بسم الله الله الرحمن الرحيم


كل عام وانتم بخير بمناسبه الشهر الكريم اعاده الله علينا باليمن والبركات .........

دلوقتي الموضوع اللي محير اغلب الناس نقص زيت موتور الفلوانس الفيس ليفت وناس واخده الفكره ان كل العربيات بتنقص وزيطه كبيره مالهاش لازمه لدرجه انها سببت فوبيا لملاك جدد او ناس بتفكر تتشتري العربيه.

أنا هحكي عن عربيتي المتواضعه عملت بيها حاليا 19500 كم

أول 10 كم

طبعا ده كان زيت الفابريكه المقاس الديجيتال عند 2700 كم كان ناقص دايره واحده بس والمقاس العادي كان تحت علامه ال max ب 1-2 مللم.
عند 8400 كم تقريبا نقصت دايره كمان بقي توتال 2 دوائر ناقصه من مجموع 6 دوائر (بشوف 4 دوائر مليانه ) والمقاس المانيوال في اول الربع الاخير لو قسمنا المنطقه البارزه المشرشره للمقاس الي اربعه اجزاء وفضلت كده لحد ما عملت صيانه ال 10 الاف.

من 10 الاف كم ل 20 الف كم

أصريت اني أحط زيت كاسترول ايدج 5W /40 وكان فيه تحسن ملحوظ في اداء العربيه وصوت الموتور بقي اهدي بكتير من الاول طبعا ف التوكيل حطوا 4 لتر و 400 مللي لتر سحبت منهم 150 مللي لتر بسرنجه وخرطوم عشان المقاس المانيول كان فوق ال max
العربيه وصلت دلوقتي 19500 كم يعني 9500 كم من ساعه ماغيرت الزيت ودي صور المقاس المانيوال والديجيتال

دي صوره المقاس الديجيتال ناقص دايرتين




ودي صوره المقاس المانيوال خدتها بعد 20 دقيقه من اطفاء المحرك وواضح فيها ان لزوجه الزيت قلت حبتين




ودي صوره كنت واخدها للمقاس المانيول والعربيه بارده بس كنت مستعجل شويه وشيلت المقاس بسرعه مالحقش يكسي المنطقه البارزه كلها



ملحوظه معدل بخر الزيت في خلال ال 9500 كم دول كان من 150 -200 مللي لتر

خلينا ناخد الموضوع واحده واحده بالمنطق

1-هل يعقل ان شركه عريقه زي رينو هتنتج موتور معيوب بالتحالف مع شركه نيسان العريقه ؟ قطعا لأ.
2-هل ظهرت مواتير معيوبه فعلا ؟أه ظهرت لان ببساطه عيوب الصناعه بقت حاجه عاديه ومتوقعه من كبار مصنعي السيارات ف العالم سواء الماني لو فرنساوي او ياباني او حتي كوري.
3-هل في شركه في العالم هترحب بتغيير مواتير كل شويه للعملاء في الضمان (تكلفه الموتور الواحد 35 الف جنيه ) أكيد لأ
4-عدد العربيات اللي اتغير ليها مواتير معرفش منهم غير واحده فقط بتاعه زميلنا العزيز د مصطفي مجدي وسمعنا ان فيه 6 عربيات تانيه الارقام الاكيده مش عندي للأسف لكنها لاتمثل نسبه ملحوظه بالمقارنه بعدد العربيات المباعه في 2013 و 2014 ... قطعا السبب في اللي حصل ده خلل في خط انتاج المواتير في مصنع رينو في تركيا واكيد المسؤل عن كده اتعمل معاه الصح وزياده
5-هل لو انا مكان د مصطفي وغيرت موتور لعربيتي الزيرو اللي انا دافع فيها 178 الف جنيه مش هبقي مضايق ؟ أكيد هتنقط طبعا بس في الاخر هقول الحمد لله


خلاصه الكلام

1- لازم يحصل استهلاك للزيت نتيجه البخراللي بيختلف معدله من زيت لاخر خلال ال 10 كم المسموح بيهم لتغيير الزيت.
2-المقاس الديجيتال يعطي فكره عامه ولا يقارن بدقه المانيوال الدليل لو الزيت زياده فوق ال max هيدي ال 6 دوائر مليانه علي عكس المانيوال اللي هيقولك اشفط شويه زيت عشان الموتور مايبوظش ....
3-اهميه المقاس الديجيتال بتظهر لو لاقدر الله حصل تسريب زيت بيظهرلك تحذير Top Up Oil لو الكارتيره اتكسرت نتيجه مطب او حتي لو عيب تصنيع وخلوص البساتم مش مظبوط هي هتقول من غير مانت تدور
4-العربيه اللي وصلت ل 5 الاف كم ونقصت دائره واحده لو افترضنا ان ال 6 دوائر كانوا مليانين ماتقلقش في اي شيئ والموتور الحمد لله زي الفل بالتالي اللي توصل 7000 -8500 كم وتنقص دائرتين نفس القصه الموتور لو معيوب هيبان في اول 3000 كم