مبدئيا الالنترا عمرها ما كانت مالتى لينك

المالتى لينك مش افضل عشان كل عجلة منفصلة وبس.. طب ما الفيرنا كل عجلة منفصلة . انما هو افضل عشان "مالتى لينك" يعنى العجلة منفصلة ومرتبطة باكتر من محور في نفس الوقت بحيث تدى افضل تحكم والعربية في الملف

التورشن بيم مش معنى انه متصل ان مفيش استقلالية لكل عجلة لا في انفصال بدرجة معقولة بس مش 100% و شبه الاستقلال بيتم عن طريق ان مع تعرض الجنب لتضاريس الطريق البيم بيحصلله تورشن (التواء) فيخلى جنب مثﻻ يترفع 7 سم والجنب التانى مثﻻ يتاثر بس يترفع 1.5 سم بس

التورشن (الدونجل) والمالتى مش حاجتين ثابتين بمعنى ان دونجل الالنترا مش زي الميجان ومالتى لينك الاوبترا مش زي الفيكترا مش زي البي ام

التورشن بياثر فيه الخواص الفيزيائية للبيم يعنى مرونته وقابليته للالتواء واضافات بتبقى في بعض العربيات زي الاسترا مثلا والمالتى لينك نفسه بيبقى اشكال مختلفة انما الثابت فيه ان ورا في مقصات وبتتحرك في اكتر من محور
ايه بقى شكل المقصات ودرجة تاثرها بزاوية ميلان العربية او التضاريس دى بقى الengineering اللى في الموضوع


اما بالنسبة لحتة النعومة
المالتى لينك في الجينات بتاعته بيخلينى اقدر اعمل عفشة انعم ما يمكن لان موضوع انفصال كل عجلة تماما اكيد هيساعد في ان الصدمة على جنب ماتتنقلش تماما للجنب التانى وطبعا ده اريح للركاب ومايعملش الهبدة اللى ممكن تحصل لما تاخد مطب بعجلة واحدة ورا وتسمع في الجنب التانى انما مش معنى كدة انه على الاطلاق لان ببساطة ممكن عربية تورشن ويبقى فيها مساعدين وسوست اطرى من اللى في المالتى لينك وده اصلا الغالب لانها في الغالب عربيات مدن اكتر زي الكوروﻻ مثلا والمالتى لينك عربية تراك اكتر فطبيعى برضه لو الطابع الاسبور غلب اكتر زي الجين تو مثلا

الخلاصة ان المالتى لينك افضل في احساسك بالعربية في الملف (ومش في الثبات كله لان الثبات ده حاجات كتير)
والنعومة حسب العربية مع الافضلية للمالتى لو هو عاوز يعمل عربية ناعمة