العشم الغتت لما يبقى فى غير محله
موضوع للفضفضه
التيم ليدر بتاعى فى الشغل يعتبر صديق ليا من قبل ما اتنقل فى التيم بتاعه
هو كان عامل شغل فرى لانس و اتبعتله فلوس من امريكا على ويسترن يونيون
فاتصل بويستر يونيو اللى فى مكرم عبيد و عرف انهم بيخلصو شغل الساعه 5 - و احنا شغلنا بيخلص الساعه 4 و نص فى المنطقه الحره فماكنشى حيلحق يوصل فى المعاد
طبعا هو علشان عبقرى قال انا اروح فى البريك (من الساعه 12 ونص حتى 1 و نص)
قولتله يابنى مش حنلحق و الوقت ده بتبقى الدنيا زحمه قالى لو لاقيناها زحمه نلف و نرجع تانى
قولتله لا ماهو لما تبقى زحمه حتبقى واقف محشور فى الشارع و مش عارف تطلع ورا و لا قدام
ماحبتشى اجادل معاه كتير لإنه هو عنده سوء تقدير للحجات اللى زى كده و حيفتكر انى بندل معاه و هو حيبقى فاكر ان ده مشوار بسيط زى توصيله لإول الشارع - و ده التيم ليدر بتاعى برضه و مش عاوزه يشيل منى
المهم ربنا كرمنا و روحنا فى نص ساعه (يعنى بقينا الساعه 1 الظهر و فاضل نص ساعه على نهاية البريك)
و ركنت بره فى الشمس و مستنيه فى العربيه
دخل الباشا و بعد شويه لاقيته بيتصل بيا على الموبيل و بيقولى (روح صلى لإنى انا رقم 14 و قدامى ربع ساعه و اخلص)
اهلا يعنى كمان طلع فيه طابور و انا اللى كنت فاكر انه حيدخل يخلص فى دقيقتين و يطلع
طيب ياخى اتصل بيا قولى ارجع الشغل انتا بدل ماتتأخر لإنى حسيت انى السواق بتاعه
روحت صليت و رجعت فى عز الشمس بتاعت امبارح و خلص الباشا كانت الساعه وصلت 2 الظهر (يعنى البريك خلص و لسه مارجعناش الشغل ووقت التأخير ده بيتحسب علينا)
و احنا راجعين الشغل و ماشى بالعربيه فى الزحمه المعتاده لمصطفى النحاس و الشمس مولعه و البيه بيقولى "الناهرده اليوم غريب و الشمس حاميه اوى"
قولتله ما انتا نازل فى عز الظهر !!!
غلطتى بقى من الزهق و الحر عملتها فى تقاطع مصطفى النحاس مع عباس العقاد
التقاطع ده هو مفتوح فى اتجاهه واحد بس و الاتجاهه التانى قافلينه بخشب و شويه حجاره مش فاهم ليه
طبعا انا كنت عاوز ادخل عباس العقاد و انا فى الاتجاه المقفول و كان لازم امشى 500 متر لغايه اول يوتيرن و الدنيا واقفه و زحمه و انا متأخر اصلا
بصيت لاقيت الميكروباص اللى قدامى طلع على الخشب و عدى التقاطع - قومت انا كمان عديت التقاطع ده
و انا بعدى لاقيت امين شرطه واقف و خد النمر
يادى النيله
نزلت طبعا و قعدت احايل فيه ربع ساعه و انى ماكنتش متأكد ان الطريق ده مقفول اصلا لإن مافيش حواجز بالمعنى المفهوم و دول شويه خشب اللى حاطينهم ممكن تكون مخلفات اى حاجه فى شارع مكسر اصلا
و لاول مره فى حياتى اديته رشوه علشان يشطبنى
ورجعنا الشغل "اخيرا" الساعه 2 و نص و انا بشتمه فى سرى
يعنى بهدله و قرف و سواقه ساعتين فى الشمس و تأخير حيتخصم عليا و مخالفه ب 700 جنيه و ربنا يستر و تكون اتمسحت فعلا علشان خاطر البيه ياخد فلوس مبعوتاله :fun_10_9_134[1]:
لو كان الموضوع ليا فيه مصلحه كنت قولت ماشى
لكن ياعم انتا عاوز تقضى مصلحتك بتبهدلنى معاك ليه - خاصه ان البهدله دى فيها جزء خساره ماديه عليا بسبب الساعه التأخير اللى حتتخصم دى
ده غير ضميرى اللى بيؤنبنى لغايه دلوقتى على الرشوه دى
الظريف بقى انى عرفت ان ده جزء من حسابه - يعنى لسه فيه فلوس تانيه ليه و ممكن يطلب منى الطلب السخيف ده تانى
- خاصه انه ممكن يكون متخيل ان العادى اننا ممكن نخلص الموضوع فى اقل من كده و ان حظنا اليوم ده اللى كان وحش بس