استشاره من اهل الخبره

**midoabdeen** · 09-06-2014 09:56 PM

السلام عليكم ورحمة الله وبركاته

انا من الاخر محتاج استشاره من الناس الاكبر مني

دلوقتى انا مرتبط ببنت من سنتين تقريبا

وهي الحمد لله مريحاني وفهماني ومتفقين جدا مع بعض

فاتحت اهلي من اول الموضوع والدي رفض علشان مش وقته

قلت ماشي يا حاجه ونفذتله كلامه وبعدين حصلت شويه تغييرات فى حياتي سيبت شغلي لحاجه تانيه الحمد لله احسن

فاتحته فالموضوع قالي مش وقته لما تجيب الشقه الاول وبعدين نروح نكلم الناس

والحمد لله الشقه جات

فاتحته فى الموضوع تاني دلوقتي قالي لا مش وقته لما تخلص تشطيب الشقه ابقي فكر فى الخطوبه

طيب يا حاجه دا التشطيب دا لسه قدامه ولا سنتين كمان
يقولي وماله ما تستني

المهم عملنا عليه ربطايه كده انا و اخويا ووالدتي يقولنا انا هروح منظر بس من الاخر علشان انتوا عايزين كده وانا مش مقتنع ( وليس مش موافق )

هو وجهه نظره انا محترمها هو مش عايزني اربط نفسي الا لما ابقي واقف علي رجلي والجو دا

بس من ناحيه تانيه انا رابط واحده معايا فتره كبيره
وكمان عايز اخد خطوه بما يرضي الله علشان ربنا يباركلي فى رزقي وفى حياتي وكده كده انا مش شايلها هم و متاكد اني اول لما اخد الخطوه دي ربنا هيرزق من وسع علشان بسعي على تكمله ديني مش اكتر

انتوا بقى من وجهه نظركوا شايفين فين الصح وفين الغلط

**M R. Z E C O** · 09-06-2014 10:03 PM

وجهة نظر ابوك اكيد ليها اعتبارات ....حاول تغهم منه .و محدش عارف الحير فين....... انت ممكن تقعد فشقة ايجار حتى على ما تخلص التانية عشان برضو متوقفش حال البنت ..ومن جهة اخرى ( حلوة دي ) محدش بيلاقي بنات بسهولة اليومين دول

**abou-yahia** · 09-06-2014 10:05 PM

فهمه انك حتستعين بالجواز في زياده وبركه الرزق

**salodas** · 10-06-2014 09:59 AM

مما لا شك فيه ان هو صح وخايف عليك .
لكن أنت برضو بتفكر صح .... لازم ترتبط بالبنت (عمله نادرة فى الزمن ده) ... وزى ما الأخ فوق قال استعين بالخطوبة فى سعة الرزق.

ربنا يوفقك لما يحبه ويرضاه

**lena jo** · 10-06-2014 08:13 PM

ربنا يبارك لك و يوسع رزقك. فعلا السعي في الزواج بيوسع الرزق باذن الله. باسمع من المعارف و الاقارب و شفت ناس بتبدأ حياتها و عايزة تتزوج و ربنا بيفتحها عليهم من وسع فعلا نماذج جميلة و طبعا بمباركة الاهل لان الاشخاص اساسا كويسين و مناسبين لبعض لكن الاهل بس بيكونوا مشفقين عليهم من صعوبات الحياة.
حضرتك بتقول ان فيه واحدة مرتبط بها و منتظرة معك يبقي لو مفيش اعتراض من الاهل علي شخصها لازم تبدأ خطوة جدية. و وضح لوالدك انك هتخطب الاول مش هتتزوج بكرة. و ان شاء الله شقتك تكون جاهزة علي الزواج و مش لازم تجهز كل حاجة. ابدأ بالمهم و الباقي كمله علي مهلك بعد الزواج. ربنا يوفقك و يعملك الخير. صلي الاول استخارة و ابدأ خطواتك

**#MAAM#** · 10-06-2014 10:22 PM

أنا رأيي فعلا لازم تاخد خطوة جد وتخطبها وكل الناس بتعمل كده وانجز شقتك بإسرع وقت لو تقدر في سنة هيبقى كويس اوي خلص المهم والباقي على مهلك بعد الجواز

**ramymechanics** · 11-06-2014 07:26 AM

عن ابن عباس قال جاء رجل إلى النبي صلى الله عليه وسلم فقال إن عندنا يتيمة وقد خطبها رجل معدم ورجل موسر وهي تهوى المعدم ونحن نهوى الموسر فقال صلى الله عليه وسلم: لم ير للمتحابين مثل النكاح

انا خطبت اول ما اتخرجت وكنت مرتبط من الكلية وكان مرتبى ساعتها 650 جنيه والله لقيت كل حاجة بتتسهل لوحدها وفى ظرف سنة كنت متجوز الحمد لله وربنا وسع عليا مع مولد اول بنت

الخطوات الرسمية بتحط الأرتباط فى الإطار الصحيح بتاعه ولو على الوالد ياما بيحصل فالجوازات متشغلش بالك خليه بس يمشى معاك واحدة واحدة حتى لو بالزق وصدقنى اما يشوف اصرارك هيتمنالك السعادة هو تلاقيه بس راسم على واحدة تانية ليك او متضايق من انكم كنتو تعرفوا بعض قبل الجواز زى معظم الأباهات :) عاااادى جدا انا والدى بردو نفس الكلام وادينى متجوز اهو 9 سنين والحمد لله ولا اى اندهاش ووالدى ووالدتى بيحبوها اكتر منى انا شخصيا

**محمود السيد** · 11-06-2014 09:35 AM

من وجهة نظرى انك تتكل على الله وتتقدم للخطوبة لان زى ما ابوك ليه عليك حقوق هى بردوه ليه حقوق لان من وجهة نظر ابوك انك تتقدم لما تكون جاهز من كله بغض النظر عن حق شريكة حياتك فى ابداء الرئ فى تجهيز الشقة من دهان * اضاءة * .....الخ
توكل عبى الله

**midoabdeen** · 11-06-2014 04:46 PM

شكرا جدا على نصائحكم يا جماعه

وفعلا ناوي انشاء الله اني اخد الخطوه دى وهو مع الوقت هينسي

وربنا يكرم ويصلح الحال للجميع

-

الموضوع: استشاره من اهل الخبره

LinkBack

أدوات الموضوع

عرض

-

-

-

-

المواضيع المتشابهه

استشاره من اهل الخبره :)

استشاره من اهل الخبره

استشاره من اهل الخبره....

استشاره من اهل الخبره

استشاره من اهل الخبره

الكلمات الدلالية لهذا الموضوع

المفضلات

المفضلات

ضوابط المشاركة