي من كام يوم مسافر اسكندريه و العجله مهويه برضه روحت محود علي واحد في اخر شارع فيصل تفتكروا عمل ايه ؟

قالي العجله دي فيها خرم

انا سالته الاول هي علي ضغط كام راح حاطط العداد في لحظه و علي البلف و سابه بسرعه و قالي يا نهار الوان دي علي 15 و قولتله هي المفروض علي كام ؟ قالي 30 و راح جايب برضه الزجاجه اللعينه و حط عليها و قال العجله مخرومه اعملهالك و هي واقفه و عندي خابور عاده و خابور بمادة ( نفس التمثليه السابقه ) قولتله لا فكها و شوفها في الحوض قالي لا اعملها و هي واقفه و اصر اصرارا

انا بقي خلاص ( علي راي ابو الليف ) مبقاش عندي ثقه في حد قولتله خلاص شكرا
قالي طب لو عندك الاستبن اركبهولك بدل الفرده دي قولتله لالالالالا شككككككككككرررررررراا

و روحت و اخد ديلي في سناني و قولت يا فكيك

اللي احنا مانعرفوش بقي بعد البحث و التحري انهم بيحطوا ميه نار مخففه في الزجاجه اللعينه دي علي صابون سائل فلما تحطها علي الكاوتش تتفاعل و تعمل فقاقيع كانها مخرومه بالظبط

المهم روحت اسكندريه و جيت و ركنت بقالي اسبوع و الحمد لله العجله زي الفل ما شاء الله
يعني معني كده انه نصاب برضه

الدروس المستفادة :
1- اتاكد دايما ان الاستبن تمام ( يعني كل اسبوعين زوده للاحتياط )

2- اتعلم من اخطاء الاخرين اللي ادبسوا زي حالاتي و يكون ليك نظره في الصنايعي شكله محترم و الا بلطجي ( من كلامه - لهجته - نظرة عينيه " حلوة نظره عينيه دي صح ؟ " )

3- لو حد عمل فيك نصبه القزازة دي اهرب بسرعه

4- ما تتعاملش الا مع حد تعرفه و تثق فيه

5 - لو فكها لازم يحطها في الحوض و تتاكد ان فعلا فيها مسمار بالمتابعه معاه و تشوفه بيعمل ايه و بلاش خوابر دي خالص لانها بتفرق الاسلاك فبتضعف الكاوتش

اخيرا
ارجوكم ابلاغ الجميع
و ربنا يحفظنا جميعا

اخيكم
خالد

الاخوة الكرام

اشكر كل من دخل و قرأ الموضوع و اعزي نفسي و اياكم في اللي اتعمل فينا بان اللي حصل دا خير و ربنا ان شاء مش بيضيع حق حد مانعرفش يمكن ذنوب ربنا بيكفرها عننا او حسنات ربنا يشيلهالنا

و اشكركم جميعا علي فكرة الكمبروسور المحمول و ارائكم و مشاركتم

كل ما اطلبه هو تحذير كل من تعرفه بالنصابيه و النصابيين

و ياريت يكون فيه موضوع مثبت في المنتدي العام تحت عنوان " تجربتي "

و كل اللي يحصله حاجه سواء حلوة او وحشه لا قدر الله يشاركنا بيها او حتي تجربه خاصة

ارجو من المشرفين دراسه الموضوع

و لكم جزيل الشكر

اخيكم
خالد