الموضوع: تقرير مصور للوحش الصيني F3 1500 cc Automatic

الحمد لله
استلمت منذ ساعات السيارة
وأرجو من الجميع التأكد من استلام فاتورة ثمن الشراء لأنها تمثل شهادة ميلاد السيارة طبقاً لكلام أحد ضباط ادارة المرور العامة !
الإنطباعات الأولى ممتازه
سيارة ناعمة جداً عند المطبات
مستوى التقفيل مرضي جداً باستثناء العلبة البلاستيك بين كرسي السائق ومن بجواره ، كانت عايزه يتصرف عليها شويه عن كده
ابعاد العربية بالنسبة لي جديدة جداً خصوصاً واني كنت سايق A113 لمدة 5 سنين ، بس واضح ان العفشة ناعمة جداً ومختلفه تماماً عن سيارتي السابقة (ربنا يكرم ويبارك للي اشتراها)

.
.
أخبروني في معرض التوكيل اني ادوس عادي ولا يهمني ، بس أنا بحاول اتبع نصائح الأعضاء هنا بعدم تجاوز الRPM لل3 آلاف لفه
.
.
التكييف لطيف جداً
الكاسيت بلا مشاكل اذاعيه حتى الآن (رغم كلام الكثير من الأعضاء عنه) وبصراحه لم أجرب الCD لسه
.
.
تجميع العربية سريع ، ولو رجلك سرحت ممكن تلاقي نفسك بتكسر الميه بسرعه
وانا شخصياً مش من هواة السرعه بس ثبات السيارة على الطريق يخليك متحسش بسرعتك
وبالمناسبة
الفتيس ستيب ترونيك فيه 6 نقلات سرعه أمامية غير الريفرس !!

.
.
شكل التابلوه (أبهاتي ) من وجهة نظري
يعني تقليدي مش شبابي
خصوصاً وان تابلوه الEmegrand7 دلع عيني دلع ، بس كله يهون في سبيل الأوتوماتيك خاصة واني من رواد كوبري 6 اكتوبر كثيراً حيث لا تصمد قدمي اليسرى كثيراً أمام الدبرياج :)

.
.
موضوع زرار التشغيل ده لطيف قوي
بيحسسك انك سايق مكوك فضائي مش عربيه
ولازم تدوس فرامل ويكون المفتاح في جيبك أو جوه العربيه عشان تدور
.
.
قالولي ان الموتور صوته عالي عشان سير الكاتينه جنزير مش كاوتش
بس انا مش سامع صوته وانا سايق خالص
جايز سمعي تقيل :)
بس الحقيقه انا شايف ان موتور اللانسر بومه 1300 صوته اعلى من ده

.
.
العربية بتنزل بمفتاحين
واحد فيه ازرار السنتر والتاني لأ

وممكن تفتحها بالزراير أو ممكن تستخدم مفتاح البصمه في فتح الأبواب أو المفتاح العادي بتاعها !

.
.
الشنطه بتتفتح بالمفتاح العادي (ملهاش بصمه)
أو من جوه السياره

.
.
الاتساع !
العربيه ماشاء الله واسعه ومريحه
وأول مشوار عملته كان لبيت الوالد والوالده ربنا يديهم الصحه
وأخدتهم وقعدنا نلف ولم أشعر ان السحب تأثر رغم ركوب 4 أفراد متوسط اوزانهم 80 كجم

.
.
شنطة السيارة الخلفيه كبيرة جداً (بس معرفش ليه حسيت ان الemegrand7 أكبر منها سنه صغيره) وجايز احساسي غلط ، ومعاها كوريك ومفتاح صواميل العجل
.
.
الزجاج الملون الخلفي شيك جداً ومدي فخامة للسيارة
.
.
الدركسيون بينزل لمستوى تحت لطيف جداً
وبتبقى ايدي مرتاحه وانا سايق
والباور مريح جداً وناعم ومفيش دبدبه في الدركسيون عند المطبات (عكس سيارتي القديمه A113)
والتكييف ماشاء الله قوي ومش حاسس انه أثر على سحب السيارة
.
.
وحدات التخزين في التابلوه كتيره جداً
ودي من الحاجات اللي بتعجبني
خصوصاً واني من هواة جمع الكراكيب والورق اللي ملوش لازمه
.
.
اول تفويله عملت 94 جنيه (الa113 كانت يوم ما املاها للرقبة يادوب75 جنيه)
ولسه بدري على حساب استهلاك البنزين
.
.
انتظرروا تقليل صيانة الألف بالصور بإذن الله :)
وبالمناسبة في موديل 2015 عند التوكيل وفي موديل 2014 والفرق بينهم في السعر ألف جنيه
.
.
أتمنى الصور تعجبكم
ولا تنسوني من الدعاء
.
.
د. إبراهيم