عندما تبحث عن الفتيس و متلاقيهوش !

**MoToRiZeR** · 15-10-2008 03:10 AM

نخش في صلب الموضوع

متوجه من الجامعة في الحي المتميز في 6 أكتوبر إلي داندي مول علي الطريق الصحراوي .. قبل ميدان جهينة .. ماشي في الحارة اللي في النص .. قدامي علي الشمال بحوالي 30 متر جرار من اللي بيشيلوا الأنقاض .. و انا ماشي في أمان الله سمعت حاجة "خخخخخخخخخخخخخخخخ" .. و شرارة طالعة .. الجرار بيحك في الرصيف .. الجرار بيطلع عالرصيف .. الجرار بيخبط في عمود نور .. عمود النور بيقع عليا ! و لحد هنا و الزمن وقف تقريباَ .. تقريباَ مليون عملية عقلية عملتها في الثانية دي لدرجة إنها زي ما تكون مكانتش ثانية يعني .. أولاَ عرفت إنه لا محالة إني أفرمل لأن مفيش مسافة و لو فرملت هيبقي خلاص .. فكرت أسقط نقلة و أجري من تحتيه .. بس لسبب ما مكنتش عارف الفتيس فين ! حاجة تانية ملهاش علاقة بالموقف .. جه في دماغي مشهد من تيتانك و مدخنة السفينة بتقع lol .. الزمن بيمر ببطئ شديد بجد .. شايف العمود بيقع عليا و انا عيني عليه و مبرق .. العمود بيقع .. و بيتهبد عالأرض في المرايه .. فرقت ثانية أو جزء من الثانية .. و انا معملتش أي حاجة لا دست بنزين ولا فرملت من الخضة .. قمت واقف و نازل من العربية مش مستوعب اللي حصل .. كان الجرار شال عمودين نور تانيين بس وقعوا في الجنينة اللي في نص الطريق .. و شال مواسير المياه الخاصة بزرع الجنينة دي .. و يفط إرشادات الطريق .. و خبط في عمود تاني الناحية التانية بس وقف و موقعش .. و لقيت راجل واقع عالأرض ورا .. رجعت أشوف الراجل انا خفت تكون حاجة وقعت عليه
لع الماسورة نطرت فيه و جت بسيطة بس هو وقع و فقد الوعي من الخضة لأن الجرار كان هيشيله .. رحت أشوف البهيم اللي عمل المصايب دي كلها .. لقيت الناس بيقولوا كان نايم .. و في رواية أخري الفرامل هربت منه .. معرفش .. بس أي كان .. لا تعليق .. جرار .. عالشمال .. في طريق سريع .. نايم أو بدون فرامل فهي كارثة في جميع الحالات .. دخلت on the run أشرب حاجة و قعدت حوالي ساعة أروق .. و بعدين كملت و حاولت أنسي اللي حصل .. و مفكنيش غير قعدة الأصدقاء فيما بعد .. و تعيش ج ع ع

ماسورة المياه فرقعت و عملت نافورة في الشمال .. و يفط الإرشاد عالأرض .. و الجرار متوقف

**Ramy.Gamal** · 15-10-2008 03:35 AM

الف حمد لله على سلامتك على ان ربنا سترها معاك ومجتش فى العربيه ولا فيك اشكر ربنا وحاول تطلع اى حاجه لله علشان ستر ربنا يبقى معاك على طول وفى الاخر لو محصلش اللى حصل مكنتش هتحس انك فى مصر

**om mohammed** · 15-10-2008 03:35 AM

اولا الحمد لله انك نجيت من الاهمال البشع دة بالسلامة

ثانيا والله مش عارفة اقول اية لحد امتى هنقول الاهمال وعدم المسئولية اللى بقت فى أغلب الشعب من اكبر مسئول لحد ما وصل لأصغر عامل مش قادر يراعى ضميرة فى الشغل لدرجة ان اهمالة كان ممكن يتسبب فى موت اشخاص كثيرين
انا عارفة ان كلامى مكرر والاهمال مكرر وهيفضل مكرر لحد ما معجزة تيجى تصحى الضماير شوية ونراعى ربنا بأة

وحمد الله عالسلامة مرة تانية

ولو ممكن تقدر تتصدق بأى شئ ( أن الله يدفع بالصدقة أنواعاً من البلاء )

لك منى جزيل الاحترام

**WalidAdel** · 15-10-2008 03:48 AM

كويس ان ربنا سترها معاك و الحمد لله

**fiatto** · 15-10-2008 08:36 AM

الحمد لله انك بخير واشكر ربنا على انه نجاك من المهزلة اللى حصلت .
متتصورش كمية القرف اللى انا حاسس بيها دلوقتى !! طيب وآخرتها ايه ؟!
عمال اتفائل واقول ربنا يصلح الحال , ان شاء الله الضمائر والذمم تتعدل , ربنا يبدل قوم بقوم والدنيا تبقى احسن , حتى التوقيع بتاعى متفائل وعمال اقول ميهمكش من الضلمة لسة ممكن نلاقى طريق ومفيش حاجة دايمة , بس انا حقيقى قرفت وحاسس اللى حصللك ده كأنه حصل معايا , فى ثانية ممكن كل شئ يتغير !!
ارحمنا يارب هغير توقيعى خلاص مبقتش متفائل !