مالهم بس ملاك سكودا هو مفيش موضوع اللا لما الاقى بتوع سكودا مذكورين فيه
على العموم زى ما الزملاء وضحو كل عربية ليها مميزات وليها عيوب
مشكلتنا دلوقتى بقت فالتقفيل المصرى اللى ضيع سمعة العربية
عرض للطباعة
هوا كل الحكاية انها بتتقفل فى مصر مش اكتر
انا مش فاهم هل غرض المنتدى تبصير و توعية الناس اللى بيشتروا عربيات جديده و اخذ الاراء فى المشاكل اللى بتحصل و لا ادخال الكره للناس فى عربياتهم اللى بيملكوها ؟؟
حاجة تقرف والله تلاقى الناس الى فى قسم متسوبيشى على طول داخلين قسم نيسان يشتمو فى الصنى ويخرجو وغيرهم كتير
حرقاهم ازاى الصنى عاملة المبيعات دى هيتجننو يعينى فكرين الناس عبيطة مثلا
نيسان صنى محققة اعلى نسبة مبيعات فى مصر اخر 6 اشهر غصب عن اى حد
كل عربية وليها مميزات وعيوب لكن بجد يا جماعة محدش يصدق كلام الناس دى اقسم بالله العظيم الصنى مفيها كمية المشاكل دى خااااااااااااالص ممكن اة تحتاج مع الوقت تغير تيل فرامل بس هل دا عيب يستحق كل التشوية دا لسمعة السيارة ؟
تدخل قسم لانسر تلاقى عربية لعبة اسمها ارتاج هههههههههه 1200 سى سى و 3 سلندر واعدين هناك يقارنوها بالصنى
الواحد بجد بيشوف الجهل دا بيزعل
ما عليش ياريت بلاش تقول سرعة 200 بالصنى لانه فيه هنا ناس يتقرا و بتجرب نفس الموضوع و العربيه فعلا مش مصممه للسرعه دى لانها سيتى كار بنسبه كبيره و مش هاتكون ثابته باى شكل من الاشكال علشان ما يبقاش عليك ذنب و ناس تمشى بها على سرعه عاليه على حسب كلامك و يحصل حاجه لاقدر الله
انا من ملاك العربيه نيو صنى 2014 عامله 3500 ك
العربيه معايا زى الفل ولم يحدث معى اى مشاكل وهى ممتازه من حيث السعر والامكانيات
قد تكون مساله الشكل فيها اذواق ولكن ممكن اتغاضى عن مساله الشكل فى مقابل اشياء اخرى
ولان مفيش عربيه كامله فيها كل مايتمناه الانسان فهنا لازم كل واحد يشوف هو عايز العربيه لايه وايه المطلوب منها
علشان كده انا استقريت على نيسان صنى رغم ان كان فيه خيارات اخرى ليه انا مقتنع بيها
اولا انا استخدامى عائلى فهى مناسبه جدا لى من حيث الوسع الداخلى والشنطه
ثانيا عاليه عن الارض فهى مناسبه جدا لى لانى كنت باعانى من المطبات اللى عندنا كانت بتبهدل العربيه
ثالثا العربيه انا جربتها شخصيا لحد 140 ك ثابته وده على سبيل التجربه لكن انا اخرى هو 100- 120 بس مابحبش ازود عن كده لان الطرق بتاعتنا مش بتاعه الجرى ولان كثير من الحوادث بيكون سببها السرعه فهنا مساله الثبات بعد كده ماتهمنيش فى شئ لان هى كده ثابته معايا فى الرنج ده
رابعا العربيه عفشتها ناعمه ومريحه وعوامل الامان فيها كويسه وخصوصا ال abs
خامسا التكييف جيد مش ممتاز ومش بياثر على السحب ولو اتشحن كويس بيبقى ممتاز
طبعا التوكيل من اهم الاسباب اللى خلتنى اشترى الصنى فهو ممتاز ومنتشر فى كل انحاء مصر وناس محترمين
علشان كده انا اشتريت الصنى والحمد لله مش ندمان على القرار
نيجى بقى لموضوع الدفاع عن العربيه او مهاجمتها
كبر دماغك وريح نفسك وسيب اللى يقول يقول انا شخصيا مكبر دماغى ولم اعد اهتم بهكذا كلام
لان العربيه معايا كويسه ومستمتع بيها وكمان العربيه منتشره جدا وكل يوم بتنتشر اكثر قد يكون هناك بعض المشاكل لدى البعض وليس الكل وكلها تتركز فى خامه التيل ودى اكيد هيكون ليها حل عاجلا ام اجلا غير كده
استمتع بعربيتك وماتخليش حد ياثر عليك بكلام طالما انك مقتنع ومريحاك فلن تجد اجماع على عربيه حتى لو كانت ماركه عالميه
وعلى راى المثل على قد لحافك مد رجليك ورحم الله امرئ عرف قدر نفسه
علي فكرة الصني مش اعلي مبيعات
اعلي مبيعات
هيوانداي فيرنا .. ايمجراند
اعتقد اعلى مبيعات للسنه دى هيونداى فيرنا ثم تويوتا كوروﻻ
يا جماعة انا واحد من الملاك الجدد للنيسان الصنى و بصراحة مظهرش معايا اى مشاكل - الحمد لله - غير بعض عيوب التقفيل الصغيرة اللى عمرها ما تقلل من قيمة العربية و احب اقول كلمة حق انى كنت حشترى الاكسنت ار بى و قارنت برده باللاوبل كورس و البيجو 301 و حسيت ان الصنى اكترهم عملية و اريحهم و والله العظيم انا حمدت ربنا بعد ما اشترتها انى مجبتش حاجة غيرها مع ان باقى العربيات كانت اعلى منها شوية فى السعر بس الحمد لله العربية عائلية و وواسعة و مريحة و تكييفها محترم و انا حبيت اقول كلمة حق للى بيفكر يشتريها يتوكل على الله و مش حيندم إن شاء الله...
ياباشا مش قصدى والله انا باقول مثلا .. يعنى ناس بتستغرب ان ملاك الصنى بيدافعوا عنها وانا مش عارف ايه الغريب لما اكون مالك عربية وراكبها ومجربها وادافع عنها !! يعنى حضرتك لو دافعت عن الأسكودا انا شايف انه طبيعى جدا بحكم تجربتك للعربية .. ياريت تكون فهمت قصدى .. تحياتى لحضرتك وتحياتى لكل اعضاء قسم اسكودا المحترمين