الموضوع: شرح كيفية تغليف البوكس باللباد العازل لتضخيم الصوت وتنعيمه !!

ازيكم يا رجالة ؟ عاملين ايه ؟

كل سنة وانتو طيبين ورمضان كريم

انا عارف اني بقالي مدة مقصر في القسم ومافيش مواضيع جديدة ولا حتى ردود على المواضيع الموجودة حاليا

لكن ربنا يعلم ظروف الشغل والضغط اللى الواحد فيه

ان شاء الله اليومين الجاين دول محضرلكم كام موضوع كدة حلوين واتمنى يكون ليهم فايدة بالنسبالكو

النهارده موضوع بسيط ولكنه مهم في نفس الوقت

بيفرق كتير اوي اوي !! خصوصا اللى الناس اللى مركبة صبات عالية وخرجها شديد

من المشاكل اللى بتقابلنا ان البيز بيكون خشن !! ؟ او تحس كدة انه تخبيط ؟ تحس ان ضربة الصب مش طالعة زي مانت عايز او زي مانت نفسك تسمعها

ودي بيبقى ليها عوامل كتير اوي بتتحكم في صوت البيز وهو خارج

1- نوع الجي ام : طبعا كل جي ام وليه الصوت بتاعه , فيه جي امات معروف ان صوتها خشن ومش نقي (زي السيمفوني) وفيه جي امات معروف ان صوتها ناعم وجميل (زي البايونير) وطبعا كل ماتجيب حاجة Brand كل مالصوت يبقى احلى واحلى (زي البنشات والكيكر)

2- Design البوكس نفسه !! ؟ ايوة طبعا البوكس وطريقة تصميمه ليه عامل كبير اوي في صوت البيز !! ياترى انت عامله (sealed box) ولا عامله (Vented Box) وجايب المقاسات منين ؟ وهل مناسبة للصب بتاعك ولا لاء ؟ طبعا ده بيفرق بشكل كبير

3- نوع الصب , طبعا معروف ان كل صب وليه صوته ولو ان نوع الجي ام بيفرق اكتر من نوع الصب ,, لكن نوع الصب بيفرق برضوا في الصوت وشدته والخرج بتاعه


طيب انت ممكن يكون عندك جي ام كويس على صب نوعه برضوا كويس وتلاقي الصب من قوة الخرج بتاعه الدنيا عندك برضوا مش مظبوطة والبيز مش زي مانت عايز

عشان كدة الاجانب ابتكرو موضوع العزل والتغليف للبوكس وبيستخدمو مادة اسمها Polyfill دي بيتم استخدمها وحشوها جوة البوكس عشان تنعم البيز وتدي تضخيم للصوت

ودي امثلة صور لبوكسات معمول فيها الموضوع ده :







وممكن اي حد يsearch جوجل Subwoofer box polyfill وهيشوف امثلة اكتر بكتير

طيب ده فايدته ايه !!

ال Articles او زي ماتقال في ال Reviews في اكبر مواقع الصوتيات

انه بيمتص ال High Subwoofer Frequency وبيحسن سرعة خروج الصوت

طيب سبنا من الكلام ده وخلينا من التجربة الفعلية !!

ده وظيفته من خلال تجربتي الشخصية انه بينعم البيز بطريقة غير عادية !!! بيخلي البيزة تطلع زي مالكتاب مابيقول

تحس ان ضربة الصب طالعة صح مافيش فيها اي خروشة ولا اي خشونة نهائيا

بيحسن حركة الصب جوة البوكس وبيحافظ عليه

طيب هنا في مصر ازاي نعمل حاجة زي كدة ؟؟

الموضوع بسيط ومش مكلف

اولا انت محتاج التالي :

1- بوكس صب
2- لباد (وده اللى هنعزل بيه) ده عامل زي القطن كدة وهيبقى واضح شكله في الصور هتشتريه من اي محل بيبيع قطع غيار تلاجات وتكييفات بيتباع الفرخ ب 20 جنيه ,, انا عن نفسي استخدمت 3 يعني اجمالي 60 جنيه ,, بس انا البوكس عندي كبير عشان الصب مقاس 15 فانت هتشتري على حسب حجم البوكس بتاعك
3- قطر او مقص شديد عشان تقطع بيه
4- علبة كولة يستحسن تجيب الحجم الكبير عشان تلزق براحتك ب 10 جنيه
5- فرشة تدهن بيها ب 4.5 جنيه

يعني توتال الاجمالي التكلفة : 60 + 10 + 4.5 = 75 جنيه تقريبا

ودي صور الادوات







طيب كدة جهزنا كل حاجة

نسمي الله ونبدا

اول حاجة هتبدا تقطع اللباد على حسب ابعاد البوكس زي الصورة كدة بالظبط



بعد كدة هتبدا تدهن بالكولة على جمب البوكس اللى انت قطعت جزء مناسب ليه من اللباد



هتكمل قطع وتلزق جمب جمب من البوكس



بعد مانخلص خالص لازم تكون عامل حساب لفتحة السلوك

خليك فاكر اننا مش عايزين يكون فيه اي فتحات يخرج منها الهوا الا فتحة التهوية !! فلازم السلوك يبقى دخولها وخروجها محكوم باللباد من كل حتة



وفي النهاية مبروك ده بقى شكل البوكس بتاعنا بعد ماخلصنا



هتستنى لحد مالكولة ماتلزق وتتاكد انه اتلزق تمام التمام

وبعدها تحط الصب بتاعك وتجرب

هتلاحظ تحسن وفرق شاااااااااااااااااسع !! فعلا الفرق يستاهل

وكل ماكان الصب بتاعك اقوى كل ماهتحس بفرق اقوى

لانك هتبقى قضيت على نقطة تخبيط البيز في الخشب مباشرة !! عزلت وقفلت البوكس بإحكام بحيث انه مايبقاش فيه اي مجال لخروج الهوا غير من فتحة التهوية

طبعا انت تقدر تزود اللباد زي مانت عايز , وزي مالصور في المواقع الاجنبية وضحت

ان الناس بتبقى مالية البوكس على الاخر

بس انا عن نفسي اكتفيت اني اغطي جميع اجزاء البوكس من كل الجوانب واحتمال قدام ابقى ازود حبة واشوف اذا كان ليها تاثير ولا لاء

اتمنى ان الموضوع يكون مفيد وياريت اللى يجربه ينقلنا تجربته ويقولنا مدى اختلاف الصوت اللى حسه قبل وبعد