تقييم متواضع لشيفروليه افيو
اولا العربيه موديل 2009 مانيوال كورى وليست التجميع المصرى .
ثانيا العربيه خاصه بحمايا واشتريناها فى شهر اغسطس اللى فات وعامله 1200 كم حتى الان .
ثالثا بالنسبه للشكل الخارجى وكما هو مبين فى الكاتالوج الخاص بالعربيه طول العربيه حوالى 4 متر و31 سنتيمتر وعرضها متر و71 سنتيمتر والارتفاع الاجمالى اللى هوا من اخر نقطه فى السقف لغايه الارض حوالى متر ونصف تقريبا .
رابعا بالنسبه للشكل الخارجى فطبعا شكلها مميز من بره وتعرفها وهيا جايه من بعيد والفوانيس الاماميه كريستال شفاف شكلهم احلى بكتير من الشكل القديم بتاعها والفوانيس الخلفيه كبيره واضائتها قويه وبرضه شكلها احلى من فوانيس الشكل اللى قبلها والاكصدام الخلفى بارز لبره من تحت الفوانيس الخلفيه وبطول الشنطه حتى ان ممكن واحد يقعد عليه وطبعا كده الواحد بعد اسبوعين تلاته يروح يشترى اكصدام جديد بدل اللى هايتكسر من قعده الناس عليه :D,بالنسبه للمقابض فهيا فبر وشكلها مش حلو كان المفروض نزلوها نيكل او نوع تانى انضف وملمسها خشن مش ناعم ومش بتيجى بلون العربيه هيا والمرايات ,العربيه وانتا واقف جنبها بره تحس انها عاليه جدااااااااااا بشكل ينرفز وهيا فعلا بسبب كده مابتحكش فى اى مطب نهائى .
خامسا بالنسبه للشكل الداخلى فالتابلوه يعتبر كويس نوعا ما والعدادات شكلها حلو واضائتها بالليل شكلها جميل بس فيه مشكله جامده جدااا فى تصميم العدادات وتصميم الدريكسيون لان طوال القامه زى حالاتى هيلاقوا ان الدركسيون مخبى حوالى نصف العدادات يعنى مش هاتشوف الاشارات يمين وشمال ومش هاتشوف عداد السرعه عامل كام من بعد علامه 80 كم ومش هاتشوف عداد ال الار بى ام بعد علامه ال 2000 لفه وطبعا مفيش غير حل واحد وهوا انك توطى راسك كل شويه علشان تعرف انت ماشى على سرعه كام وعلشان تشوف انت مدى اشاره ولا لا وده عيب كبير جداا فى اى عربيه :funny34d:وطبعا وللاسف الدريكسيون ثابت فى مكانه وماينفعش انك تغير وضعيته وملمسه سىء واول ما تشترى العربيه لازم تشترى غطاء جلد للدريكسيون علشان ايدك تستريح وبالمثل الكلام ينطبق على الفتيس اللى هوا كمان ملمسه خشن ومش مقبول وبالنظر الى التابلوه هتلاقى انهم حاطين مكان اشاره الانتظار فى مكان غبى جدااا بعيد عن السائق وجنب الراكب الامامى وكان من الافضل انهم يحطوها تحت فتحات التكييف اللى فى النصف وبالنسبه للتابلوه فالدرج مش كبير ومايخدش حاجات كتيره وتحس انه ضيق وتحت التكييف فى الكونسول الاوسط فتحه صغيره كده علشان تحط فيها الموبايل او النظاره بس للاسف مش هاتستخدمها اذا كنت فاتح حامل المشروبات اللى تحت التكييف يعنى هما بيدوك اختيار واحد فى العربيه ياتشرب حاجه يا تعين الموبايل او النظاره وبالنسبه لابعاد العربيه فهيا صعب انك تحفظها بسرعه وهاتخد معاك وقت علشان طبعا مش هاتشوف الكبوت ولا الشنطه خالص ولما جيت اجيبلها سبويلر للشنطه علشان نعرف نحدد ابعادها من ورا لقيت للاسف مفيش ليها اسبويلر على مقاسه لان طول الشنطه قصير جدا وبالنسبه لمساحات التخزين فى البابين اللى قدام مقبوله وواسعه نوعا ما وبالنسبه للزجاج الكهربى فمفيش غير اتنين بس قدام واللى ورا عاده وده طبعا عيب علشان العربيه سعرها عالى ومش رخيص ... نيجى بقى للكراسى وللاسف كرسى السائق تصميمه سىء جداا والظهر بتاعه واقف على طول ومش مريح وتحس انه عالى عن باقى العربيه كده وانت سايق ولما تكون راجع من مشوار سفر طويل تأكد وبدون شك ان ظهرك هيوجعك جدااا ومش هتبقى مستريح وبالنسبه للكنبه الخلفيه فهيا عرضها صغير نوعا ما علشان يوفروا مساحه للرجلين وهيا فعلا العربيه واسعه من وراء كان اللى راكب وراء طويل او مليان شويه هيبقى قاعد مستريح بس برضه ضهر الكنبه واقف ومش مريح .
سادسا بالنسبه للتكييف فهوا بصراحه قوى جدااا وشكله جميل وهوا بيحتاج وقت شويه ان يسقع العربيه كلها بس فى المجمل كويس وفيه اربع فتحات كبار فى التابلوه للتكييف اتنين فى النصف وواحده على اليمين وواحده على الشمال ولما يكون شغال وانت سايق على الطريق ماتحسش انه قلل من سحب العربيه قوى وبالنسبه للكاسيت فالعربيه جاى معاها كاسيت اصلى مدمج فى التابلوه شكله شيك جدااا والتعامل معاه سهل وبسيط والصوت بتاعى نقى وفيه اربع سماعات اتنين فى البابين اللى قدام واتنين فى الرف الخلفى.
سابعا بالنسبه للاداء على الطريق فالعربيه سحبها تقيل شويه ولما تيجى تنقل السرعات تحس ان فيه عضه كده فى النقل ومش ناعمه فى النقل والعربيه لما بتوصل ل 120 تحس انها بتترج ومش ثابته و العفشه ناشفه جداااا وتحس باقل حاجه ولما تكون ماشى فى شارع مكسر تحس انك راكب عربيه ملاهى.
ثامنا المشاكل اللى ظهرت فى العربيه : العربيه عند حوالى 500 كم لقيت صوت الموتور بيعلى فجأه والار بى ام بيوصل ل 5000 لفه والعربيه واقفه وبتاكل بنزين جامد ولقيت فيه ترشيح زيت على الماتور وعلى فلتر الهواء من بره فرحت موديها لواحد ميكانيكى عندنا قالى ان ده عيب فى بوابه الانجكشن وانه لازم اروح بيها التوكيل علشان الضمان ( تخيل عربيه كورى مستورده ومش تقفيل مصرى ولسه فى التليين وجديده تعمل كده) ماعلينا .... حجزنا ميعاد فى التوكيل اللى على الصحراوى بالتليفون ولما روحنا فى الميعاد لقينا الناس عماله تزعق فى الناس اللى فى التوكيل وفيه كام خناقه حصلت علشان فيه واحد ظريف شغال فى التوكيل خلى الناس اللى اتصلت وحجزت للصيانه ييجوا لمركز الخدمه وهوا مابعتش المواعيد دى للورش والناس مشيت زى ماجت ولما دخلنا العربيه وقلنا للبيه المهندس على المشاكل اللى فيها قال العربيه لازم تبات وتستلموها بكره علشان نظبط المشاكل اللى فيها ولم جينا نستلمها البيه قالنا ان المشكله كانت فى السوفت وير بتاع العربيه وانهم نزلوا سوفت وير جديد ومشكله ترشيح الزيت كانت بسبب ان سلوك البوجيهات ماكنتش مربوطه جامد :k41:... وحدث ولا حرج:ack2: بعد حوالى 300 كم رجعت العربيه صوتها زاد تانى واستهلاك البنزين زاد والار بى ام وصل 5000 والعربيه واقفه وان شاء الله هاروح اعملهم فضيحه فى مركز الخدمه بتاعهم واخليهم يغيروا بوابه الانجكشن .
تاسعا فيه كماليات اضافيه بتنزل فى العربيه بره بس الوكيل مابينزلهاش مصر على اساس ان الغلابه اللى هايشتروا العربيه فى مصر مواطنين من الدرجه التالته ومايستاهلوش انه يجيبلهم عربيه فيها كماليات كويسه وهى على سبيل المثال : مفتاح ريموت لفتح وغلق الابواب عن بعد و 4 زجاج كهرباء وليس 2 وتحكم فى الراديو كاسيت من الدركسيون و جنوط اسبور وفتحه سقف وفوانيس شبوره
عاشرا واخيرا نصيحه لوجه الله اللى معاه تمن العربيه دى وعاوز يشتريها يجيب بالمبلغ ده عربيه يابانى كسر زيرو او يزود شويه ويجيب اوبترا لان العربيه الافيو دى حرااااااااااااام فيه سعرها ده (احنا جايبنها ب 82 الف وحمايا ندم انه جابها )