المشكله فى الصنايعى ولا العربية ولا قطع الغيار
دا سؤال صعب
و انا هناقش الموضوع من 3 زوايا و بعدين احكم انت
اولا العربية:
صاحب العربية بيسيب العربية تتراكم فيها المشاكل لغاية ما تقف خالص مش راضية تتحرك
فمثلا انا لسه شايف بعينى اللى ربنا يحميهم لى واحد معاه عربية مانوال فضل ماشى بالعربية و الديسك و الاسطوانه خالصانين خالص لغاية العربية لما وقفت تماما
جه للميكانيكى تعالى يا حاج شوف العربية دايرة و مش راضية تمشى
و متوقع العربية هتخد زقة و تمشى كده
و لما الصنايعى قالة ده اسطوانه قاله دا انا مغيرها من شهرين
صاحب العربية بيسب و يلعن فى الصنايعى
طب الصنايعى ماله
ثانيا الصنايعى :-
واحد جاء اليه بالعربية مش راضية تسحب و السحب زفت
الصنايعى جرب قاله ديسك و اسطوانه و احتمال نغير البلية
فك يا عم و لم الموضوع اديك شايف الجو و الحالة زفت
فك الصنايعى
قاله لازم نغير الاسطوانة و الديسك و البيلية تمشى الحال
صاحب العربية مش معايا فلوس و لم الموضوع انا معايا 250 جنيه
اعمل بيهم بس و مشى لى العربية لقدام شهر شهرين شوية
-و عامل نفسة بيضحك على الصنايعى -
خلاص غير الاسطوانه و انت حر
بعد شهرين حصل اللى فوق مع صاحب العربية
ثالثا :-قطع الغيار
جاء صاحب العربية عاوز اسطوانه وديسك احسن نوع اصلى يعنى
الالمانى فى حدود الف جنيه
الف ايه يا حاج بقولك اصلى تقولى الف جنيه شايفنى هندى
طب وريهم لى
ق غ : فى المخزن يا باشا هتشترى يعنى
الزبون : هات يا عم هو انا هشترى سمك فى ميه
ق غ : يعنى انت هتفم فيهم
الزبون : هات النضيف و ما يهمكش السعر
ق غ : اتفضل اهم فى الكرتونه مقفولين و متبرشمين
الزبون ا: افتح اشوفهم
المهم و كمالة الحوار اللى ما لوش لزمة من فين الكتابة و الختم و الذى منه
بعد ربع ساعة لغاية لما بلغت الروح الحلقوم من الشد و الجذب
و فى الاخر بعد ده كله
الزبون : مفيش حاجة ارخص من كده اصلى بصراحة الجو تعبان
شوف حاجة صينى ولا كورى حنينه كده بس خلى بالك لازم تكون الكرتونه متبرشمه و الختم واضح على الكرتونه
المهم خد الاسطوانه الصينى من غير ديسك طبعا
و ركبها و حصل اللى معاه فى اولا :-
الخلاصة :
1- معاك فلوس اركب عربية مصاريفها على كد فلوسك
2-ما تركبش حاجة نص عمر على حاجة جديدة
3-روح للصنايعى المظبوط الفاهم ما تسترخصي
4-اشترى الحاجة الاصلية اللى تمنها غالى
او الكورى و التركى و الصينى بس ما تتوقعش نفس الاداء زى الاصلى
5-ركب الاصلى اللى نازل لموديل العربية اى كان صناعته المانى - تركى- صينى
ما تركبش بديل من موديلات عربيات تانيه
6-ما تحولش تدايق الصنايعى او قطع الغيار لانه بيخدمك مش عدوك علشان يديك الخدمة السليمة
7-لازم تعرف حالة عربيتك و تتابعها باستمرار و الا ما تلومش غير نفسك
8-العربية مجموعة من الانظمة المتكامله كل شئ بياثر فى الاخر
يعنى ما تهملش مثلا دائرة تبريد المياه لانها هتدمر الموتور لو مش سليمة او تهمل المروحة اللى هتدمر الموتور برضة و هكذا
ولا رايكم غلطان انا
اخوكم
اوبل سوهاج
المفضلات