ما هو ده اللى بقوله لازم عربيه غاليه علشان تحس بالمالتى لينك و الزلمكه كانت وقتها غاليه مش رخيصه
يعنى زى ما حضرتك قلت انه الاحساس بالراحه و النعومه لا يتوقف فقط على المالتى لينك او التورشن بيم و لكن يتوقف على سيت اب العفشه و المساعدين والسوست . يعنى ممكن تفادى موضوع الراحه و النعومه ده مع التورشن بيم فى عربيات محترمه
تاثير المالتى لينك فى الثبات فى الملفات و السرعات العاليه و متوقف على حاجات تانيه كتير فى تصميم العربيه نفسها زى توزيع مراكز الثقل و قاعدة العجلات و شاسيه العربيه و ايروديناميكية العربيه و دى بقا فيها كلام كتير قوى و حضرتك ضربت مثال بالفيرنا و برضه تاثيره على سرعات كام ؟ و زى ما قلت انه بيطبق فى عربيات تراكات و سباقات .
طيب ليه الاتجاه فى تطبيق التورشن بيم فى عربيات حديثه و منها على سبيل المثال a7 و النيسان سنترا و الجيتا و بلاش موضوع خفض التكلفه علشان العربيات دى مش رخيصه و مش هاتجازف بسمعتها علشان التكلفه .
ايه اخبار المالتى لينك فى الصيانه و التحمل لما حد بيركب ورا او فيه احمال فى الشنطه ؟ و ايه تاثيره على المساحه الداخليه و الشنطه ؟
هل فعلا العفشه بتفتح من ورا مع الوقت فى العربيات المالتى لينك من المطبات و التحميل ؟
و اخيرا ايهما افضل لطرقنا و ظروف شوارعنا ؟
برضه خفض التكلفة والاوكتافيا غالية في مصر انما هى اصلا الموديل الاقتصادى من فولكس ! ودى حاجة معروفة من زمان زي العلاقة بين دايهاتسو وتويوتا نفس التكنولوجيا بالظبط بس دايهاتسو ارخص والاوكتافيا لما كانت A4 كانت تورشن فعادى .. وبرضه الكلام ده لا يقلل من شأن الاوكتافيا بموديلاتها انها عربية محترمة جدا جدااقتباس:
طيب ليه الاتجاه فى تطبيق التورشن بيم فى عربيات حديثه و منها على سبيل المثال a7 و النيسان سنترا و الجيتا و بلاش موضوع خفض التكلفه علشان العربيات دى مش رخيصه و مش هاتجازف بسمعتها علشان التكلفه .
الجيتا برضه مش اعلى فئة في فولكس بالاضافة ان تكنولوجيا التورشن بيم نفسها بدأت تتحسن جدا وخصوصا بالاضافات زي Watt's Links والحاجات دى فبقت تدي اداء مرضي جدا في الفئة المتوسطة ، انما ما زال الفئات الفخمة تستخدم اعلى اساليب الراحة والاداء وهو المالتى لينك ...
اما النيسان سنترا فلا تعليق اصلا لان دى عربية اقتصادية قلبا وقالبا ما تبصلهاش انها حاجة محترمة عشان بتقارنها بالصنى !
تمام ، والفيرنا Dual Link يعنى مقصين على محور واحد ده بيدي نعومة بس مش بيدي ثبات والمالتى لينك بيدي الاتنين والتورشن بيوفر نقطة التقاء وموازنة بين كل العوامل (الراحة ، الثبات ، التكلفة ، الحجم ، الصيانة )اقتباس:
تاثير المالتى لينك فى الثبات فى الملفات و السرعات العاليه و متوقف على حاجات تانيه كتير فى تصميم العربيه نفسها زى توزيع مراكز الثقل و قاعدة العجلات و شاسيه العربيه و ايروديناميكية العربيه و دى بقا فيها كلام كتير قوى و حضرتك ضربت مثال بالفيرنا و برضه تاثيره على سرعات كام ؟ و زى ما قلت انه بيطبق فى عربيات تراكات و سباقات .
المالتى والتورشن مفيش وجه للمقارنة في احساس الركوبة بين الاتنين وسيبك من العربيات المتوسطة اللى بتنزللك مالتى لينك ، المالتى لينك من متلازمات الفخامة والفئات العالية ومعاه حاجات كتير اهمها التعليق الامامى نفسه يبقى double wishbone مش McPherson زي العربيات العادية وده بقى اللى بيدي فرق رهيب في احساسك بالعربية وخصوصا دقة التوجيه في الملفات ومتعة السواقة وطبعا الثبات
في الصيانة هتبقى شبه صيانة العفشة الامامية يعنى هيبقى عندك مقصات وجلب وبيض ... وبيحتاجوا صيانة على فترات بس اقل من العفشة الاماميةاقتباس:
ايه اخبار المالتى لينك فى الصيانه و التحمل لما حد بيركب ورا او فيه احمال فى الشنطه ؟ و ايه تاثيره على المساحه الداخليه و الشنطه ؟
هل فعلا العفشه بتفتح من ورا مع الوقت فى العربيات المالتى لينك من المطبات و التحميل ؟
في التحمل على حسب ، تحمل الحوادث احسن لان لو مقص اتعوج من خبطة هتغيره اما الدونجل لو اتعوج بيتغير بالكامل واستعداله بيبوظه اكتر
اما تحمل الاوزان و التأثر بيها والهبوط مع التحميل وكدة فمازلت شايف انها مسألة سوست ومساعدين بس
تحمل المطبات التورشن هيبقى احسن لان مفيش عندك جلب هتبوظ وتحتاج تغيرها كل شوية بشرط ما ترزعش العربية على مطب جامد جدا يعوج الدونجل
الصيانة اجمالا التورشن اقل ، وبيتغير لما يحصل حادثة وبس
التأثير على المساحة الداخلية والشنطة : طبعا المالتى لينك بيبلع المساحة والتورشن بيوفر فيها جامد ، بس انت بتاخد مقابل كدة اداء افضل في المالتى
الانسب للشوارع والمطبات التورشن ، والانسب للطرق المالتى
شكرا , رد وافى يحترم و انا معاك طبعا انه علشان تاخد مالتى لينك صح لازم تكون عربيه محترمه قوى و برضه سعرها غالى و اغلبنا سواقته داخل المدن و طرقنا السريعه لا تحتمل اكتر من سرعة 120 و التطوير فى التورشن بيم بقا كبير و لك ان تتخيل انه الكروز بثباتها تورشن بيم و الفلوينس بنعومة عفشتها و ثباتها برضه تورشن بيم و الكورولا بثباتها الجديد
احب اضيف ان فى حاجه اسمها دوال لينك dual link وملتى لينك multi link
الإخوة الأفاضل قالوا معظم الفروق ما بين المالتي لينك والتورشن بيم
بس كنت عايز أوضح حاجة أساسية
أنظمة تعليق السيارات بتنقسم أساسا إلى جزئين
1- النظام المستقل
2- نظام المحور ( المتصل )
النظام المستقل مقصود بيه إن كل عجلة بتتحرك بشكل منفصل عن العجلة التانية
النظام ده فيه منه كذا طريقة.. واحد منهم هو المالتي لينك.. أو النظام متعدد الوصلات..
معنى كده إن النظام المستقل فيه أنواع تانية ماهياش متعددة الوصلات
ميزة النظام متعدد الوصلات ( المالتي لينك ) إنه بيحافظ على وضع العجل دايما في وضع رأسي ثابت..
يعني مهما العجلة طلعت أو نزلت بتفضل رأسية وما تميلش.. ﻹنها موصولة من فوق ومن تحت
على فكرة.. كل المالتي لينك فيهم مقصات علوية ومقصات سفلية.. ولو مفيهومش ما يبقوش مالتي لينك
بالنسبة للتورشن بيم .. فده ينتمي لأنظمة التعليق المتصلة
بمعنى إن العجلتين اللي على نفس المحور متصلين ... ولما عجلة بتطلع على مطب مثلا.. العجلة المرتبطة بيها بتتأثر بحركتها
زمان كانت المحاور دي معمولة من معادن قوية وثقيلة.. زي اللي موجودة في العربيات النقل والنص نقل
ميزة التورشن بيم Torsion Beam .. أو عارضة الالتواء... إنها عبارة عن محور قابل للالتواء .. وبالتالي معمول من مواد مرنة وخفيفة... وده بيخلي العجلة ملامسة للأرض في المطبات أكتر من المحور العادي
وكمان طريقة تصميمه بتسمح للعجلة إنها تفضل في الوضعية الرأسية مع المطبات.. وبكده تخلصنا من أكبر عيب موجود في المحور العادي.. وهو اختلاف وضعية العجل مع اختلاف الارتفاع
وده كان بيقلل كتير من الثبات.. ﻹن العجلة كانت ملامسة الأرض بجزء من المداس بس.
الحقيقة كنت عايز أجيب صور توضح أكتر.. بس للأسف أنا برد من الموبايل ومش عارف أشرح بمزاج..
بس أتمنى أكون ساهمت في توضيح الصورة