واضح يا استاذ رمضان ان كلام حضرتك من واقع تجربة .. بالنسبة لصغر حجم الشنطة فهى فى الوقت الحالى مناسبة لاحتياجاتى .. حاجة تانية حضرتك طمنتنى لجزئية قطع الغيار .. بالنسبة لى مش هتفرق انها تكون غالية اد ما يهمنى تكون متوافرة وموجودة وانا بالفعل من سكان القاهرة والمناطق اللى حضرتك ذكرتها مش بعيدة عنى الحمد لله ..

نيجى للنقطة الاهم .. انا فعلا سمعت من اكترمن حد ان القلق فى العربية ديه فى الغالب يكون سببه اكنترول او الكهرباء وفى الغالب برده بيبقى نتيجة عك من صنايعية مش فاهميين فيها بس بيفتوا ... فكنت احب اعرف من حضرتك حاجتين :
* ازاى اتأكد وانا بشترى ان كهربه العربية تمام والكنترول تمام ومش هيتعبنى .
* مكان كهربائى فورد يكون فاهم فى العربية يكون فى القاهرة او الجيزة اقدر ارجعله لو لا قدر الله حصل اي حاجة .

*** فى نقطة برده كنت احب اعرف ايه اللى ممكن يكون السبب فى رجرجة خفيفة كده فى العربية احيانا بتيجى عند الغيار لأننى لاحظت الموضوع ده فى عربيتين وانا بجربهم .. وهل الحكاية دي عيب متكرر فى الفيستا وايه اسبابه وهل ليها علاقة بالكنترول او الكهرباء .. لأن الموضوع ده قلقنى الحقيقة واتمنى اصحاب التجربة مع الفييستا يفيدونا فيه .

**** فى نقطة كمان كنت احب اثيرها ليه يبقى حد لسه مسقط متور للعربية استيراد ويبقى عايز يبيعها لأن لاحظت الموضوع ده فى كذا عربية برده .. هل اداء العربية ميبقاش زى ما كان قبل المتور الجديد فعشان كده بيبيع .