عاوز اشترى فلوانس زيرو ومحتاج مساعدة

**Flay-Tiger** · 10-07-2014 06:20 AM

بسم الله
لقد استفدت كتيرا من هذا المنتدى وبصراجة كنت بافكر اشترى عربية اخرى بعد مابيعت عربيتى بى ام دبليو
بقالى 20 سنة ركبت فيهم 17 سنة بى ام بفئاتها المختلفة و 3 سنين بس ركبت انواع تانية
اخرهم كان bmw320 موديل 2010 وبيعتها لانى كنت هاغير للفئة الخامسة بس كسر زيرو لانى مش هاقدر على الزيرو بتاعها
بعد زيادة البنزين راجعت نفسى وبدات رحلة صعبة جدا لاختيار سيارة جديدة وبصراحة المنتدى استفدت منة كتير وكذا عربية كنت افكر فيها افتح واقرا عنها فى المنتدى واتراجع عن شراؤها بفضل كم المشاركات القيمة من الاعضاء والمشرفين
المهم انا استقريت على الفلوانس الشكل الجديد واللون الكريمى الفئة الثانية اوتوماتيك
حاليا ان باسال :

1- اية الحاجات اللى اتاكد من استلامها وقت الشراء واحسن مركز خدمة اتعامل معاه انا من القاهرة المنيل

2- لاحظت مشاكل فى السيارة تتعلق بنقص الزيت عند البعض والبعض الآخر لا ... هل هذة مشكلة فى دفعة معينة ؟ ولو كانت كذلك اشترى سيارة تاريخ الافراج الجمركى بتاعها امتى ؟

3- لاحظت من المشاركات مشكلة فى تنتيش السيارة عند الوقوف والار بى ام بيبقى عالى وقريت المواضيع دى وناس هاتروح التوكيل وما الى ذلك ...
سؤالى ... هل فية حد اتحلت مشكلتة فعلا ولا راحوا ورجعوا من التوكيل بدون اى حل للمشكلة ؟

4- احد اعضاء المنتدى نصحنى بشراء موديل 2015 .... سؤالى هل يوجد فرق بينة وبين موديل 2014 ؟
ولو فية فرق اية هوة ؟

وشكرا

**Flay-Tiger** · 10-07-2014 10:11 AM

بعد ماوصلت لصفحة 25 فى مواضيع الرينو الفلوانس وجدت كم من المشاكل من الاعضاء فى اكثر من موضوع وملاقيتش عضو واحد كتب كلمة انة عمل اية او مشكلتة اتحلت ازاى بالاضافة للمشاكل اللى فى اول مشاركة لاقيت اعضاء بتشتكى من :
سخونة من فتحة السي دى واسفل قدم السائق
طقطقة من طابلوة السيارة خلف الدريكسيون
قطمة الريكسيون
وبعد موضوع شكوى الاعضاء من سوء تعامل التوكيل فى حال ظهور مشاكل
ومشكلة الاخ الذى رفضوا تغيير السيارة وتبديل الموتور فقط مع سوء تعاملهم

ارجو ان يفيدنى احد عن اسئلتى فى المشاركة الاولى والثانية
هل تم علاج هذة العيوب فى الدفعات الجديدة وما هوة تاريخ الافراج الجمركى الذى يخصها ؟
ام ان تم علاجها فى دفعات 2015 ؟
ام ان كل الكلام الحلو عن الرينو هنا مجرد ترويج للسيارة فقط

هل اجد رد ؟

**gebreel** · 10-07-2014 10:50 AM

بص يا باشا انا مش معايا فلوانس بس معايا لوجان اللي هي ارخص من الفلوانس بمراحل و عربية رينو الرخيصة

خليني ارد عليك في اللي انا عارفه:
- بالنسبة لموضوع نقص الزيت اللي في الفلوانس فده مش هقدر اقولك انه مشكلة فردية لكن عدد اللي اتعرضوله مقارنة بمبيعات العربية قليل جدا و اللي بيظهر عنده المشكلة التوكيل بيغيرله الموتور كله في الضمان
- ثاني حاجة ان نفس الموتور و الفتيس اللي في الفلوانس هو هو اللي في النيسان جوك فواضح جدا انها كانت Batch معينة هي اللي فيها المشكلة دي وخلاص
- التوكيل احيانا و حط تحت احيانا دي 100 خط بيستهبل و انا شخصيا قابلت الموضوع ده مرة واحدة بس و لما ده بيحصل بيتبعت ميل بسيط لرينو فرنسا فيه المشكلة و بعد 48 ساعة بتلاقي التوكيل بيكلمك يتحايل عليك تجيله علشان يكشف على العربية و يصلحلك العيبز
- موضوع التنتيش ده اول مرة اسمع عنه بس في الغالب لو رجعت لتاريخ الموضوع هتلاقيه تاريخ قبل الفيسليفت علشان كان الفتيس اوتوماتيك عادي مش CVT و فتيس الفرنساوي عموما بيبقى الengine break محسوس فيه بشكل ملحوظ زي في عربيتي لكن مش مشكلة في الفتيس او انه هيبوظ
- موضوع قطمة الدريكسون ده ظهر مع الاستاذ هاني بس على حد علمي و اديك شفت اللي حصل و تم تغييره ازاي و سعره كام و ده حاجة مبتبوظش كل يوم و وارد ان اي عربية يبقى فيها عيب صناعة و ده فايدة الضمان
- موضوع السخونة ده مش هقدر افيدك فيه

بالنسبة ليا انا لو غيرت هغير لرينو بردو و هتبقى فلوانس ان شاء الله فاكيد مش هيبقى التوكيل وحش او العربية فيها مشاكل تقلق و افكر اغير ليها

**تامر.محمد** · 10-07-2014 11:27 AM

سلام عليكم
ملخص مشكلة الزيت
1- هي مش فردية , فيه ناس بتتكلم في 6 عربيات و فيه ناس بتتكلم في ضعف الرقم ده
2- هي مش مزمنة , بمعنى انها بيتم حلها فعلا في التوكيل بتغيير الموتور , لحد دلوقت على الاقل , طبعا لو حضرتك مش متقبل وجود احتمال لحاجة زي كده يبقى انصحك بلاش من الفلوينس خالص

ملخص مشكلة قطمة الدركسيون
1- هي مش فردية , دي فعلا حصلت مع ناس كتير
2- هي مش مزمنة , كلها بيتم حلها في الضمان بتغييرها

مشاكل اخرى
1- بعض الناس اشتكت ان دراع الباب الامامي جودته مش قد كده , و معاهم حق
2- الناس اللي انا شفتهم اشتكوا من الRPM كانوا بيشتكوا من انه بيطلع لحد 1.1 و العربية واقفة , انا مش عارف لحد دلوقت دي حاجة غريبة ولا عادية , و فيهم واحد بس اشتكى ان ده معاه بيترافق مع صوت زنة غريبة

دي الخلاصة طبقا لآخر update اعرفه لحد دلوقت

**تامر.محمد** · 10-07-2014 12:25 PM

المشاركة الأصلية كتبت بواسطة mohamedhasanen

فى النقطة دى أنا لاحظت حاجة من خلال صديق لى معاه فلوانس الفئة التانية أوتوماتيك

إن من الفئة التانية أوتوماتيك فالأعلى يوجد مقبض مائل للأبواب منحنى (واخد كيرف) ...هذا المقبض قد يكون مقيد وغير مريح بعض الشئ لحركة القدم اليسرى لبعض السائقين (مثل صديقى)

هذا المقبض غير موجود عندى فى الفئة الأولى أوتوماتيك (يتم شد الباب عند غلقه من خلال فتحة داخل فرش الباب)...مما أعطى مساحة أكبر لحركة القدم اليسرى

بالظبط كده , هو مش موجود في اول فئة فعلا
بس انا لما ركبتها ما حستش انه مضايقني في القعدة خالص
هو بس من خامة مش عالية فلما تمسكه ممكن تسمع منه تزييقه خفيفة كده

مش عارف انا ايه الناس اللي تزود دراع من تاني فئة فتزوده بكواليتي على قدها دول

**scientist9508** · 10-07-2014 12:51 PM

بسم الله الرحمن الرحيم

الأخ الفاضل فلاى تايجر

لن يستطيع أحد كائن من كان أن يجزم لك بالحسم عن تساؤلاتك. أنا مثلك كنت عاقد العزم على هذه السياره ثم تراجعت و آثرت التريث و التأنى لأن هذا ليس بالقرار السهل وهى ليست السلعه التى تغيرها فى يوم قريب من يوم شرائك لها. سأخبرك ببعض الثوابت عسى أن تجد فيها ما يفيدك

1 - ملخص كل الكلام . . . . إنها حظوظ. . . لو أن لك حظ كريم ستشترى سياره خالية من كل هذا الصداع و دوران الرأس. فلا أظن أن كل ما ذكر عيوب ثابته فى الفلوينس بل هى مشاكل ظهرت فى عدد من القطع. ولو أن حظك ضدك فأعانك الله على ما أنت مقبل عليه

2 - على الرغم من أن وكيل رينو من أفضل التوكيلات على مستوى الجمهوريه إلا أنه و بتجربة بعض الملاك لا يستطيع حل بعض المشاكل الخاصه بالفلوينس تحديدآ (بغض النظر عما إذا كان السبب تقاعس منهم أو قلة كفاءه فنيه منهم أيضآ)

3 - صحيح أن العيوب الفرديه تحدث و لكن هناك ماركات و موديلات لم تحدث فيها أى مشاكل نهائى. و إن أحببت أن تنظر إلى داخل عائلة الرينو ستجد أن الداستر و اللوجان (القديمه و الجديده) لم تظهر فيهم مشاكل كبيره مثل تلك.

4 - إن أردت أن تخرج نفسك خارج دائرة الإحتمالات فأخرج الفلوينس من حساباتك و أنظر داخل عائلة الرينو لتبحث عن بديل لها. أما إن كنت غاوى للفلوينس تحديدآ فقم بشرائها و يلطف الله بك إن كان حظك ضدك

5 - بدون إساءة ظن أو سوء فهم فإن العدد المسجل هنا فى المنتدى هو 6 أو 12 حاله و هذا لا يعنى أنها كل الحالات التى تم تسجيلها فى جمهورية مصر العربيه. بالتأكيد هناك حالات أخرى غير مشتركه فى المنتدى و بالتالى لم نسمع عنها ولذلك لا نستيطع تطبيق نظرية النسبه و التناسب فى عدد السيارات المعطوبه بالمشاكل إلى عدد السيارات السليمه

6 - أحدثك عن تجربة شخصيه و مؤكده: أفضل مركز صيانه رينو على الإطلاق و على مستوى الجمهوريه هو مركز مدينة العبور بل إنه لشهرته يرتحل إليه ملاك الرينو من سائر محافظات مصر و قد سبق لى التعامل معهم أكثر من مره بشأن سياره صديق لى. و أشهد شهادة حق أنه أكثر من رائع

هداك الله لأرشد أمرك و أقومه

السلام عليكم و رحمة الله و بركاته

**essamrh2011** · 10-07-2014 01:19 PM

انا الحمد لله معايا العربيه وعامل بيها 3600 كيلو فيس ليفت والحمد لله العربيه تمااام جدا وماوجهتش اي مشكله تماما
وبخصوص موضوع الزيت ده بصراحه بقى ممل جدا واعتقد ان المشكله في التعتيم عليها من قبل الوكيل
اما بخصوص تغيير الماتور فانا اعرف ان الوكيل عرض على د مصطفى تغيير العربيه بالكامل على الرغم من انه استعملها لشهور عديده وهوه رفض كده وذلك مقابل مبلغ مالي
بخصوص الدركسيون ده طبيعي وبيتغير في الضمان لو فيه مشكله
بخصوص العربيه مجملا ماشاء الله عليا وانتشاراها في الشارع مذهل وبيقوي من سعر اعادة البيع ليها
نصيحه خليك في الالوان الفاتحه

الف مبروووك مقدما

-

-

-

الموضوع: عاوز اشترى فلوانس زيرو ومحتاج مساعدة

LinkBack

أدوات الموضوع

عرض

عاوز اشترى فلوانس زيرو ومحتاج مساعدة - انشر الموضوع فى :

-

-

المواضيع المتشابهه

هجيب عربية زيرو ومحتاج مساعدة من الخبراء

محتاج مساعدة الخبراء في شراء فلوانس كسر زيرو..ارجو التفاعل

عاوز اشترى عربية ومحتاج مساعدة

ناوى اشترى سيارة نيسان ومحتاج مساعدة

ناوى اشترى فيرنا اوتوماتيك زيرو ومحتاج رأى خبراء المنتدى

الكلمات الدلالية لهذا الموضوع

المفضلات

المفضلات

ضوابط المشاركة