الموضوع: قصتي مع مرور الشروق و عذاب رفع الحظر و مأساة ترخيص العربية

الحلقة الاولى :

زى أى انسان طبيعى رخصة عربيتى أنتهت ورحت يوم السبت الموافق 7 يونيو عشان أجددها
أنا مش هتكلم كتير على اللى حصل بس أقل مايوصف به إن اللى كان بيحصل ده عقاب جماعى للناس اللى عندها عربيات
وكأن لسان حال الموظفين هناك
”
يعنى أنت عندك وكمان عايز ترخصها, الاتنين

ده أنت طماع أوى
”
أه بالمناسبة أنا بعد وقفة فى الشمس لمدة 4 ساعات معرفتش أرخص برده عشان فيه جواب المفروض يتبعت من البنك للمرور من شهرين ومجاش لسة
والمفروض ان انا اللى اجرى ورا الجواب واعرف مجاش ليه, لأ وإيه كمان أنا مش هجيبه وأديهلهم عشان ده ضد القانون,أنا بس هجرى عشان يوصلهم عن طريق البريد



الحلقة الثانية :

استكمالا لمأساتى مع ترخيص العربية
كنا قفلنا الحوار على إن جواب رفع الحظر موصلش المرور لسبب غير معلوم وكانت مهمتى كواحد معاه عربية رخصتها انتهت وعايز يجدد ترخيصها عشان محددش يتنطط عليه انى اعرف السبب وراء عدم وصول جواب رفع الحظر للمرور

روحت البنك أسأل على الجواب وبعد فحص وتمحيص طلع إن الجواب اتبعت من البنك على مكتب بريد الشروق, طب فين يعم رقم الصادر الموظف يقوللى مش فاضيين دلوقتى عشان عندنا زحمة شغل اطلع على مكتب البريد فى الشروق واسأل هناك

أروح مكتب بريد الشروق الموظفة اللى هناك تقوللى كل جوابات رفع الحظر اللى جتلنا اتردت تانى على البنوك عشان الظابط اللى ماسك وحدة مرور الشروق رافض يسلم اى جواب من البريد ولازم يجيله عن طريق مرور الدراسة

انا بكل براءة الاطفال , متأكدة ؟؟ ده أنا لسة جاى من البنك؟ قالتلى اه متأكدة

أرجع تانى على البنك والمرة ديه أصمم أنى ادخل لمدير الفرع
وحكيتله اللى حصل

المهم بعد نفس الفحص والتمحيص طلع ان فعلا الجواب اترد من بريد الشروق ورجع على البنك والبنك بعته على الادارة العامة للمرور فى حلوان !!!!!!!!! طب ليه مبعتوش على الدراسة ؟ يرد عليا ويقوللى الشروق تبع محافظة حلوان قولتله ده كان زمان دلوقتى لغوا حلوان ورجعوها تانى للقاهرة

المهم اللى فهمته ان مدير مرور الشروق بيستلم جوابات رفع الحظر من مرور الدراسة عن طريق مندوب بيبعته هو

طب ايه العمل ؟ خلاص ياسيدى طلعلى بدل فاقد واستلمه انا

المهم هياخد اد ايه وقت؟ قاللى 3 ايام عمل

الجواب طبعا طلع بعد 8 ايام عمل والبنك عمللى تفويض انى اسلمه لمرور الشروق

اروح مرور الشروق الظابط يقوللى ماينفعش انت اللى تسلمه حتى لو معاك تفويض لازم مندوب من البنك !!!!!!!!!!

ارجع تانى على البنك واطلب مندوب يطلع معايا ويطلع عينى عشان يلاقوا مندوب يطلع معايا واتفق معاه

المهم اتفقت معاه على يوم السبت الصبح الساعة 9 انى هاجى من التجمع اخده من ميدان روكسى واكدت عليه الميعاد وهو قاللى كدة احسن عشان انا عندى شغل بعد مشوارك

واستكمالا لحرقة الدم اوصل انا فى الميعاد واكلمه الاقيه بيرد عليا ويقوللى انا راحت عليا نومة ولسة صاحى على تليفونك هلبس واجيلك على طول والحق يتقال هو جه فى خلال نص ساعة

المهم اطلع على مرور الشروق واوصل هناك ويوافقوا اخيرا انهم يستلموا الجواب واروح انا اقف فى طابور لمدة ساعتين مع انى دافع الضريبة واامفروض ورقى خلصان وواقف على التسليم واول مايجى عليا الدور الاقى الراجل بطل ياخد ورق جديد وبينده على الناس اللى سلمت ورقها قبلى عشان يجيبوا تصاريح من الخزنة عشان اارخص خلصت وافضل مستنيه نص ساعة وطلع انه بيملا التصاريح بايده وطبعا اودامه مش اقل من 20 تصريح

قولت ماشى نستنى لما يخلص بس فى النص كدة لاحظت ان فيه ورق بيجيله من برة وهو بيدخله معاه وبياخد فلوس قصاد كدة قلت مبدهاش بقى حاولت ادخل للظابط طلع واحد تانى هو اللى موجود غير اللى بيبقى موجود كل مرة
ومعرفتش ادخله ولا اتكلم معاه

بكرة انا رايح تانى وكلى عشم انى الاقى الظابط اللى بيبقى موجود كل مرة عشان هو انسان محترم وعارف معظم السيناريو اللى حصل معايا لعل وعسى صعب عليه واعرف ارخص العربية المسكينة اللى نفسها تمشى قانونى