السلام عليكم اعضاء المنتدى الكرام
هذه اول مشاركه لى معكم على المنتدى
كنت عايز اخد رايكم بشكل عام بخصوص باسات موديل 1999 موتور 1600 سي سي اوتوماتيك
و شكرا لكم
عرض للطباعة
السلام عليكم اعضاء المنتدى الكرام
هذه اول مشاركه لى معكم على المنتدى
كنت عايز اخد رايكم بشكل عام بخصوص باسات موديل 1999 موتور 1600 سي سي اوتوماتيك
و شكرا لكم
السلام عليكم اخي الفاضل شرفت ونورت المنتدى وقسم الفولكس بالنسبه للباسات موديل 99 أو b5 تعتبر من أجود سيارات فولكس فاجن كخامات وتصميم وتقفيل وثبات مميزاتها كتير وعوامل الامان فيها عاليه اوى عربيه تقيله صاجها انشف من الادا فيها abs ebd وايرباجز عربيه واسعه جدا من جوه وشنطها كبيره جدا اعطالها قليله اوى تكاد لا تذكر قطع غيارها رخيصة جدا جديد واستيراد ومعمره اوى يعني انا معايا العربيه في حاجات بتاعت الفبريكه لسه مغيرها السنه دي زي مساعدين خلفي طنابير العربيه بس فيها حاجتين أولا عفشتها الاماميه مالتي لينك على 8 مقصات ألومنيوم فطبعا عفشه معقدة شويه وال 8 مقصات دول غاليين شويه يعني يعملوا في حدود 4000 ج فيبي ألماني واستيراد 1200 ج في ناس بيقولو عليها مشكله وغاليه بس لو شفت هتلاقيها رخيصة بالنسبه لكونها عربيه فخمه وعلى فكره العفشه دي بتنزل في الأودي A4 - A6 لغاية دلوقتي وبتنزل في البي أم الفئه الخامسه من 98 والعفشه ديبتدي ثثبات مالوش حل للعربية وبالذات في الملفات والحاجة التانيه أن صيانتها عاوزه واحد فاهمها يعني ميكانيكى فولكس ويكون بيفهم فيها مش بصمجي وبالنسبه لفتيسها ممتاز من هنا لبكره الصبح بشرط تغيير الزيت والفلتر في معادهم كل 60000 كم موتورها ال 1600 مش قايم بيها في الطلعه يعني موتور كسلان في طلعته بس بعد ال 100 بيتحول وتقدر بكل سهولة تجيب 200 فراملها سحر وخيال حاجه كده ماتتحكيش غير لما تجربها بنفسك واللي معاه العربيه دى عارف يعني ايه فراملها من الاخر كده عربيه محترمة وثبات وقوه وأمان وركوبه وفخمه وتقدر تصرف عليها ماتتعبكش في مصاريف وطبعا أهم حاجه الحاله ولو ربنا كرمك وركبتها هتعرف أن العربيه دى مش سايبين حاجه إلا وعاملينها كحفاظ للعربية يعني مثلا العربيه دى الوحيده في كل عربيات فولكس لحاد وقتنا هذا اللي نزلت بحماية للابواب من بره مطاط وعتب فبر من جوه مغطى عتب العربيه الاكصدام الخلفي بتاعها الشاسيه اتخن من قضيب القطر ومتحمل على مساعدين لامتصاص الصدمات في حاله الصدامات الخلفيه العربيه دى اول عربيه تنزل في فولكس فاجن بكنترولات أبواب لمنع السرقه يعني مجرد ماتقفل العربيه بالريموت الأبواب والشنطه مش هيتفتحو خالص إلا بالريموت أو مفتاح العربيه +أن فيها ايموبليزر مفتاح مشفر وفعلا العربيه دى من عربيات فولكس القليل ماتلاقي فيها أعطال وبصراحه العربيه دى متحسهاش فولكس فاجن اكتر منها اودى لأن فعلا التحفه دي صناعه وابتكار الأودي والفولكس صممت الشكل الخارجي فقط وأخيرا ربنا يوفقك للاصلح ويكرمك بحاجه نضيفه وأي استفسار انا في الخدمه
شكرا لرد حضرتك و مشاركتك
لاشكر على واجب
طب معلش سؤال اخير لو تسمح لى
هل يوجد منها هذا الموديل فئات؟؟؟
لانى اثناء بحثى وجدت نوعين من عجله القياده
و نوعين من التكييف بكره و بجهاز
و شكرا
لا بص هوا كل اللي نزل مصر تقريبا فئه واحده بس فيه تكيف عاده ببكر وتكييف تتش ده اللي ممكن تلاقيه مختلف لكن عجل القياده اللي العربيات نزلت بيه مصر اللي هوا الايرباج الكبير والعجله رباعية شبه بتاعت الاوكتافيا a4 ولكن الثلاثيه ممكن تكون مغيره عادي ومفيهاش مشكله وممكن برضه بتلاقي عربيات معروضه مواصفات تانيه وعاليه دي غالبا بتكون ياما كانت معاقين وفكت حظر أو وارد الخارج ومدفوعلها جمرك ومترخصه عادي في مصر واي سؤال انا في الخدمه
تمام
طيب دلوقتى ان شاء الله انا ناوى اشترى واحده...
تنصحنى بايه و اركز على ايه و انا بشتريها علما انى كشفت عليها و الموتور و الفتيس و العفشه بحاله جيده جدا...
و شكرا
تمام أهم حاجه فى العربيه دى كشف موتور وفتيس والعفشه وبالأخص المقصات لأنهم غاليين شويه زي ماقولتلك وطبعا الكشف عن أساسيات العربيه ولو كل ده تمام اعمل سكان على الأعطال للعربية علشان تكون متطمن وان شاء الله ربنا يكرمك بيها ويديك خيرها ويكفيك شرها والعربيه دي ممتازه وهتستمتع بيها أن شاء الله وأي استفسار انا في الخدمه
طب تنصحنى قدام شويه اغير مكنة العربيه و احط 1800 وﻻ اكتفى بموتور بلدها ال1600
و كمان ﻻحظت ان العربيه محتاجه رشة نضافه .. هل يوجد فعﻻ رش المانى اصلى وﻻ مجرد كﻻم
و شكرا
بص ياسيدي لو انت مرتاح مع ال 1600 ومش عاوز شد وجرى يبقى مالوش لازمه ال 1800 وسيب ال 1600 لحاد عمره الافتراضي مايخلص وسقط ال 1800 العادى مش التربو وبالنسبه للرش فيه فعلا رش ببويه ماركة اسكينيز ألماني بس غاليه شويه مقابل هتاخد حاجه محترمة زي بويه الفبريكه بس اهم حاجه تروح لحد انت عارفه أو صديق ليك أتعامل معاه علشان الثقه وعلشان فيه اسكينيز مضروب وبيقولو أصلي علشان كده لازم واحد ثقه وربنا يوفقك للاصلح وأي استفسار انا في الخدمه
هل يوجد طريقه اعرف بيها قطع الغيار الاصليه من المضروبه؟؟
و هل يوجد اماكن معتمده لشرائها خرج القاهره؟؟
و شكرا لك
حتى حاجتها المضروبه حلوة و معمرة يعنى انا من سنتين جبت تيل فرامل تركى و التاجر قالى خدو و على ضمانتى الشخصيه و كان ب 80 جنيه و كان فى نوع تانى ب 130 و ب 230 و ب 350 الاصلى و مش اصلى طبعا ... انا جبت ابو 80 جنيه و شغال معايا زى الفل ..... العربيه دى حاجتها متقلقش منها .... و دلوقتى بيعتبروها موديل قديم و حاجتها رخصت ..... انتا لو ركبت العربيه دى مش هتفكر تركب زيرو لانها خيال على الطريق قوة و اعتماديه و فرامل فرامل فرامل مفيش حاجه اسمها تزحف ... انتا بتدوس بتقف ازاى معرفش ..... سحبها قبل ال 100 مش ضعيف و لا قوى او مميز .... عادى بس بعد ال 100 اعوذ بالله العربيه بتنط مش بتسحب و يا سلام لو كيك داون ... انا بحس ان العربيه النص اللى قدام هيسيب النص اللى ورا و يسبقو من عزم السحب ..... عربيه عايزة طريق ..... لا مهبط طائرات ...... انا كان معايا 98 و الوقتى الاودى 98 و العربيتين واحد صيانتها سهله و صعبه ؟؟؟؟؟ سهله جدا للى فاهم و صعبه على اللى بيالف كتيير .... اشترى و متترددش و لو عايز تسال على اى قطعه غيار اسأل الموضوع سهل
شكرا لافادة حضرتك ليا فى هذا الموضوع
استفسار اخر....
هل تابلوه العدادات الخاص بالعربيه فيه شاشة بيان ولا لا...
بحثت على النت لقيت فيديوهات بتقول ان الموديل ده فيه و فيديوهات اخرى لا
و دى صوره بس مش واضحه للاسف للجزء اللى بساله عنه " بين عداد السرعه و عداد RPM "
http://im77.gulfup.com/b1Quks.jpg
عربية تحفة بمعنى الكلمة والعداد مفهوش شاشة اعطال
بص يا باشا العداد اللي فيه شاشة أعطال ده نزل في العربيات المواصفات الأوروبي وطبعا مفيش في مصر غير وارد الخارج اللي فيها العداد ده وفي المواتير فوق ال 1600 الاستاندر يعني مش متعدله ونزل في الباسات ال b5.5 اللي هيا فيس لفت موديل من 2001 - 2005 المواتير ال 2000 سي سي الاستوك برضه مش متعدله ودي نزل منها مصر وكيل وانا إن شاء الله ببحث في تعديل عداد عربيتي للعداد أبو شاشة بس هتأكد وهبقي اعمل موضوع بيه أن شاء الله
كان عندى استفسار بخصوص وظائف القراءات الظاهره على العدادات كما هو مبين بالشكل
http://cdn.top4top.net/i_4517d18a781.jpg
و شكرا لكم
بص يا باشا
1 - عداد الكيلومترات بتاع العربيه ومكتوب فيها العربيه عامله كام كيلو وباين أنها عامله 154000كم
2 - عداد رحلات اللي بيتصفر لو عايز تحسب مسافه مشيتها بالعربيه من مكان إلى آخر والشاشه كلها بيطلع فيها كلمه service لو انت ظبطت عداد الصيانه على مثلا تغير سير الكاتينه وزيت الفتيس
3 - مفتاح تصفير عداد الرحلات وتصفير السيرفيس
4 - شاشة بتبين نقلات الفتيس الاتوماتيك أو دراع السليكتور محطوط على اني نقله أو غيار
5-مفتاح ظبط ساعه العربيه الديجيتال ودي بتبقى موجوده في الشاشه اللي جنبه اللي هيا رقم 6
6 - شاشة الساعه بتاعت العربيه واللي مكتوب فيها ده خاص بمثبت السرعه ضبط مثبت السرعه وطبعا مثبت السرعه مش موجود في كل العربيات بس الصوره دي عربيه فيها مثبت سرعه وكمان الشاشه دي بتبين عدادين كمان للرحلات بس برضه مش في كل العربيات
ويارب أكون افدتك وأي استفسار انا في الخدمه
والله يا باشا انت كتر الف خير معلومات زي الفل
ممكن حضرتك ترد على رسالتى على الخاص؟؟؟
و شكرا
السلام عليكم
بالنسبة للعداد ابو شاشة ده بيشتغل عادى عالعربية اللى من غير شاشة حتى لو كانت 1600 بس هتغير حاجتين
دراع المساحات وتجيب واحد فيه زرار تقليب الشاشة .بيقولو عليه مالتى.
كونترول الموتور لو العربية 97 و98 ﻻن العدادات اللى بشاشة قليلة فىالسنتين دول انما من 99 هيشتغل عليها عداد 2005 ﻻن الكونترول واحد
انا جيت اعملها بس مانفعش عشان انا98 هيركب عادى 2005 بس rpm مش هيشتغل
لا ياباشا عادي هي في الأساس الشاشه بتاعت الساعه الديجيتال بيزيد عليها لو فيها مثبت بتظبط منه السرعه وتظهر على الشاشه دي + لو الدراع بتاع النور فيه زرار لضبط الرحلات بتظبط منه 2 رحله وتعرف مشيت كام كيلو بس زي ماقولتلك أساس الشاشه دي بتظهر فيها ساعه الديجيتال
هل يوجد مواقع فيها شرح لاجزاء السياره من الداخل زى دراع النور و الاشارات و الحاجات دى و كمان الاجزاء الداخليه مع الموتور و الإربه
و شكرا
للأسف انا دوخت علىمواقع فيها كتالوجات للعربيه بس ملاقيتش كله كتالوجات بفلوس وعلى ebay بس اول ماهلاقي أن شاءالله هجيب الرابط على موضوع رابطه مالكي الباسات ولو انت عاوز تستفسر على أي حاجه مش فاهمها في العربيه قوللي وانا اشرحهالك إن شاء الله وربنا يكرمك بيها ويكفيك شرها ويديك خيرها
سلام عليكم
انا بحثت شويه و دورت على النت و وصلت لحاجتين :-
1- كتالوج لمكونات العربيه من جوا و برا و ايضاح بسيط لبعض الاعطال و اسبابها و اتمنى يكون فعلا مفيد و اسمه VW Passat B5 Self Study Guide بس مكتوب للكتاب ف الاول انه لباسات 97
لنك التحميل المباشر من رفعى الخاص اهو
https://www.dropbox.com/s/hauoc193oo...uide_SP191.pdf
2- موقع روسي فيه كل مايلزم فى جيل ال B5 من الموتور الى الجسم الخارجى الى العفشه ...الخ
اللنك
شكرا علىمجهوداتك وانا عارف ال self sstudy لأنه عندي بس مش بيشرح كل حاجه والموقع الروسي كويس بس انا بدور على كتالوج اسمه Hynes للباسات ده شرح ازاى تفك وتركب العربيه كلها وللأسف ده اللي بفلوس وفيه واحد تاني اسمه Bentley زيه برضه بفلوس فدول لو جبتهم هيبقوا من الاخر
سلام عليكم
لو حبيت دلوقتى اجيب جنط للعربيه هل فى مواصفات خاصه له قبل الشراء ولا اجيب اى حاجه و خلاص؟؟؟
بص ياسيدي أولا عندك الجنط اللي راكب مقاس كام علشان لو مش هتغير كاوتش وثانيا العربيه عموما بتستحمل لغايةجنط 20" عادي بس علشان احنا في مصر مش هينفع اكتر من 16" عموما انا برشحلك تنزل تجيب طقم جنط فولكس 16 " استيراد اأصلي خمسه خرم ده أفضل من الجديد لأنه أصلي طبعا الطقم بيبان نضافته بالعين االمجردة وتجيبهم طبعا من بورسعيد عندك هتلاقي الطقم في حدود 2000 ج وانت وشطارتك بس اهم حاجه تجيب الأصلي استيراد محدش يقولك تايواني ولا صيني ولا ألماني هوا الأصلي الاستيراد أفضل اختيار
شكرا لحضرتك
كنت عايز كمان اسال هل يوجد وسائل لحماية العربيه من السرقه او سرقة اى شئ فيها؟؟
بص ياسيدي الباسات دي كانت أول جيل من فولكس فاجن يصعب سرقته لأن فيها 2 وسيله امان صعب جدا اختراقها أولا المفتاح المشفر أو الايموبلايزر وده العربيه مش بتدور غير بالمفتاح بتاعها ومفتاح العربيه طبعا خريطه ومش أي حد بيطلع عليه طبعا غير الشفرة وطبعا موضوع السلكين ده درب من الخيال وثانيا العربيه لما بتقفلها بالمفتاح في لمبه جنب مسوجر باب السواق لو اللمبةدي نورت وتطفي متواصل احمر كده االأبواب عملت لوك والشنطه وهات اتخن واحد في مصر يعرف يفتح العربيه لأنها كده بئت زي الخزنه الحديد وبالسلامه ممكن انت تزود معاهم جهازاإنذار زي مانا عامل وبكده تبقى أصعب عربيه ممكن تتسرق هي ومجموعة فولكس عموما والألماني كله وبس يا سيدي
تمام
الحمد لله انا لسه جايب العربيه حالا و ما شاء الله عليها زى الفل و سحبها تمام
كان ليا سؤالين
الاول هل لحزام الامان طريقه لاستخدامه لانى استخدمته و البكره مرجعتوش تانى
تانى حاجه لمبة ال abs منوره دائما هل ده معناه وجود مشكله؟؟
و شكرا
بالنسبه للسؤال الأول طالما البكره مارجعتوش تاني يبقى بايظ ومحتاج يتغير
والسؤال الثاني طبعا في مشكله في منظومة ال abs طالما االلمبة منوره ولازم تعمل سكان على العربيه وعلى منظومة ال abs وهتلاقي العطل ببإذن الله وفي الغالب هتلاقيه حساس عجله بايظ وغالبا برضه هتلاقيه واحد من اللي ادام يمين أو شمال وماتخفش تمنه 100 ج استيراد وألف مبروك على العربيه وربنا يكفيك شرها ويديك خيرها وأي استفسار انا في الخدمه
كمان كان فى شوية شغل فى التابلوه بشكل عام و كنت عايز اعرف متوسط اسعارها و هى :-
1- صندوق التابلوه فيه مفصله مكسوره ولكن احكام اغلاقها كويس
2- الريش البلاستيك بتاعة احدى فتحات التكييف مكسوره
3- الكفر الخاص بالجزء بتاع الولاعه مخلوع
4- الجزء الخاص بحامل المشروبات لا يخرج تقريبا مشكله ف السوسته
5- بكرة رجوع حزام الامان فيها مشكله برضو
6- لاحظت عند استخدام حزام الامان مفيش لمبه بيان اشتغلت معاه
و كمان لاحظت ان فى هزه بسيطه ف الموتور عند بداية تشغيل التكييف هل ده طبيعي ولا فى مشكله؟؟
و شكرا
الف مبروك العربية
وربن يديك خيرها ويكفيك شرها
ومتابع لانى شكلى هحصلك :)
ممكن تقولنا جبت العربية بكام ؟؟؟
وكشفت عليها فين ؟
العربيه جبتها ب 70 الف...
و انا من بورسعيد و كشفت عليها عند شركه اسمها الالمانيه معاها توكيل bosch
و ربنا يكرمك و يكتب لك الخير
كمان كان فى شوية شغل فى التابلوه بشكل عام و كنت عايز اعرف متوسط اسعارها و هى :-
1- صندوق التابلوه فيه مفصله مكسوره ولكن احكام اغلاقها كويس
2- الريش البلاستيك بتاعة احدى فتحات التكييف مكسوره
3- الكفر الخاص بالجزء بتاع الولاعه مخلوع
4- الجزء الخاص بحامل المشروبات لا يخرج تقريبا مشكله ف السوسته
5- بكرة رجوع حزام الامان فيها مشكله برضو
6- لاحظت عند استخدام حزام الامان مفيش لمبه بيان اشتغلت معاه
و كمان لاحظت ان فى هزه بسيطه ف الموتور عند بداية تشغيل التكييف هل ده طبيعي ولا فى مشكله؟؟
و شكرا
النهارده روحت لمركز متخصص و كشفت على العربيه بالكامل كمبيوتر و عفشه و موتور و سمكره كان الوضع كالتالى :-
1- وجود مشكله فى حساس ال abs الفرده قدام يمين " اتكلمنا على النقطه دى قبل كده "
2- السمكره تمام بدهان بلادها مع وجود خرابيش بسيطه طبعا
3- الموتور اتقال لى ان فى شامبر بيسرب زيت بنسبه بسيطه و قالى ده ممكن يكون بسبب ردائة الزيت و الفلتر قبل كده بس حاسس من كلامه انه عايز يفتح شغل و خلاص
4- العفشه قالى طبعا اول حاجه محتاج طقم مقصات لان فى جلبه متاكله و ده كلام اتقالى ان اى عفشجي هيقول كده
بالاضافه انه قالى ان فى تسريب ميه ممكن يكون طبه مفكوكه بس برضو كلامه حاسس انه عايز يفتح شغل و خلاص
ف كنت عايز اعرف مدى صحة الكلام ده هل له اعراض معينه عشان يبقى كلامهم صح ولا ايه النظام
و شكرا