المشاركة الأصلية كتبت بواسطة m_m_sh_a
أنا قتلت موضوع المياه الملونة ده بحث ..وبعد البحث والتمحيص والتفحيص والدقيق الدقيق خلصت إلى الآتي ..
كل شركة بتعمل كولنت بتديله لون معين ..واللون ده يكون بيدل على مواصفه معينة للشركة نفسها ..إيه ده؟؟ ..إيه اللخبطه دي؟؟ ..أنا هدي أمثله أحسن ..
نقول مثلا شركة موبيل ..بتعمل كولنت لونه أخضر ..وكلونت لونه أزرق...تقوم شركة موبيل تقول إن الكلولنت اللي لونه أخضر ده ..نسبة تركيزه مثلا يعني ثلاثين في المائة ..والكولنت اللي لونه أزرق ده نسبة تركيزه مثلا يعني 55 في المائة
تيجي لشركة تانيه مثلا زي شركة بريجوا ..وأنا عارف إنها شركة مغموره يمكن محدش سمع عنها قبل كده ..المهم تيجي شركة بريجوا دي تعمل كولنت لونه أحمر وأخضر وأزرق وأصفر ..وتقول إن كككككككل الألوان دي ملهاش أي دلالة غير إن الزبون يختار اللي يريحه حسب لون القربه عنده ..فالناس تسأل ..يعني مفيش فرق بين الأزرق والأخضر والأحمر والأصفر ..أقولك آه ..بس خلي بالك ..الكلام ده في شركة بريجوا بس ...لكن في شركات تانيه ممكن تلاقي إختلاف
تيجي شركة تالته ..تعمل كولنت لونه أخضر وأحمر ..وبعدين تقول الكولنت الأخضر ده للمحركات اللي بتعمل بنظام الكارب في التغذية ..والكولنت اللي لونه أحمر للمحركات اللي بتعمل بنظام الإنجيك في التغذية ..
أنا أقصد في النهاية إن الألوان بتاعة الكولنت دي عبارة عن أكواد الشركات بتستخدمها لتصنيف الكولنت بتاعها بمعرفتها هي ..كل شركة غير التانيه ..وممكن الشركة تعمل الألوان دي من باب الرفاهية بالنسبة للعميل زي كولنت بريجوا ..شفت منه الأزرق والأحمر والأصفر والأخضر ..وكلهم تركيز واحد وإضافات واحده ..ولما سألت البائع ..قالي با هندسه ده عشان تقدر تختار حاجه تبان من القربة بتاعة عربيتك ..عادي يعني ..هي الشركة بتحب تدلع الزبون مش أكتر