الموضوع: تجميعه ملاحظات عن السيراتو k3

طبعا كل عربيه جديده بيقبي فيه شويه تساؤلات عنها من المالكين وفيه حاجات مابيبقاش الناس عارفين هل هيا عيب او دي حاجه عاديه وطبيعه العربيه
نقل التجارب بين الاعضاء وبعضهم بالاضافه الي مراجعه التوكيل بيجمع الخيوط وبيوضح الصوره
انا هاقول الملاحظات اللي اتقالت بكل امانه وبدون تحيز للموديل وطبعا الملاحظات دي ممكن تكون موجوده في الخليجي ومش في عربيات الوكيل والعكس..وبرده خليجي عن خليجي يفرق

1- كان فيه شكوي من صوت صفاره مع الفرامل في بعض الموديلات2014 والصوت ده مالهوش وقت معين يظهر فيه ممكن يظهر بعد او 500 كيلو وممكن بعد كده ....السبب انه البارت نمبر ولوجو كيا كان محفور وبارز علي الطنابير الخلفيه وده سبب الصوت ...الحل في التوكيل بسنفره الجزء ده او مع الوقت بيختفي الصوت..المشكله دي ماظهرتش لسه في موديلات 2015 ..انا رايي انها حاجه عاديه ومش عيب

2- الاحساس ببرجله العربيه وهيا علي السلانسيه مع تشغيل التكييف فقط يعني ال ار بي ام بيبقي مش مستقر احيانا بس بنسبه بسيطه جدا جدا ......السبب ده بيظهر في العربيات الخليجي ( السعودي والعماني والكويتي) بسبب ان السوفت وير بتاع الخليجي بينزل مختلف وانه بيخلي الكمبريسور يشتغل بسرعه ويفصل برده بسرعه( ايوه الكمبريسور بتاع الخليجي بيشتغل وبيفصل) وذلك لتخفيف الاحمال من الماتور ...الحل ..التوكيل بيقول طبيعي جدا جدا ومافيهوش مشكله ..ولو مش عاجبك بينزلك السوفت وير المصري العادي اللي بيخلي التكييف بيفصل علي مرات متباعده جدا وبيفضل معظم الوقت شغال ( مش كل مراكز التوكيل بتعمل السوفت وير ده فيه مراكز معينه بس)...برده انا شايف ان ده ميزه مش عيب وانا معايا خليجي وهاخليها بالسوفت وير ده

3-احساس بسخونه جاي من عند دواسه البنزين ده بدون ماتكون مشغل تكييف وبعد ماتمشي بالعربيه مشوار طويل حوالي ساعه او اكتر.... اول ما اشتريت العربيه لاحظته لاني جبتها من المعرض وسافرت بيها مشوار طويل ....السبب ماسوره وسربنتينه التكييف السخن مش معزولين بنسبه 100%
احساس السخونه قل بعد الالف كيلو وبقي خفيف جدا جدا بالاضاف ان فيه حلين للقضاء عليه تماما

الاول عزله في التوكيل وده بيتكلف حوالي 200 جنيه ..او تعزله بره عند اي سروجي زي ما انا عملت وده كلفني 50 جنيه بدون ما يفك حاجه غير فبره صغيره بمسمار جنب دواسه البنزين اول مابتفكها بتلاقي ماسوره التكييف السخن مولعه نار وبتشوف دخلتها علي سربنتينه التكييف السخن ( السربنتينه معزوله معقول)..بتشتري شريط شبه المطاط دبل فيس وتلفه حوالين الماسوره والاجزاء اللي باينه من سربنتينه السخن (ممكن تعمل ده بنفسك) وبعدين بتجيب عازل حراري زي بتاع التلاجات بتقفل بيه كل الجنب ده وهكذا الجنب التاني وبعدين تركب الفبره وخلاص
انا كمان فاض معايا شويه من العازل روحت عزلت بيهم ماسوره التكييف البارد في كبوت العربيه
الوقت حوالي نص ساع بالكتير وتكون مخلص الموضوع ده
النتيجه .....اختفاء السخونه تماما واداء التكييف بقي افضل
الحل التاني ..الغاء مواسير السخن والاستغناء عن التكييف السخن وده حل مستبعد لان العزل يفي تماما بالغرض ومافيهوش لعب في العربيه وبيحافظ علي اوبشن وجود التكييف السخن

دي الحاجات اللي جت قدامي وحبيت انقلهالكم..اللي عنده حاجه تانيه يحب يشارك بيها يقولها وفي النهايه العربيه في المجمل تعتبر ممتازه والحمدلله

كل عام وانتم بخير