رجرجه الفتيس (كلاكيت تانى مره)

**mirra** · 18-06-2014 01:00 AM

يا جماعه الخير انا معايا لادا 2107 موديل 2007 روسى انجكشن و كنت دايما بعانى من مشكله رجرجه الفتيس فى الطلعه الاولانيه خصوصا فى الزحمه و العربيه سخنه و لما سألت الاخوه فى المنتدى كان فيه شبه اجماع ان دى مشكله اسطوانه و ديسك و لما غيرتهم بطقم تركى ماركه فاليو كنت متصور ان المشكله دى اتحلت لكن مع الصيف و الحر و الزحمه ظهرت تانى. المشكله انا بقدر اسيطر عليها من خلال ضبط رجلى على بدال الدبرياج مع البنزين بس الحكايه دى بتكون عايزه حساسيه عاليه اوى... ناس قالتلى ده عادى فى الادا و ناس قالت ده ترس الفلام و لازم يتمسح فى المخرطه بس الحكايه دى حيكون معناها انى احل الفتيس تانى و دى شغلانه اخر بهدله للعربيه بصراحه...اكبر دماغى و انسى المشكله و لا اعمل ايه؟؟؟ منتظر اراء حضراتكم و لكم جزيل الشكر.

**mirra** · 18-06-2014 09:00 PM

خمسه و تمانين مشاهده و مافيش و لا تعليق!!! انا كده بدات اتوغوش!!!

**abokoko** · 19-06-2014 09:45 PM

فى اساتذه هنا فى المنتدى هيجاوبه حضتك بالتاكيد

لكن عن نفسي ردى هيكون بناء على تجاربي الشخصيه مع العربيه

العربيه سلوكها بيتغير مع الحراره
وبترج
وممكن يكون موبينه
بوجيهات
ابلاتين

قاعدة موتور
قاعدة فتيس

سلانسيه واطى

لانها لادا

غالبا مش اسطوانه و ديسك
لانهم مرتبطين بسحبة العربيه اكتر من الرجة

**Zing0** · 20-06-2014 04:44 PM

رأى الأستاذ abokoko سليم مليون الـ 100
فعلاً أداء اللادا فى الحر مختلف تماماً عن الجو البارد إللى هيا مصنوعه علشانه أساساً (تصميم روسى)

ممكن حضرتك تتأكد من اللى هأقوله ده ضرورى جداً و مش هيكلفك حاجه
رجلاش الدبرياج

(غالباً عندك الدبرياج عالى شوية)

طبعاً ده لو الميكانيكى ضبطه, هتديلوا خمسة جنية و تبقى كرمته عالآآآآآآآآآآآآآخر

**mirra** · 20-06-2014 06:05 PM

اشكر الاستاذabokoko و الاستاذ Zing0 و ان شا الله حجرب و اقولكم النتيجه.

**eng_mhasan90** · 21-06-2014 12:18 AM

المشكلة دى كانت عندى و طلعت بسبب ترس الفلام

**mirra** · 23-06-2014 02:02 PM

روحت للميكانيكى و قالى ان سبب المشكله يكمن فى ماستر الدبرياج و يجب تغيير طقم جلد الماستر العلوى ...و تم التغيير بالفعل لكن للاسف لم تحل المشكله!!!

**alaa7778** · 26-06-2014 03:29 AM

انا كان عندى نفس المشكلة كان فى الحر دايما تعمل كدة رغم انى غيرت طقم الدبرياج والكهرباء
ووصلت لحل 95% هو ان لاحظت عندى مروحة على سير ومروحة كهرباء على ترموستات 92 درجة
المهم غيرت اترموستات خلتها 90 ومن بعدها اتحلت المشكلة بنسبة 95 % يعنى نادر لو عملت كدة
يعنى طول ما درجة الحرارة اقل من 90 تبقى تمام ومبيحصلش اى تغير تغير .

**mirra** · 26-06-2014 04:05 PM

المشاركة الأصلية كتبت بواسطة alaa7778

انا كان عندى نفس المشكلة كان فى الحر دايما تعمل كدة رغم انى غيرت طقم الدبرياج والكهرباء
ووصلت لحل 95% هو ان لاحظت عندى مروحة على سير ومروحة كهرباء على ترموستات 92 درجة
المهم غيرت اترموستات خلتها 90 ومن بعدها اتحلت المشكلة بنسبة 95 % يعنى نادر لو عملت كدة
يعنى طول ما درجة الحرارة اقل من 90 تبقى تمام ومبيحصلش اى تغير تغير .

وجهه نظر جديره بالاحترام و الدراسه.

**hassanin_lada** · 27-06-2014 10:15 PM

صلو علي النبي ياجدعان

انا كان عندي المشكله دي بردو والحمدلله اتحلت

هي علي فكره مش مشكلة سخونه خالص ولا الكلام ده

نبدأ من الاول انا حالي كان زيكو بالظبط والعربية كانت تبدأ ترج في الحر او لما اقرص في العربية (الاسطوانه بتسخن)

رحت للميكانيكي راجل محترم بس مش قووي وهقولكم ليه في الاخر

المهم فكينا المكنه قالي الاسطوانه سليمة بس عاوز تيل عشان فضية خالص

رحت غيرته عند واحد كان في انواع من 40 ل 70 طبعا انا حطيت انضف حاجه وحسبته علي 60

غيرت بلية الدبرياج عشان الونه ب 50 جنيه

وقالي ان الدسك سليم وزي الفل وفعلا العربية قبل ماحل كانت بتجيب 140 مستريح بس المشكله في الطلعه والمطالع كانت بتعلق

قطاني ترس فعلا تقريبا كده ترس الفلام رحت خرطه ب 15 جنيه

جبت الحاجه ورجعتله طبعا الدسك كنت سايبو عندو

المهم ركب ركب دور جرب

اللهم صلي علي النبي

التكلفه 120 بالشاي بتاع الصبيان

لحد هنا زي الفل

انا من هواة الجري طبعا عاوز اجرب العربية واشوف هتيجب كام

بجرب السحب ممتاز لحد 125 او 130 وبعدين لقيتها قلبت بطه بلدي بس بتستجيب بردو بس اضعف من الاول

غلطتي اني مشيت وسبتلو الحاجه (الدسك)

طبعا الاداء ممتاز والرجه منعت الحمدلله بس مضايق من موضوع الدسك ده وطبعا لو رجعتله مش هاكل معاه وبردو مش عاوز اخسره لانه صنيعي ممتاز

اعتقد ان الصنيعي اهم بكتير من قطعت الغيار

بردو زمان كنت كل شهرين اغير اويل سي الكرونه والعقاطي اللي كنت شغال معاه قالي بردو هيبوظ تاني لدرجة اني فكرة ابيع العربية

لحد مارحت للرجل ده وريحني وريح العربية الحمدلله

ياريت لو حد يعرف صنيعي ممتاز زي اللي بحكي عليه ده يقول عليه عشان يفيد الناس ويوفر فلوسهم ووقتهم

انا للاسف الصنيعي ده في اسيوط لاني من اسيوط