الموضوع: ذراع النور...صيانة و إصلاح!

كتير جدا بنسمع عن دراع اشارات بتاع فلان الفلاني أو بتاعنا شخصياً ضرب أو مبقاش ينور ...أو أو أو...

يوم 6 أكتوبر اللي فات...كنا معزومين في حتة و فضلنا قاعدين لحد باليل...و احنا ماشيين قلت أولع النور....


لاقيت حاجات غريبة بتحصل...لمبة العالي منورة لوحدها و مافيش نور...أقفل و أفتح نفس الكلام يحصل....لحد ما هوب....اللمبة قطعت....و مافيش نور خالص...غير من لمض الشبورة و السهاري ....

جربت أرعش لاقيته شغال عادي مافيش مشاكل...جربت أرجع الذراع لوراء عشان يدي عالي علطول...مش جايب حاجة...

يبقي كده اللي باظ النور الواطي و العالي....لكن بقية الحاجات شغالين

أول حاجة عملتها روحت لكهربائي جمبي...عارفه كويس و عارف شغله....جربنا كل حاجة ممكنة فيوزات و فيش و لمض و سلوك و كل حاجة...بس ماعرفش في الأخر العيب من ايه...و قاللي انا اسف مش هاقدر اشتغل فيها أكتر من كده ...وديها التوكيل عشان مابوظش حاجة...المهم شكرته علي أمانته و اديته اللي فيه النصيب ....و تاني يوم توجهت للتوكيل

دخلت و فضلت مستني لحد ما كلموني علي الموبايل و قالوللي دراع النور بايظ و لازم يتغيير.....بكام يا عم؟....350 جنيه من غير ضريبة:k20:

قلتله شكرا جزيلا....رجع كل حاجة و هاخدها و أمشي....المهم غرمت 80 جنيه مصنعيات علي الفاضي

رجعت علي كهربائي تاني محترف أكتر من الأولاني س بسيبه للشغل التقيل....المهم عملت عبيط..و قلتله النور بايظ شوف ماله....عشان يمكن يطلع عيب عبيط..

قعد يجرب يجرب لحد ما كشف علي الدراع لقاه بايظ فعلا..و فال لازم يتغيير...و فال مابيتصلحش...لازم يتغيير...

قعدت في العربية انا و صاحبي مش عارفيين نعمل ايه....لاقيته بيقوللي ماتيجي نفكه نشوف ماله...و أهو كده كده بايظ...قلت ماشي....حاولت أفكه من مكانه...طلع بسهولة....و فكيت فيشته...و بكده خرج من العربية و بقي في ايدي....و اكتشفنا أثار حرق عليه...

روحت علي البيت...و فضيت المكتب و جبت العده و قعدنا...

ده شكل الدراع بعد ازالة الغطاء البلاستيكي....و لو تلاحظوا فيه أثار حرق و شياط بالداخل



هانفك المسمارين اللي فوق عشان نخش علي القلب بتاعه:



و ده القلب و مليان شحم:







بعد التجربة و فهم الميكانيزم قدرنا نوصل لأول خيط للمشكلة....الريش النحاس االي في أول صورة ريحت...و مابقتش تعمل كونتاكت مع بعضها....فا كان الحل انها تتظبط و تنيناها بمفك و بنسه بحيث انها بقت زي الأول تاني

نزلنا نجرب....مافيش فرق!!!المشكلة زي ما هي موجودة...بس علي الأقل حلينا ربعها!

اخدناه و طلعنا تاني....و فكيناه 100 حته.....و بعد البحث و التدقيق...وجدنا الجاني...القطعة البلاستيكية المسؤولة عن تحريك الريش النحاس ...و بالتحديد الجزء الذي لا تتعدي مساحته 3 مللي...و كانت سايحة!!!


هي الحتة اللي في النص دي.... و اللي مسؤوله عن النور الواطي!

نعمل ايه نعمل ايه؟؟؟!!؟!هدفنا دلوقتي نبني حته مكان اللي ساحت...فكرنا في بلاستيك و نسيحه عليها...فكرنا في أمير بطفي السجائر (قال يعني بندخن:D)...فا والدي و هو قاعد معانا....قالنا ينفع ايبوكسي؟!

ينفع طبعا....طلع يا معلم و اعمل الخلطة...عملناها و بدأنا عمليه التجميل...


الدبوس اللي علي شكل ديك ده كان البطل في عملية التهذيب و التشذيب...بحيث انها بقت أقرب للأصليه


ده بعد ما خلصنا تظبيط... و كنا سايبين فيها زيادات عشان تتعمل بعد ما تنشف بصنفرة...



اكتشفنا برده حته تانية دقيقة جدا كانت سايحة....بقطر 1 مللي في القطعة المسؤولة عن النور العالي...و عملنلها حشو زي بتاع السنان بالإيبوكسي

و بالفعل...حطينا القطعة في الشمس طول اليوم:k52: و كل واحد روح نام...و باليل أخدتها و قعدنا نعملها trimming عشان تبقي أبعدها زي الأصليه...و ركبناها.....و كانت المفاجأة!!!!!

إشتغلت يا رججاله:err::err::err::err:...النور الواطي اشتغل يا رداله....

شعرت بالفخر الشديد...و بلذه الإنتصار علي الصعاب و المشكلات (بقين حمضانين)

اكتشفنا أيضا المسؤول عن هذه المشكلة....لمبة الواطي و العاليH4..باظت و عملت قفلة....فا سيحت الدراع...

أثناء محاولتنا لإصلاح الدراع....حاولت أتصل بمحلات قطع الغيار أسأل علي سعره...

أول واحد كلمته قالي 160 جنيه.... و تاني واحد 125 جنيه:D:D:D....و الإتنين الأصلي الكوري....و والدي من كتر ما زهق مننا قاللي انا نازل أجيبه بدل العك اللي انتوا بتعملوه ده:D

________________________________________________

بكده يا اخواني....اتمني انكم تكونوا استفدتم من تجربتي أنا و صاحبي...و ديما حاولوا تشتغلوا بايدكم (كلما أمكن)...و ماتجروش ورا كلام التوكيلات أو الصنايعية