الموضوع: العربيه اللى حيلتى باااظت باااظت :(

بسم الله الرحمن الرحيم

فى البدايه احب اشكر كل اعضاء القسم لانهم كانوا سبب فى انى اشترى العربيه واقع في حب الاوبل

بعد التحيه ،،

انا هحكي ليكم اللى حصل معايا بالتفصيل الممل واتمنى حد يقدر يساعدنى ف مشكلتى
دلوقتى العربيه كانت حرارتها مظبوطه والميه مش بتنقص والمراوح شغاله وكله تمام ، لحد من كام يوم بدأت احس بسخونيه زياده والحراره بتوصل لـ 95 فكشفت ع الميه لقيتها ناقصه فزودتها وقلت اراقبها لو نقصت تانى اروح اكشف ع الدوره ( لانى محبش اجرى ع الصنايعيه علاطول ) وبعد ما زودت الميه رجعت الحراره زى الفل زى المعتاد
لحد يوم الخميس امبارح ، صحيت الصبح شيكت ع الميه ف القربه وقست الزيت وكله تمام لانى سمعت ان اليوم دا حر ، مشيت بالعربيه مشاوير قصيره والحراره الحمد لله زى الفل ، وبعدين حوالى الساعه اتناشر روحت البيت اجيب حاجه وركنت العربيه حوالى نص ساعه ف الضل ، وبعدين نزلت دورت ومشيت والحراره مظبوطه واول ما وصلت مكان الشغل بعد عشر دقايق بالكتير قعدت ادور ع مكان اركن فيه ( طبعاً المرور شادد ) واول ما لقيت المكان ببص ع الحراره لقيتها فوق الـ 100 اتجننت وبطلت العربيه فوراً وانا مصدوم ،
نزلت ابص تحت العربيه لقيت نقط ميه وصوت تنفيس ، وبعد ما العربيه هديت فتحت الكبوت ولقيت حاجه زى طبه كدا تحت البوجيهات ع اليمين هى اللى بتنفس وبتنزل ميه ، صبرت لحد ما العربيه بردت ، فتحت القربه لقيتها فاضيه ، دورت وزودت ميه والميه اللى بحطها الاقيها نازله من المكان دا وشويه الاقى الميه بتغلى فصبرت لحد ما بردت وزودت ميه وروحت العربيه لتحت البيت وانا مراقب الحراره

دلوقتى انا بجد مش عارف اعمل ايه وخايف اروح لميكانيكى يعمل عليا حوار ويدخلنى ف متاهه واحنا ف اخر الشهر ودخله رمضان والدنيا مش مستحمله

دلوقتى الخوف كله على جوان وش السليندر والوش ذات نفسه يكونوا حصلهم حاجه من السخونيه وخاصه ان العربيه كانت مولعه
انا كشفت ع الزيت بتع الماتور لقيته مظبوط ومش طحينه ، بصيت ع الماتور من كل حته لقيت الطبه دى هى اللى بتجيب ميه ومتواصله طول ما العربيه دايره

فايه راييكم ايه ممكن يكون باظ ف العربيه بعد اللى حصل دا ، وهل ممكن يكون العربيه مجابتش جوان بعد السخونيه دى كلها !!
وياريت لو امكن حد يقولى تكاليف الاصلاح سواء كانت طبب بس او لقدر الله جابت جوان وازاى اقدر اعرف ان العربيه جابت جوان ولا لا ؟!!

المشاركة الأصلية كتبت بواسطة hilal

ان شاء الله بسيطة
بس حاول تنظف دورة التبريد كويس ، وتضع السائل المظبوط بعد تغيير الطبة
لأن الصيف داخل بقسوة .

ربنا يعديها ع خير وتكون حاجه بسيطه ، للاسف الصيف السنه دى بدايته نار ربنا يرحمنا برحمته
شكراً لرد حضرتك

المشاركة الأصلية كتبت بواسطة احمد فهمى

طبة مياه المتور وان شاء الله مفيش حاجه فى الجوان متلحقش حسب ما وضحت والموضوع بسيط بس بيتفك كلام كتير ونصيحه غير كل الطبب بالمره ومتمشيش بيها .. المصنعيه هتكون فى الفك والتركيب

شكـــراً لأهتمام حضرتك وردك
اتمنــــي يكون الجوان بخير وميكونش الماتور انضر من اللى حصل ، انا راكنها من ساعه الموضوع دا لحد ما اشوف هعمل فيها ايه ، وان شاء الله ناوى اغير الطبب كلها


بس ليا سؤال تقنى ، هو الماتور اللى عندى فيه كام طبه بالظبط واماكنهم ولو امكن صوره ليهم عشان انا بحب اكون فاهم وايدى بايد الميكانيكى وهو شغال عشان ميعكش

ولو امكن كمان حد يعرفنى سعر الطبه كام والمصنعيه هتكون قد ايه لو غيرت الطبب كلها !!