الموضوع: ميتسوبيشي أتراج و لا كيا بيكانتو

المشاركة الأصلية كتبت بواسطة sue214

شكراً جداً لحضرتك .. أسمع إن توكيل البروتون وال gen2 سيء جداً .. وقطع غيارها غالية جداً و كمان مش متوفرة .. و نادراً ما تلاقي ميكانيكي يفهم فيها .. وف إعادة البيع بتخسر فيها جامد .. ياريت تصلحلي لو أنا غلطانة ف حاجة

خطء تماماً

توكيل بروتون الوحيد اللي بيدي ضمان على العفشة طول فترة ضمان العربية 100 الف كيلو او 3 سنين .. كل التوكيلات بتدي ضمان 20 الف كيلو بس او سنة .. دي نقطة تتحسب للتوكيل مع اني عارف انهم نصابين

قطع غيار الجين2 وبروتون ارخص "بكتير" من قطع غيار البيكانتو الجديدة . اكسنت ار بي . النترا . سيراتو
واللي خلانا نقول انها غالية لان محدش كان لسة اتعامل في قطع غيار عربيات منافسة

ونادراً ماتلاقي ميكانيكي يفهم فيها ده خطء بردو لانها مش تكنولوجيا معقدة زي الفرنساوي والالماني .. اي واحد بيشتغل فيها عادي

سعر اعادة البيع عمره ماكان مقياس على جودة العربية .. المازدا سعرها بيقع .. الفيات سعرها بيقع .. الفورد سعرها بيقع .. البيجو والرينو والسيتروين كذلك .. كدة تبقى عربيات تعبانة؟!

ممكن حضرتك تدخلي قسم بروتون او تتابعي مع بروتون كلوب ايجيبت عالفيسبوك

وبصراحة مدفعش 50 الف في بيكانتوا ولا اتراج ولا ياريس ولا العربيات التعبانة دي كلها

ولو مضطر اختار بين دول هختار للاسف البيكانتو

المشاركة الأصلية كتبت بواسطة S O P H O S

معلش يا باشا لو تسمحلي اعلق فقط علي النقطة دي
طبعا مؤكد تقصد الياريس هتشباك ازاي البيكانتو افضل منها
وازاي الياريس ميتدفعش فيها 50 الف
لو علي كده اعتقد الجين مش هتوصل 40 الف بردوا
اتمني تتقبل استفهامي من جملة حضرتك
لا اكيد حضرتك عارف ان الياريس احسن من البيكانتو
وعلي الاقل عربية فيها محرك من شركة عريقة وفيها كل وسائل الامان بالاضافة الي التقفيل الفرنسي الخ
يعني مش فاضية زي الفيرنا الي وصت حاجة و 90 الف
فأنتظار رأي حضرتك لانه يهمني
تحياتي لشخصك الكريم ..

مش عايز حضرتك تفهم كلامي غلط

وعشان احنا في مصر هيا فعلا عربيات متسواش ولا حتى الجين2 .. اعتقد العربيات دي كلها برة في نفس رينج السعر

لكن لما تنزل عربية ياريس اللي هيا المفروض عار على التويوتا ب 150 الف ده قمة النصب .. لما تنزل عربية من كيا اسمها بيكانتو ودي تعتبر اقل عربية اتعملت من كيا وسعرها هنا يوصل ل 100 الف يبقى ده قمة النصب .. ونفس الكلام على الاتراج ونفس الكلام على ال i 10 ...

العربيات دي كلها فئة واحدة .. لما يوصل سعرها او يعدي الفئة اللي بعدها يبقى كدة هبل في الجبل .. وللاسف الناس بتشتري واحنا اللي بنساعد على النصب ده

جين 2 سنة 2009 كاملة اوتو كانت بتعمل 87 الف .. دلوقتي بقت ب 118 الف ومتغيرش فيها حاجة غير فوانيس خلفية .. نفس الكلام على الافيو سنة 2009 كانت اوتو ب 74 الف .. دلوقتي بقت ب 105 الف وهيا هيا بالظبط معادا اختلافها من قدام

تخيل عربية زي هيونداي سوناتا من كام سنة كانت بتتباع ب 120 الف وبنقول غالية جداً والناس مستكتراهم .. دلوقتي الياريس بقت ب 150 الف بصدر رحب جداً

ياصلاة النبي