صوت غريب شوية بعد تغيير تيل فرامل ام 11
السلام عليكم ورحمة الله وبركاته
رمضان كريم يا جماعة وكل عام وانتم بخير
كان فيه صوت صفارة جاى من ناحية العجلة الشمال ادام بقالو فترة طويلة وانا مكسل لكن ربنا كرمنى وقررت اروح للميكانيكى النهاردة فك التيل ونضفه والصفارة راحت بس التيل كان متاكل وعلى اخره فقولنا نغيره عشان الطنبورة متخربش وفعلا اشتريت التيل وغيرناه.
الغريب بعد غيرت التيل بدأت اسمع صوت زرجنة غريب كده جاى بردو من العجلة الشمال زى ما تقول حاجة مكلبشة فى الطنبورة وبحس الزرجنة دى لما بتحصل فى الطارة .. الصوت بيروح وييجى وبييجى اكتر على السرعة الخفيفة اوى وبيروح لما بشعر فرامل فرجعت للميكانيكى تانى قالى من غير مايجرب العربية ده عادى على ما التيل يطبع مع الطنبورة فسبته ومشيت ولما رجعت البيت فكيت العجلة وركبتها تانى لانى مقتنعتش بكلامه فالصوت راح شوية فعلا بس رجع تانى بعدها بساعات.
تفتكروا ده ممكن يكون ايه؟ انا حبيت اسأل عشان اجمع اراء وابقى فاهم عشان لما اروحلو تانى ميشتغلنيش .. انا عموما لو الصوت على بكرة ماراحش هرجعلو تانى اخليه يركب ويجرب بنفسه بس اتمنى تقوليلى اراءكم.
ولكم جزيل الشكر