عربيتك قديمة وعايز تزود كفاءة التكييف؟؟ تعالى أقوللك تعمل إيه

في ناس كتير بتشتكي في الصيف إن التكييف شغال بس مش عامل حاجة، والعربية لسه حر

معظم الناس دي بتبقى عربياتهم قديمة... أو على الأقل اتعمل فيها شغل عند سمكري أو يمكن كهربائي

طب ليه كده؟؟؟


أهم حاجة عشان كفاءة التبريد تبقى كويسة إنك تعزل الصالون عن الجو الخارجي كويس، وده عن طريق إنك تمنع الهوا الخارجي يدخل الصالون من الأبواب


طيب ماحنا بنقفل الإزاز... عايز إيه تاني؟؟؟

أنا أقولك....

أولا: لازم تتأكد من سلامة الكاوتش حوالين الباب، وإنها قافلة كل الثغرات كويس... ومافيها حاجة مشققة

ثانيا: وده الأهم.... الكسوة الداخلية للأبواب... تحتها في طبقة عازلة للصوت والحرارة... ممكن تبقى فوم أو لباد أو حتى مشمع... الطبقة دي هي أهم جزء في الباب، وهي للأسف مخفية تحت الكسوة الداخلية


زي اللي في الصور دي

http://www.photo-banking.com/i/news/...assat-door.jpg http://t1.gstatic.com/images?q=tbn:A...LHra_RI1VcMTAm http://t1.gstatic.com/images?q=tbn:A...YGpkiVY5F_QwlQ http://t1.gstatic.com/images?q=tbn:A...xPWVTqFcT0RuTg


لازم تتأكد إن المادة العازلة دي موجودة وقافلة كل الفتحات كويس


الموضوع ده بيفرق بشكل كبير جدا... وعن تجربة

أنا كان عندي عربية تويوتا كريسيدا، وأبوابها كانت بتدخل صهد وانا مسافر... عشان كل المشمع العازل في الأبواب كان مش موجود (بعد كذا عمرة سمكرة طبعا)

في يوم كده اتحمست واشتريت مشمع وسيليكون اسود (زي بتاع الفبريكة)، وخلعت الكسوة الداخلية للأبواب .. وبعدين قصيت المشمع على قد الكسوة.. قدام وورا

وبعد كده نزلت ولزقت المشمع بالسيليكون (طبعا عملت حساب فتحة أكرة الباب والإزاز بس)، وبعدين ركبت الكسوة الداخلية

أول حاجة لاحظتها... صوت قفل الباب اتغير

تاني حاجة... العربية ما بقيتش فرن زي الأول

تالت حاجة... التكييف بقى عامل فرق واضح


للأسف ... معظم الصنايعية في مصر بيقابلوا حاجات في العربية بيعتبروها زيادات مالهاش لازمة (غالبا حتلاقيهم بيقولوا: هما حطين الحاجات دي عشان الشكل بس)

إنما الحاجات دي هي اللي بتعمل فرق في الأداء وبتطول عمر العربية


لو عايز تزود العزل في الكابينة أكتر... حط مادة عازلة في الأرضية والسقف... زي كده

http://t1.gstatic.com/images?q=tbn:A...EFsliMEOqSZYor



طبعا... فيه ناس هتقوللي : ما تركب أفلام العزل الحراري أحسن!!!


أول حاجة... أفلام العزل الحراري دي إعلاناتها في كل حته، وأنا كنت باتكلم على حاجة ناس كتير ما يعرفوش حاجة عنها، وبالذات في العربيات القديمة نسبيا

تاني حاجة... أفلام العزل الحراري تكلفتها من 3000 إلى 6000 جنيه عشان تغطي كل الزجاج بتاع العربية... أنا باتكلم في حاجة مش حتكلفك أكتر من 50 جنيه بالمصنعية.

تالت حاجة.... زجاج العربيات (الملون) الأصلي بيحجز جزء من الأشعة فوق البنفسجية اللي هي السبب في سخونية المقصورة (طبعا أقل من أفلام العزل الحراري)، وممكن تساعد كمان بوجود شماسات وستاير .. ودي مش حتكلفك أكتر من 200 جنيه للعربية كلها.


آخر حاجة .. وده الأهم... إنك من غير عزل كافي للكابينة.. ولا أجدع فيلم عازل هيمنع السخونية والصهد يدخل لك من الباب اللي جنبك ويهرب كل البرودة بتاعة المكيف.



...

شكراً على المعلومات والموضوع

تسلم ياباشا

موضوع ممتاز

موضوع مفيد وربنا يجعلة فى ميزان حسناتك

مشكور يا باشمهندس
موضوع جميل كالعاده :)

بس كنت عايز استفسر من حضرتك على حاجه بالنسبه للعربيات الكورى الحديثه نسبيا زى اكسنت 2010

هل في جهاز بيتحكم فى فصل كومبيرسور التكييف عند RPM العالى و لا لأ ؟.

و هل خطر او غلط انى اكون مشغل التكييف و اعلى سرعه دوران المحرك ل 5000 rpm مثلا ؟

اقتباس:

---

المشاركة الأصلية كتبت بواسطة MOTOR HEAD

مشكور يا باشمهندس
موضوع جميل كالعاده :)

بس كنت عايز استفسر من حضرتك على حاجه بالنسبه للعربيات الكورى الحديثه نسبيا زى اكسنت 2010

هل في جهاز بيتحكم فى فصل كومبيرسور التكييف عند RPM العالى و لا لأ ؟.

و هل خطر او غلط انى اكون مشغل التكييف و اعلى سرعه دوران المحرك ل 5000 rpm مثلا ؟

---

الحقيقة أنا معرفش هل كل الكوري الحديث كده ولا لآ

إنما لو اتكلمت على السيراتو اللي معايا.. فبكل ثقة أقوللك .. أيوه.. الكمبريسور بيفصل لما بتعمل كيك داون

والسبب الأساسي ما أعتقدش له علاقة بالكمبريسور ... إنما له علاقة بأداء العربية


عادة لما بتبقى عايز تسارع مفاجئ علشان تعدي من عربية قدامك مثلا .. بتبقى ساعتها عايز كل طاقة المحرك علشان تسعفك... والتكييف أكيد هيأثر على الموتور وهيضعف الأداء.


الحقيقة أنا ما جربتش أسوق لفترة طويلة على دوران عالي (5000 RPM).. وكل اللي بيحصل معايا مجرد ثواني ساعة اللزوم


لو فرضنا إن الموضوع ده له تأثير على نظام التكييف... فالمؤكد إن فيه Bypass معمول علشان الضغط الزيادة لإن دوران الموتور بيتغير باستمرار

وده اللي مخليني أقول إن الموضوع كله مالوش علاقة بالكمبريسور... إنما الغرض منه تعزيز الأداء.



...

الف شكر يا بشمهندس احمد

طمنتنى

جزاك الله خيرا

تسلم ايديك

للرفع والإفادة.. خاصة مع موجة الحر وبداية الصيف !!


...

شكرا علي الافاده

السلام عليكم ورحمة الله وبركاته موضوع اكثر من رائع وفعلا بيفرق فى التكييف انا عملت عزل لعربيتى العام الماضى عزلت الابواب والارضيه بلارمفلكس والسقف كمان وزوت السقف مع الارمفلكس بعزل الافران بيعزل الحرارة كويس بلزات السقف لانه معرض للشمس والحراره وعزله اهم جزء فى الموضوع وفى جزء هام الغاء التكييف السخن بيزود كفائة التبريد وكل الحجات دى انا عاملها بنفسى بدون مساعده من اى حد بس الموضوع محتاج صبر طويل لان فى اماكن ديقه والصاج حامى جدا بيعور انا مصور كل شغلى بس للاسف مش عارف ارفع الصور للمنتدى او انسق الموضوع بس لمايتعمل عزل صوت وحراره وكفائه للتكييف وشكرا يابشمهندس على موضوع مهم نبهت كل الزملا له وجزاك الله خير

اقتباس:

---

المشاركة الأصلية كتبت بواسطة Mohamed Desoky

السلام عليكم ورحمة الله وبركاته موضوع اكثر من رائع وفعلا بيفرق فى التكييف انا عملت عزل لعربيتى العام الماضى عزلت الابواب والارضيه بلارمفلكس والسقف كمان وزوت السقف مع الارمفلكس بعزل الافران بيعزل الحرارة كويس بلزات السقف لانه معرض للشمس والحراره وعزله اهم جزء فى الموضوع وفى جزء هام الغاء التكييف السخن بيزود كفائة التبريد وكل الحجات دى انا عاملها بنفسى بدون مساعده من اى حد بس الموضوع محتاج صبر طويل لان فى اماكن ديقه والصاج حامى جدا بيعور انا مصور كل شغلى بس للاسف مش عارف ارفع الصور للمنتدى او انسق الموضوع بس لمايتعمل عزل صوت وحراره وكفائه للتكييف وشكرا يابشمهندس على موضوع مهم نبهت كل الزملا له وجزاك الله خير

---

أولا.. أحب أحييك وأحيي كل اللي بيشتغل في عرببته بإيده.. وده إن دل على شيء فيدل على الحرص على إتمام العمل على أكمل وجه.


ثانيا... بالنسبة لإلغاء السخن...

بصراحة.. أنا مش مع الفكرة دي إطلاقا.. إنما مع التعديل على النظام بحيث أتحكم في دخول المية في الوقت اللي أحبه...

ببساطة... مجرد وضع محبس يدوي على خط السخن بيبقى أكثر من كافي... ﻹنك هتحتاج السخن بعد كده في الشتا... وأحيانا بتبقى محتاج تشغل التكييف ولكن بدرجة معتدلة خاصة في الربيع والخريف أو حتى في الصيف بالليل.. ولا يمكن توصل للدرجة المعتدلة إلا في وجود وصلة السخن.

فكرة المحبس دي مطبقة في السيارات اليابانية القديمة في الخليج... وكانت مرتبطة مباشرة بمؤشر الحرارة في التكييف.

تقدر تاخد فكرة أكبر من الموضوع ده:
http://www.nilemotors.net/Nile/408701-a.html


...

السلام عليكم ورحمة الله وبركاته شكرا لرد حضرتك يا بشمهندس انا بحب اعمل كل حاجه فى بيتى فى عربيتى حتى فى شغلى بحب اشغل دماغى وده لانى اتعلمت الميكانيكه فى ورشة خالى من صغرى لانى جيل السبعينات فى الاجازه المدرسيه مفيش حد ينام فى البيت كله يشتغل مفيش اختيار ده جيل السبعينات المهم موضوع الغاء التكييف السخن انا مقتنع انى مش محتاج السخن لا شتاء ولاصيف والغائه افضل لاسباب 1 ناس كتير بتستخدم مياه الحنفيه المليانه املاح وكلنا عارفين الصدا عامل ازاى فى الريداتير اللى ظاهر للعين ما بالك بلسربنتينه داخل الصالون فى مكان ديق وفيها اكيد صدا ومع الوقت المياه مع الصدا تدخل الصالون والموتور هيفضى المياه كلها فى الوقت ده لازم هتلغى السخن اجبارى بس وقتها هتحتاج تشيل الموكيت كله علشان الكمكمه ورائحة العفونه دى كارثه لوحدها لانها مش متروح بلساهل ده بلنسبه للاخوه اللى بيحط مياه حنفيه اما الناس الملتزمه بلمياه الملونه السربنتينه مش هتتاسر لكن التشتيت الحرارى مابين السخن والبارد الاثنين فى وش بعض ولازم السخن ياسر على كفاة التكييف ده طبيعى فى كل العربيات وفكرة المحابس دى انا كان عندى كورسيدا وكان فيها محبس غلق المياه السخنه عن الصالون فى الصيف وفتحها فى الشتاء بس برضه فى مياه هتفضل متجمعه فى السربنتينه واكيد مع الوقت هتصدى دى وجهة نظرى وانا شايف ان الغائه افضل من ابقائه والف شكر لحضرتك

اقتباس:

---

المشاركة الأصلية كتبت بواسطة Mohamed Desoky

السلام عليكم ورحمة الله وبركاته شكرا لرد حضرتك يا بشمهندس انا بحب اعمل كل حاجه فى بيتى فى عربيتى حتى فى شغلى بحب اشغل دماغى وده لانى اتعلمت الميكانيكه فى ورشة خالى من صغرى لانى جيل السبعينات فى الاجازه المدرسيه مفيش حد ينام فى البيت كله يشتغل مفيش اختيار ده جيل السبعينات المهم موضوع الغاء التكييف السخن انا مقتنع انى مش محتاج السخن لا شتاء ولاصيف والغائه افضل لاسباب 1 ناس كتير بتستخدم مياه الحنفيه المليانه املاح وكلنا عارفين الصدا عامل ازاى فى الريداتير اللى ظاهر للعين ما بالك بلسربنتينه داخل الصالون فى مكان ديق وفيها اكيد صدا ومع الوقت المياه مع الصدا تدخل الصالون والموتور هيفضى المياه كلها فى الوقت ده لازم هتلغى السخن اجبارى بس وقتها هتحتاج تشيل الموكيت كله علشان الكمكمه ورائحة العفونه دى كارثه لوحدها لانها مش متروح بلساهل ده بلنسبه للاخوه اللى بيحط مياه حنفيه اما الناس الملتزمه بلمياه الملونه السربنتينه مش هتتاسر لكن التشتيت الحرارى مابين السخن والبارد الاثنين فى وش بعض ولازم السخن ياسر على كفاة التكييف ده طبيعى فى كل العربيات وفكرة المحابس دى انا كان عندى كورسيدا وكان فيها محبس غلق المياه السخنه عن الصالون فى الصيف وفتحها فى الشتاء بس برضه فى مياه هتفضل متجمعه فى السربنتينه واكيد مع الوقت هتصدى دى وجهة نظرى وانا شايف ان الغائه افضل من ابقائه والف شكر لحضرتك

---

أنا كمان كان عندنا تويوتا كريسيدا 82 (جنباها زيرو من الكويت) .. وفضلت معايا لحد 2010... كان المحبس زي كده لو تفتكر:

http://repairguide.autozone.com/znet...528004ff67.gif

وبصراحة أنا شايف المحبس فكرة مريحة لجميع الأطراف... ولحد ما بعت العربية في 2010.. ما احتجتش أغير السربنتينة الداخلية.. مع إن المية كانت بتفضل في السربنتينة راكدة طول الصيف .. وكنت باستخدم مية الحنفية!!!

يمكن علشان الكريسيدا حالة خاصة!!!

ده غير إني فعلا كنت بحتاج الدفاية في الشتا .. خصوصا وانا سايق بالليل في المطر في اسكندرية... أو حتى وأنا سايق على الصحراوي في الشتا... فما كانش ينفع استغنى عنه.


حاليا.. أنا معايا السيراتو.. وعايش في جدة (يعني معندناش شتا أصلا).. بس بحتاج السخن في العربية علشان اضبط درجة الحرارة خصوصا بالليل.. وإلا الأولاد هيبقوا كل يوم عند الدكتور علشان واخدين برد من التكييف.

على فكرة.. المحبس ممكن يتفتح نص فتحة.. تديك معدل سريان قليل للمية ... وبكده تبقى مسكت العصاية من النص.


...

الله ينور عليك بظبط هوده المحبس بتاع التويوتا كورسيدا فكرتنى بلعربيات الفاخره القويه وفيها كمان ستائر خلفى وعلى الابواب الخلفيه وكانت وسعه جدا الله يرحم ابى كانت عشقه الكورسيدا الحمد لله على كل شئ موضوع الغاء السخن ده مريحنى انا لكن لو عادى بلنسبه للاخوه الزملاء مفيش اى مشكله هو مجرد عرض او فكره بمعنى تانى انا برفض اى تعديل فى السياره مهما كان بسيط كان زمان بشوف ناس بتشيل ترموستات الكوعه وبرفض الفكره دى خالص لكن فى التكييف الوضع مختلف خالص انا عايز اهرب من الحر باى شكل اسوق العربيه وانا مش عرقان اخلص مصلحتى وانا هادى الحر فى مصر مع زياده الاسعار وقرف العيال كل ده بيخلى الواحد هيطلع من هدومه واحب اطمن حضرتك الصيف فى مصر زى الصيف فى السعوديه نار نار

انا لغيت الساخن بسبب ان السربنتينه اتخرمت وغرقت الصالون
واضطريت لفك موكيت الارضيه وكانت شغلانه كبيره
الحمد لله كفاءه التكييف احسن بكتيير عن الاول
وعلى فكره الساخن مهم جدا فى الشتاء لو الزجاج الامامى مشبر من الداخل

اقتباس:

---

المشاركة الأصلية كتبت بواسطة sherif mandoor

انا لغيت الساخن بسبب ان السربنتينه اتخرمت وغرقت الصالون
واضطريت لفك موكيت الارضيه وكانت شغلانه كبيره
الحمد لله كفاءه التكييف احسن بكتيير عن الاول

---

الله اكير ظهرالحق انتى فين ياعم من كام يوم يعنى انا كده كلامى صح طمنى عملت ايه فى الريحه لما السرينتينه اتخرمت لانى شوفت الويل منها

اقتباس:

---

المشاركة الأصلية كتبت بواسطة mohamed desoky

الله اكير ظهرالحق انتى فين ياعم من كام يوم يعنى انا كده كلامى صح طمنى عملت ايه فى الريحه لما السرينتينه اتخرمت لانى شوفت الويل منها

---

اخبارك ايه الحمد لله
الموضوع ده حصل فى الشتاء وفكيت الموكيت كطله وننشفت الارضيه كويس جدا
وسبتها من غير الموكيت لمده شهر وركبت كل حاجه بايدي من الموكيت والكونسول

اقتباس:

---

المشاركة الأصلية كتبت بواسطة mohamed desoky

الله ينور عليك بظبط هوده المحبس بتاع التويوتا كورسيدا فكرتنى بلعربيات الفاخره القويه وفيها كمان ستائر خلفى وعلى الابواب الخلفيه وكانت وسعه جدا الله يرحم ابى كانت عشقه الكورسيدا الحمد لله على كل شئ موضوع الغاء السخن ده مريحنى انا لكن لو عادى بلنسبه للاخوه الزملاء مفيش اى مشكله هو مجرد عرض او فكره بمعنى تانى انا برفض اى تعديل فى السياره مهما كان بسيط كان زمان بشوف ناس بتشيل ترموستات الكوعه وبرفض الفكره دى خالص لكن فى التكييف الوضع مختلف خالص انا عايز اهرب من الحر باى شكل اسوق العربيه وانا مش عرقان اخلص مصلحتى وانا هادى الحر فى مصر مع زياده الاسعار وقرف العيال كل ده بيخلى الواحد هيطلع من هدومه واحب اطمن حضرتك الصيف فى مصر زى الصيف فى السعوديه نار نار

---

مش مختلف معاك والله :)

لو حضرتك تابعت موضوعاتي هتلاقيني دايما بقول "خليك مع كتالوج العريية"... والكتالوج دايما بيقوللك حط مياه التبريد الملونة

يجوز اللي حصل معايا في الكريسيدا كان حالة خاصة.

ومن وجهة نظري أنا شايف إن الحل المثالي هو استخدام المحبس مع مياه التبريد الملونة وثرموستات الكوعة راكب وشغال صح.

غير كده... أكيد هتاخد حاجة ناقصة.


...

اقتباس:

---

المشاركة الأصلية كتبت بواسطة borio1704

مش مختلف معاك والله :)

لو حضرتك تابعت موضوعاتي هتلاقيني دايما بقول "خليك مع كتالوج العريية"... والكتالوج دايما بيقوللك حط مياه التبريد الملونة

يجوز اللي حصل معايا في الكريسيدا كان حالة خاصة.

ومن وجهة نظري أنا شايف إن الحل المثالي هو استخدام المحبس مع مياه التبريد الملونة وثرموستات الكوعة راكب وشغال صح.

غير كده... أكيد هتاخد حاجة ناقصة.


...

---

ده انا متابع موضوعاتك يا هندسه خصوصا موضوع الزيت انا بعتبره مرجع اساسى فى المنتدى انا اتعلمت منه معلومات ماكنتش عارفها فى حياتى فى درجات الزيوت انا بشكرك هومتاخر وناس كتير شكرتك انا سنى يمكن اكبر منك 45 سنه واهلى ميكانيكيه وفى سمكريه كل الطوائف وانا من الجيزه من منطقه شعبيه وكلها صنيعيه و16 عربيه ركبتهم وبعمل كل حاجه ميكانيكه او عفشه لاى عربيه جبتها فى حياتى وبعمل الصعب جوان وش سلندر بغيره بنفسى وكاتينه وطقم شنير غيرته بنفسى 132 2000cc كل حاجه بعون الله بعملها الا الكهربه صعبه عليه شوف كل ده وانا بقولك انتى علمتنى ازاى اختار الزيت انا فخور بحضرتك ان فى شباب مصرى ولسه دماغه شغاله بره البلد وجوه البلد ربنا يبارك فيك ويديم المحبه بين الزملاء فى المنتدى وكل عام وانتم بخير وشكرا لحضرتك

اقتباس:

---

المشاركة الأصلية كتبت بواسطة mohamed desoky

ده انا متابع موضوعاتك يا هندسه خصوصا موضوع الزيت انا بعتبره مرجع اساسى فى المنتدى انا اتعلمت منه معلومات ماكنتش عارفها فى حياتى فى درجات الزيوت انا بشكرك هومتاخر وناس كتير شكرتك انا سنى يمكن اكبر منك 45 سنه واهلى ميكانيكيه وفى سمكريه كل الطوائف وانا من الجيزه من منطقه شعبيه وكلها صنيعيه و16 عربيه ركبتهم وبعمل كل حاجه ميكانيكه او عفشه لاى عربيه جبتها فى حياتى وبعمل الصعب جوان وش سلندر بغيره بنفسى وكاتينه وطقم شنير غيرته بنفسى 132 2000cc كل حاجه بعون الله بعملها الا الكهربه صعبه عليه شوف كل ده وانا بقولك انتى علمتنى ازاى اختار الزيت انا فخور بحضرتك ان فى شباب مصرى ولسه دماغه شغاله بره البلد وجوه البلد ربنا يبارك فيك ويديم المحبه بين الزملاء فى المنتدى وكل عام وانتم بخير وشكرا لحضرتك

---

يشرفني طبعا إني قدرت أضيف معلومة جدبدة لحضرتك ولكل الإخوة الزملاء في المنتدى...

وصدقني.. أنا هدفي الأساسي هو نشر الوعي وثقافة السيارات الصحيحة في مقابل كمية كبيرة من التعامل بجهل .. وده شيء توارثناه من أجيال وأصبح للأسف السمة السائدة في مجتمعنا المصري والعربي في كل نواحي الحياة... مش السيارات فقط.

وأنا شخصيا معنديش مشكلة أبدا إني أتعلم حاجة جدبدة من أصغر واحد .. ده أنا بقيت أتعلم من ابني اللي عنده 10 سنين.

على فكرة أنا مش أصغر منك بكتير يعني... الموضوع كله سنتين :)


...

ربنا يبارك فى صحتك واولادك ويبارك فى مالك يعنى انتى كده سبعيناتى جيل فراخ الجمعيه فاكر