سيات ابيزا 2014 بعد 3000 كيلو تقييم وراي شخصي ( خاص بالمنتدي)

بسم الله الرحمن الرحيم

http://images.caricos.com/s/seat/201...7_1024x768.jpg

احب اشكر كل اعضاء المنتدي واعضاء سيات بشكل خاص لتفاعلهم مع بعض بشكل رائع
وحبيت اضيف حاجه بسيطه للمنتدي يمكن تنفع اي حد عاوز يشتري او يفكر في سيات ابيزا
دا موضوع كنت عملته اول م اشتريت العربيه

http://www.nilemotors.net/Nile/418944-2014.html


اي عربيه فيها مميزات وعيوب وهحاول بقدر الامكان اقولها مش هحاول اطلع بالعربيه السما زي م شفت في مواضيع تانيه وكأن العربيات اللي اشتروها مفيش زيها في الكون والباقي كخ


اختياري للسياره جاء لوجهه نظري الشخصيه مع ان الكثير شايفين ان كان ممكن اجيب حاجات احسن بنفس السعر زي الكيا ريو او التويوتا ياريس او البيجو 208 او الفييستا
العربيات دي كلها محترمه بس كل واحد و هواه



تصميم السياره والابعاد

http://www.seat.co.uk/content/medial...e/prices_1.jpg

ابعاد السياره رائعه الرؤيه ممتازه جدا سواق في الركن او القياده
الزجاج الاماي و الخلفي عريض و بيسمحلك برؤيه مساحه كبيره حواليك
العربيه ابعادها انسيبابيه جدا وتديك مظهر القوه والجاذبيه
ودا شفته في عيون الناس وبسببه خدت عيون محترمه
لدرجه كنت بخاف امشي بالعربيه
بس برده اتخبطت وهيا واقفه دا غير بعد م جبتها حصلتلي كذا موقف اخرهم الشقه ولعت بعد م ناس شافوا العربيه.. المهم
العربيه واسعه من جوا طبعا مش زي النيسان صني ولا الريو بس معقوله
ارتفاع العربيه عن الارض جيد جدا خصوصا للهاتشباك
العربيه الحمد لله بتعدي مطبات السويس المحترمه ودي ميزه مهمه جدا
العيوب
اللي قاعد ورا لو طويل شويه راسه هتبقي خابطه في الجنب ودي حاجه غريبه جدا ليه مش عاملين حساب لكده حاولت اقعد ورا بس ببقي متضايق
مينفعش تركب تلاته ورا مليانين يعني متمعلش حسابك انك تاخد الشله كلها ف العربيه
---------------------------------------------------------------------------------
القياده

http://www.carsinvasion.com/wp-conte...-wallpaper.jpg

العربيه ممتعه جدا في السواقه القعده بتاعتها مريحه جدا الباور وتحرك السياره والاستجابه والتسارع والفرامل والعوالم الاخري مجتمعه هتمتعك وانت سايق
( ملاك سيات ابيزا- توليدو- ليون) اكتر ناس ممكن تفهم الحته دي

العيوب
برغم ان المرايات الجانبيه عريضه ومظبطاك وانت سايق بس للاسف طالعين برا اوي
وكذا مره كانوا هيطيروا بسبب المحترفين اللي بيمشوا وعاوزين يخبطوا حد ف طريقهم

---------------------------------------------------------------------------------

الثبات والاتزان

http://images.caricos.com/s/seat/201...4_1024x768.jpg

العربيه ثابته تمام مش بتعوم علي الطريق بس مش الثبات اللي ممكن تحلم بيه
يعني لو لوحدي ف سفر ممكن عربيه نقل او مقطوره تهز العربيه بعكس لو معايا ناس
ساعات بحس باهتزاز خفيف فوق الميه يعني قصدي ف الاسكودا بوصل ل 150 ومبحسش بس ف ابيزا بحس بسرعه العربيه
بس تاخد غرزه او تنقل من حاره ل حاره بمنتهي السهوله والسلاسه

---------------------------------------------------------------------------------
العزل

http://www.seat.co.uk/content/medial...e/prices_1.jpg

العربيه هاديه من جوا وبتمنع جزء كبير جدا من الضوضاء الخارجيه مفيش صوت للكاوتش نهائي العزل في العربيه مش جباار ولكنه مرضي

العيوب
لو في تراب او مطر بلاقيهم وصلولي جوه عتب العربيه وانا قافل الباب شيء غريب جدا


---------------------------------------------------------------------------------

التكييف

http://s1.cdn.autoevolution.com/imag...rs-4267_38.jpg

نجي بقي للتكييف رااااائع بمعني الكلمه
العربيه صغيره و 1600 ف التكييف جبار ولا يستني العربيه تتحرك ولا ماشيه بسرعه او لا
مبيفرقش معاه... لدرجه اني بسمع كتير من اللي راكب واحنا ف عز الحر يقولي هدي التكييف شويه
سرعه التبريد جيده جدا جدا والكفاءه جيده جدا جدا و مبحسش بيه وانا ماشي ع المتور او الاداء اطلاقا ... من الاخر التكييف ممتاز

العيوب

نظرا لقوه التكييف ف بسمع صوت الهوا من الهوايات بيصفر او ساعات بيبقي عالي شويه

---------------------------------------------------------------------------------

العفشه

http://images.caricos.com/s/seat/201...8_1024x768.jpg

جيده جدا ناعمه جدا بس نظرا لسوء و رداءه طرق السويس ف انا مخلي الكاوتش ع 28 عشان النقر ومطبات الهوا المنتشره
عارف عيوب عدم التزام بتعليمات المصنع بس كده بالنسبالي كويس ومتحمل الاضرار وزياده استهلاك البنزين وعمر الكاوتش

العيوب

لو التزمت بتعليمات الصانع هتبقي العفشه حلوه بس ساعات بحس بالنقره او الخبطه جامده حبتين


---------------------------------------------------------------------------------

الخامات الداخليه

http://s1.cdn.autoevolution.com/imag...ra-5048_25.jpg

بصراحه عالم نضيفه مبخلوش علي العربيه .. جميع الاجزاء ذات جوده عاليه جدا التابلوه خامات نضيفه متلاقيش بلاستيك رديء
الزراير تدوس عليها تحس انها تقيله ومحمله وتستحمل معاك المسند هوايات التكييف الكاسيت الفتيس جميع الاجزاء ذات خامات عاليه الجوده


---------------------------------------------------------------------------------

الكاسيت والاكسسوارات الداخليه

http://www.autohotest.com/wp-content...ring-Wheel.jpg

السماعات صوتها حلو جدا ونقي ومرضي تماما الكاسيت استعماله سهل وبسيط واشارته كويسه جدا

العيوب
المفروض طالما انك نازل بفئه واحده يبقي تديني فتحه سقف - بلوتوث دا علي الاقل يعني .. فين مثبت السرعه.. فين الزينون


---------------------------------------------------------------------------------

التخزين

http://images.caricos.com/s/seat/201...1_1024x768.jpg

http://images.caricos.com/s/seat/201...0_1024x768.jpg

رائع مش هتعرف تستخدمهم كلهم.. ف كل حته درج او مكان.. عندك التابلوه عندك الشنطه عندك المسند جواه درج تحت كرسيك هتلاقي درج خفي تحت الدلكسيون هتلاقي ..تحت كرسي السواقي هتلاقي ف ابواب العربيه هتلاقي ف الجناب بتاعه الكرسي هتلاقي تحت الكاسيت هتلاقي ف كل حته هتلاقي مكان تحط فيه حاجتك
الشنطه جيدا جدا بنالسبه لسياره صغيره


---------------------------------------------------------------------------------

الاضاءه

http://alltopnewcars.com/wp-content/...front-side.jpg

كويسه جدا و بتجيب لمسافه بعيده وقوه الاضاءه مرضيه تماما.. بس لما برجع بضهري اللمبه اليمين بس اللي بتشتغل كنت بحسب دا عيب بس سالت التكويل و زمايلي عرفت ان الالماني الجديد كله كده
والشابوره الخلفب الشمال فقط غريب جدا

العيوب
كان نفسي يبقي في زينون في العربيه ويبقي التشغيل تلقائي بس طبعا انا كده ببقي بتلكك

---------------------------------------------------------------------------------

نيجي بقي للمهم

http://www.carsinvasion.com/wp-conte...-wallpaper.jpg

الموتور

الموتور الماني بالكامل اول متركب هتحس قوه اداء صوت هادي تسارع ثبات تشغيل تكييف و متحسش كل اللي تحلم بيه في موتور 1600 موجود

---------------------------------------------------------------------------------
الفرامل

لو انت ع 120 وعاوز تقف خلال ثواني قليله جدا ومسافه قليله جدا
سرعه تجميع الفرامل حلو جدا وثبات ومتسمعش صوت تصفير او لعب او شخلله
وبصيت علي التيل لاقيته الماني برده ( عامه معظم الاجزاء الماني)

---------------------------------------------------------------------------------
نيجي بقي للكبير ( الفتيس )

http://images.caricos.com/s/seat/201...6_1024x768.jpg

طبعا كله عارف انه فتيس DSG 7 speed
انا مش هقول العيوب الكل عارفها او علي الاقل متوقعها او مستنيها
انا هقول المميزات بس
فتيس رهيب بمعني الكلمه تسارع والنعومه واستهلاك البنزين
العربيه بتشم بنزين
التسارع جيد جدا وخصوصا علي السبورت مود
نعومه في الانطلاق وفي النقلات بين الغيارات
ف الزحمه بقلبه مانيوال او سبورت مود عشان اقلل نقلات الفتيس
يارب ميحصلوش حاجه وميحلصش لاي حد
عامه الفتيس كويس جدا واداء جميل

---------------------------------------------------------------------------------

حاجه بس ناقصه .. العربيه بتتوسخ بسرعه والتراب بيلزق ع الجسم علطول عاوزه عنايه دائمه... لما اجي احط بنزين لازم انزل وافتح التانك بمفتاح العربيه



---------------------------------------------------------------------------------
لو بتفكر تشتريها نصيحتي اشتري
في النهايه مش ندمان ابدا علي شرائها .. بل باذن الله ستكون سيارتي القادمه نفس العلامه .. علامه سيات

عربية روعة ربنا يباركلك فيها

تقرير اكثر من رائع و رأي شخصي محايد احييك عليه
ربنا يباركلك فيها و يرزقك خيرها و يكفيك شر عيون الحاسدين

كل ما تقوله انا متوقعه و اعلمه و لو لدي امكانيات لن اتردد لشراء مثلها او علي الاقل سيات

الابيزا دي اسطورة .. من اول موديل 1994 لحد دلوقتي

بس اتضايقت بسبب نقطة الثبات دي انا عارف ان العربيات الالماني كلها ثبات تحفة .. ياريت تراجع ضغط الكاوتش وتجرب تاني وتقولنا اخبار الثبات ايه

وربنا يباركلك فيها اختيار ممتاز جداً

ما شاء الله ولا قوة الا بالله

تقرير عالمى تسلم ايدك وربنا يجازيك خير

ليا تعقيب على شوية حاجات:
قبل اى حاجة ربنا يعوض عليك فى شقتك وربنا يكفيك شر العين, هو اللون الاحمر بتاع السيات بيشد العين لا اراديا

بالنسبة لموضوع الثبات: الاوكتافيا مختلفة عن الابيزا تماما فى نظام التعليق والوزن وبالتالى الثبات, الابيزا عربية ضغيرة + كمان عدم التزامك بضغط الكاوتش المنصوح بيه من الصانع ده ليه تأثير

بالنسبة لعزل الصوت: مفيش عربية عزلها 100%, حتى افخم العربيات برده مش 100% وده لأن الصح انك لازم يكون فيه احساس بالطريق والسرعة عن طريق الصوت عشان ميخلكش تسرح وانت سايق

فى النهاية ربنا يباركلك فيها ويكفيك شر العين وشكرا مرة تانية على التقرير

اللهم صل علي النبي ربنا يباركلك فيها بس مفيش بلوتوث ازاي والدركسيون ملتي ولي عادي

اللهم بارك وربنا يرزقك خيرها وخير ما جبلها عليه ويكفيك شرها وشر ما جبلها عليه

ربنا يكرمك على التقرير الجميل ده

بخصوص مشكلة تانك البنزين هل ممكن تعمل نسخة من المفتاح تبقى معاك بحيث تديها لبتاع البنزينه من غير ما تشيل المفتاح م العربية وتضطر تنزل ؟

واهو بردوا امان لا قدر الله لو نسيت المفتاح ف العربية ونزلت من غير ما تاخد بالك

الف مبروك يا باشا و ربنا يديك خيرها و يبعد عنك شرها

تقرير جميل وواضح
ربنا يكفيك شر العين ويبركلك فيها ويعوض عليك فى موضوع الشقه وتذكر قوله تعالى (قل لن يصيبنا إلا ما كتب الله لنا هو مولانا وعلى الله فليتوكل المؤمنون ) فقضاء اخف من قضاء
هو صعب الواحد ياخد كل حاجه فى عربيه واخر مره شفت الابيزا فى المعرض عجبنى material حتى عن التوليدو
بس موضوع الثبات يمكن او مؤكد ضغط الكوتش له عامل كبير
وعندك حق فى موضوع زيادة الكامليات زى Multi function ومثبت السرعه و Parking Sensor او كانو خلوها فئتين
مره تانيه احيك على التقرير ورايك الشخصى المحايد

:tumb:

معلش انا أسف علي التأخير في الرد بس امبارح كنت كتبت رد كبير اوي وقبل ما اخلص كتابة النور قطع :breakpc2: النهاردة الحمدلله عامل حسابي ومركب البطارية

في البداية أحب أشكرك علي التقرير والمتابعة وتقديم العيوب قبل المميزات بشكل محايد، وبالأخص انك مالك للسيارة والتقرير ليس مجرد تجربة قيادة او تقرير بنقدم فيه السيارة لتعريف الأعضاء بها

انا بصراحة كنت عايز اتناقش مع حضرتك في التقرير وياريت لو كل الأعضاء كمان تدخل معانا في المناقشة
تعال نمسك كل نقطة ونتكلم فيها مع بعض

1- المقارنة مع الكيا ريو والبيجو 208 والتويوتا ياريس هاتشباك والفورد فيستا
ياريت تقولنا أسس الأختيار اللي بناء عليها أخترت الأبيزا وفضلتها علي كل ما سبق
هل فعلا الأبيزا احسن منهم ؟؟؟!!!
ياريت تقولنا لقيت ايه في الأبيزا مش موجود فيهم وبالتالي وقع الأختيار عليها

2- الكنبة الخلفية
خلينا واقعيين ونعترف ان الأبيزا مش عربية عائلية تسمح لركوب 3 أشخاص بالغين في الكنبة الخلفية
بالأضافة إلي ان ارتفاع الكنبة احياناً بيكون مقصود في بعض السيارات لزيادة مساحة التخزين
واستخدام اسفنج او فيبر عالي الكثافة في التنجيد بيزيد الأحساس بالراحة للركاب
اعتقد انت دلوقتي حاسسها مشكلة لكون السيارة لسة جديدة لكن مع مرور الوقت وترييح الفرش اعتقد الموضوع هيختلف معاك

3- المرايات الجانبية
انا شخصياً بسميها المرايات المطرطئة
بس بردو بروز المرايات عن جسم السيارة بيكون معمول بحكمة وخصوصاً كونها بتساعد علي مقاومة الهوا فبالتالي لو هكبر حجمها او ابعدها عن جسم السيارة فلازم اكون مضطر ودة له حكمة لأن السيارة ليها انحناءات في الأجناب يجب ان تظهر في مجال رؤية المراية الجانبية

4- الثبات
اولا يجب نعرف ان الثبات للسيارة له عدة عوامل بتحكمه
1- ارتفاع السيارة عن الأرض وعرض قاعدة العجلات
2- توزيع الأحمال داخل المركبة
3- نوعية وضغط الأطارات ونقشتها وتماسكها علي الطريق ومقدار احتكاكها بالأسفلت
4- مدي سلامة العفشة
5- مركز ثقل السيارة
اعتقد كل ما سبق مافيهوش مشكلة غير بس النقطة 3 و5 ودوول اللي هتكلم فيهم لأن الأرتفاع وقاعدة العجلات والعفشة دوول مرتبطين ببعض واعتقد انها بتنزل بيهم في مصر زي برة كمان العفشة بتعتبر semi multi link مش زي الموديلات الأقدم كانت تورشن بيم وانا هنا بكلمك عن تجربة لأبيزا 99 فأكيد عندك افضل منها وعمر ماحد فينا اشتكي من اختلال او عدم اتزان بمرور سيارة نقل او حتي في ملفات او مناورات
جرب حضرتك تظبط ضغط الأطارات وياريت لو تقولنا كل البيانات المذكورة علي الأطار لتحديد نوعيته ومدي موائمته
اما عن مركز الثقل في السيارة فبيكون المحرك ووضعيته
حضرتك المحرك بتاعها اساساً هو محرك فولكس الTSI ودة نزلت بيه في الموديلات من 2010 لحد 2012 مع الفتيس الDSG ولكن المستهلك المصري يبدو انه ماحبش المحرك دة لسببين اولهما انه كان 1.2 ثانياً لأنه بيحتاج بنزين 95 ودة طبعاً كان له اكبر الأثر علي مبيعاتها لأنك لما هتقارنها بمثيلتها في السوق هتجد محركات اكبر كسعة لترية وبتحتاج بنزين 92 وانت عارف المستهلك المصري للأسف بياخد بالسعة ولا يلتفت للأرقام زي العزم والقدرة الحصانية فحكم عليها بغير عدل بدون ان يقارنها علي ارض الواقع بغيرها من الماركات الأخري
كمان اعتقد تغيير المحرك له بعد تسويقي عشان يثبت سعرها من 2012 لحد 2014 بأنه يعتمد علي محرك قديم نسبياً فيقدر من خلاله يقلل من سعر السيارة
المهم بدون دخول في تفاصيل كتير لا مكان لها هنا فأنا اعتقد ان تغيير المحرك من TSI لMPI هيأثر ولكن بشكل مش كبير لأن اعتقد فرق الوزن بينهم مش كبير جداً وخصوصاً انها بتنزل برة بالمحرك TSI بسعة 1.4 و1.6 ومحركات الديزل TDI بسعة 1.8 و2.0 فبالتالي الفرق مش كبير بالمحرك MPI بسعة 1.6

5- العزل والتراب والطينة
اعتقد كدة انت عندك حاجة مش مظبوطة
لأن العربيات دي بتكون متأمنة كويس اوي ضد التراب والطينة ولا يمكن يدخل من خلال الباب اي زرة تراب
راجع علي داير الأبواب وسكاكة الباب وتأكد من وجود فبرة الحماية الموجودة بين الباب والرفرف الأمامي
وأخيراً لو عندك عتب ابواب او ما شابه تأكد انه راكب بشكل سليم

6- صوت الهوا والتكييف
راجع علي فلتر الغبار وجرب أقفل مجدد الهواء داخل المقصورة Fresh air

7- للأسف الشديد الكماليات والتجهيزات بيتدخل الوكيل بشكل كبير في تحديدها لتخفيض سعر السيارة او ما يراه مناسب للسوق المحلي

8- تانك البنزين
موضوع ان التانك بيفتح بمفتاح السيارة فدة معمول بيه ابتداء من موديلات 2002
ودة لأن معايير السلامة بتقتضي انك لازم تطفئ المحرك قبل التزود بالوقود وعشان يلزمك بأطفاء المحرك كان لازم يربط التانك بالكونتاكت فدة اعتقد شئ مايعتبرش عيب قد ما يعتبر ميزة وعامل أمان عربيات كتير بتفتقده اساساً

أخيراً أحب أسجل أعجابي بالتقرير
ومنتظر ردك ومناقشتك

تحياتي