مقارنة بين فالفولين ١٠.٤٠ ووولفر ١٠.٤٠ فى عربية لادا
مبدئيا المقارنة مش مبنيه على اى اساس علمى او تجارب معمليه هى مش اكتر من تجربه للنوعين فى عربيه واحده مع ثبات ظروف التشغيل ونفس الطرق ونفس اسلوب القياده وتمت التجربه فى فصل الصيف
الزيوت:الاول زيت فالفولين ديورا بلند ١٠.٤٠ هولندى،الثانى وولفر ١٠.٤٠ المانى،والاتنين زى مانتوا عارفين نصف تخليقى حوالى ٧ الاف كيلو
العربية:لادا ٢٠٠٦ ،٩٠ الف كيلو
ظروف التشغيل: بنزين وغاز وطبعا الغاز معظم الوقت والبنزين للتسخين فقط والطرق مش مبهدله قوى بس السفر كتير وفى درجات حراره عاليه جدا وغالبا بشغل التكيف ده غير ان الادا لوحدها بتسخن طبيعى
ظروف القياده:عاديه بس على سرعات عاليه لكن مش رياضيه(يعنى مابحرقش كتير)
الملاحظات:
اولا:صوت الموتور
السلانسيه مفيش فرق كبير وان كان وولفر اهدى شويه بسيطه بس على السرعات العاليه فالفولين صوت اهدى كتير جدا وولفر صوته عالى وملحوظ والماتور بينعر فعلا وخصوصا ان الكاتينه عندى جنزير
ثانيا السحب:
وولفر افضل كتير والسحب فعلا ممتاز عن فالفولين كتير،العربيه فعلا تحس انها عامله زى الاسد بتنط من اقل دوسة بنزين
ثالثا تغير اللون:
فالفولين لونه بيتغير بانتظام وبيغمق كل فتره اما وولفر فلونه مش بيتغير تقريبا زى ماحطيته
معدل البخر:
فالفولين عالى جدا يعنى ممكن بعد خمسة الاف كيلو تزودلك نص كيلو اما وولفر فيكاد يكون منعدم ده غير ان اللزوجه بتخف شويه مع الوقت مع فالفولين اما وولفر فلزوجته كويسه للاخر
السخونيه:
فالفولين متفوق جدا وفعلا الحرارة نادرا لما ترتفع حتى فى اقصى ظروف التشغيل اما وولفر بيخلى الموتور سخن على طول حتى لو الجو بارد والمروحه مابتبطلش وخصوصا فى الزحمه ومع التكيف
سرعة الانتشار:
فالفولين ممتاز فى الحته دى يعنى اول ماتشغل الصبح لمبة الزيت تطفى على طول اما وولفر بتقعدلها شويه على بال ماتطفى
ملحوظه:انا استخدمت فالفولين لاكتر من ٥٠ الف كيلو وولفر مره واحده بعد ماشفت اعلاناته على المنتدى واستاذ كريم لما شكر فيه وطبعا سعره الرخيصه والشحن المجانى لغاية باب البيت قررت اجربه
نصيحتى من الاخر:لو قيادتك للعربيه رياضيه وبتحب الاداء القوى بغض النظر عن الحفاظ على الموتور خليك فى وولفر اما لو قيادتك للعربيه عاديه وبتحب تحافظ على الموتور ومش ناوى تبيع العربيه قريب خليك فى فالفولين وافتكر ان فالفولين رقم واحد فى العالم بلا منازع وواخد ابروفل من كل الشركات عكس وولفر مجهول الهويه وانا عموما هرجع لفالفولين تانى
شكرا واسف للاطاله.
