ازيكم يا شباب
انا كنت عايز اسال الميجان 2006 الواحد يبعد عنها لانى بسمع كتير ان فيها مشاكل فى الفتيس ولا الكلام ده كله اشاعات و يتوكل على الله و يشوف واحدة كويسة ؟؟؟؟
ازيكم يا شباب
انا كنت عايز اسال الميجان 2006 الواحد يبعد عنها لانى بسمع كتير ان فيها مشاكل فى الفتيس ولا الكلام ده كله اشاعات و يتوكل على الله و يشوف واحدة كويسة ؟؟؟؟
انا معاك
في العموم و احصائيا , و انا ماعرفش السبب بالظبط لحد دلوقت
كثافة المشاكل في الشكل الاقدم اكتر كتير من الشكل الاحدث
الشكل الاحدث نزل اخر 2006
خليك في موديل 2007 أو أحدث
بلاش 2005 او 2006
هو المشاكل اللى فى الموديل القديم مش اتحلت
زى السوفت الجديد للفتيس و ترس الديفيزر الجديد ؟؟؟؟؟؟
ايه تانى ممكن يعمل مشاكل؟
2006 من الزيرو ماقبلتنيش اي مشكله الي 2012
2006 استعمال سنه . الحمد لله مفيش مشاكل .
معايا 2009 بقالهاسنتين . حلوه بس 2006 افضل بكتير عن تجربه
انا احترت بصراحة
والله يا باشا أنا حيران زيك برضو .. مع انى من فترة كنت عامل تقريبا موضوعين عن الميجان وانى عاوز اشتريها وانى معجب بيها جدا بقالى سنين .. وفى الاخر خوفت منها و روحت جبت سيتروين اكسارا 2001 لانى كنت مستعجل على عربية بس مكنتش حابب لا كوري ولا ياباني ... بس دلوقتي عاوز ابيعها ( وربنا يشهد العربية دى والله حمالة اسيه ) ببقا قاصد ابهدلها واحطها فى مواقف صعبة ومابتقولش لاء .. وفين وفييين لما بروح لميكانيكي ولا لكهربائي
بس مشكلتي الوحيدة معاها انها واطية اوى و كمان زهقت من الهاتش باك وعاوز اجيب سيدان .. فبدءت افكر تاني فى الرينو ميجان ... بس بقالى اسبوعين اهو عمال اقرا فى حاجات غريبة عن الميجان وعن مشاكل غريبة بتحصل للاعضاء هنا .. واللى يقول انا عمري ما شوفت ميجان على طريق سفر لان الناس بتخاف تسافر بيها .. واللى يقول مشاكل فى الحرارة مابتخلصش ومشاكل فى الفتيس لو موديل قديم وكترت اوى مشكلة ان العربية مش بترضى تدور .. ومشاكل مش عارف فى ايه.. والخ الخ الخ ( مع انى عارف ان الميجان لازم يتحافظ عليها ولازم تتصين فى معادها ، بس والله الواحد بدء يحس خلاص انه لازم يروح لميكانيكي او كهربائي كل اسبوع تقريباً !! ) انا بحبها جداً وعارف انها هتقرفني حتى لو حافظت عليها وهتعمل حاجات مش متوقعه .. بس مش عارف ليه ،، احساس كده وخلاص !! يمكن من كتر الكلام عليها وعن مشاكلها .. مع ان فى عربيات زيها برضو وبيحصل فيها تقريباً نفس المشاكل .. بس انا علشان حاببها وعاوز اشتريها فمقلق منها جداً .. لكن لو عربية تانية وبتعمل نص مشاكلها مش هفكر فيها وهشوف واحده غيرها .. بس الميجان عشق بقالها سنين و نفسي اشتري واحده ان شاء الله ...
معلش صدعتك ،، بس انا متابع موضوعك ويارب الاعضاء يفيدونا .. وكل سنة وانتم طيبين
من الآخر يا جماعة و عشان ما تتعبوش نفسكم
الميجان
حالة + صيانة + تكون اقامتك في مدينة فيها صنايعية رينو عشان ما تخليش اي حد يفتي في عربيتك كل ما تعوز تعمل حاجة
بسسسسس , حققت المعادلة دي , هاتها و انت متطمن
ما حققتهاش , بلاش
اما كلام ماحدش بيسافر بيها و ما بتسافرش و الكلام العجيب ده
فكل واحد عارف هو عامل ايه مع عربيته في المعادلة السابقة , و بالتالي عارف هي هاتعمل معاه ايه
من خلال متابعتى ومشاركات الكثير من الاعضاء فا ابعد عنها
والله عربية ركوبة ومحترمة جداً بس المشكلة فى المستعمل هيا الأمانة من البائع لان العربية كلها كماليات وتكنولوجى وحساسة وبنت ناس عايزة معاملة خاصة وصيانة دورية فلو انت ضامن البائع اتوكل على الله غير كده بلاش
اللي يضمن هو الكشف في التوكيل , و في التوكيل فقط و لو اتنازلنا شوية يبقى مركز خدمة معتمد غير كده لأ
اللي عاوز ميجان نظيفه يدور من 70 وانت طالع
60 وانت نازل لا مؤاخده هي اللي هتركبه مش هو هو اللي هيركبها السنة مش مهم بس 2006 أفضل مط 2005
2006 بدون مشاكل تقريبا
مفيش عربيه مافيهاش عيوب .. كل العربيات فيها عيوب بس ده بيرجع لاحتياجاتك ..
وفي عيوب عاديه وفي عيوب قاتله
الميجان عيوبها عادية جداً زي الفتيس مش ناعم . تكييفها متوسط . وطبعاً يفضل صيانتها في مراكز معتمده لكثرة التكنولوجيا
لو قارنت الميجان بعربيات تانيه زي الجيتا مثلاً هتلاقي الجيتا كل ال ركبها كره نفسه بسبب الفيتيس dsg. ونفس الفتيس في الباسات والابيزا الجديده .. والجيتا واطيه عن الارض واعطلها كتير قوي بسبب الفتيس واتحدي اي حد معاه جيتا او باسات ومشي بيها فوق 100000 كيلو من غير مايغير فيتيس او يبعها ..
او قارنت الانسر بالميجان ... وطبعاً احنا كده بنظلم الانسر
هتلاقي الانسر مافيهاش 10% من الاوبشن ال في الميجان ده غير إن الثبات مش حلو ووسائل الامان قليله
والله الميجان اتظلمت في مصر بسبب جهل السوق والناس بس ده مايمنعش إن ال ركب الميجان بيجيله حالة ادمان وبيبقي مش عايز يغيرها
خلاصة الكلام ... توكل علي الله واشتري الميجان وانت مغمض وحاول تتأكد ان حالتها كويسه عن طريق الكشف في التوكيل او مركز متخصص
وبالتوفيق
من الواضح ان الناس هنا زيى قلقانة برضه - بس مش عارف ليه برضه الواحد حابب العربية - حاجة غريبة جدا.
بس الناس اللى ردت بالايجاب عن العربية - انا بس عايز اتاكد منكم فى موديل 2006 لان سعره فى المتناول اللى هو الستينات 65-69 الف هل فيها مشاكل 2005 ولا لأه.؟؟؟؟؟؟
هو ايه الفرق بين 2005 و 2006 مش المفروض انهم غييروا الموديل 2007
ارجو المعرفة لانى باخطط اشترى رينو ميجان قريب
و ِشــــــــــكـــــــــر ا ا ا
من اول 2007 الاضاءة ابيض مش برتقالى وانا شايف البرتقالى اشيفك بكتير كمان شكل الفوانيس متغير بسيط من الامام والخلف وتقريبا كل حاجة واحد وبالنسبة لموديل 2006 مفهوش اى مشاكل عن تجربة وعربية محترمة جدا بس اهم حاجة حالتها عشان متتعبكش واهم حاجة صلاة الاستخارة
توكلنا على الله. ربنا يعترنا فى حاجة كويسة.
مهم تكشف في التوكيل او مركز معتمد قبل ما تشتري
مهم تعمل حسابك انك تصين العربية بانتظام لما تشتريها ان شاء الله
مهم تبقى مقيم في مدينة فيها صنايعية رينو , يعني لو من القاهرة او اسكندرية يبقى تمام اوي , ليه ؟ عشان ما تلاقيش نفسك بتدي العربية لحد مش فاهمها يعك فيها لأنك بتكسل تضرب المشوار لحد القاهرة او اسكندرية مع كل صيانة او كل قطعة تعوز تتغير و ده حقك طبعا
ان حققت ال3 شروط دول يبقى ان شاء الله ما تقلقش
طب سؤال تانى معلش يا استاذ تامر.
بالنسبة للصيانة - لازم ادور على عربية تكون عاملة صيانتها بالتوكيل؟؟ ولا ممكن اشوف عربية عاملة صيانة برة التوكيل - على اساس انه ممكن لما اكشف عليها فى التوكيل يقولى كويسة ؟؟؟
النقطة التانية - الصيانة المنتظمة تبقى ازاى - يعنى كل مثلا 10 الاف كيلو اوديها لمركز الصيانة ولا اول ما تدينى انذار لاى عطل مسيبوش ؟؟؟
الصيانه العاديه كل 10 الاف مع مراعة اى حاجه بايظه تتغير فى الحال لان تبعيتها كبيرة
وعاما كل الى بيذم فى العربيه ويقلك بالاش دة واحد من التى
1- سامع كلام وخلاص من السوق واحنا فى مصر
2-اشترى عربيه متبهدله من غير ميكشف عنها كويس فى التوكيل او مركز خدمه
3-أكيد معهوش ميجان
استحاله تلاقى واحد معاة ميجان نضيفه بيقول كلمه غلط فيها لان فعلا هى ركوبه جامدة جدا
انا نازل من أوكتافيا a4 سنتين وركبت ميجان 2 بانوراما 2006 وبقالها معايا 3.5 سنين
حسيت انى مكنتش راكب عربيه علشان الاوبشنز فى الميجان حدث ولا حرج
بس هى عايزة عنايه فائقه علشان متتعبش صاحبها
ولو هتتكلم عن اى عربيه غير كورى الصيانات متقاربه جدا
ترس الديفيزر دا اتغير من زمان ... فى الأول كان بيبوظ عشان عيب صنع ... دلوقتى بيبوظ برضه بس عشان عمره انتهىاقتباس:
المشاركة الأصلية كتبت بواسطة broadband
وهو جزء استهلاكى بيتغير بمرور الوقت .... وسعره خارج التوكيل حدود 1100 جنيه
عملوا سوفت وير لفتيس ال 2005 ومفيش فرق بين فتيس ال 2005 وال 2007
عايز أنوه إنى من المنيا ومفيش صنايعية متخصصين فى الرينو وهى أول عربية اشتريها واتعلمت القيادة عليها .... وبعملها صيانات كتير بنفسى .... ولولا كدا كنت هتعب ... مبيعملش الشغل فيها صح غير صنايعية الرينو ... وصنايعية الرينو فى صقر والحرفيين للأسف أغلبهم مش تمام ... وكلهم أسعارهم فى العالى ... وبيعملوا أحلى شغل ع الزبون
ولولا أنا بسعى أنى أعمل فيها شغل بنفسى كان زمانها اتباعت أو بقت خردة ...
هقولك مثال بسيط
أنا بفك نظام التعليق الأمامى بالكامل والكبالن بنفسى
بس عشان تغير مساعد أو بطاحة لازم يكون معاك زرجينة تضغط بيها السوستة
كنت بفكها بنفسى وأروح أوديها لصنايعى فى مركز سمالوط عندنا مشهور جدا وبالحجز كان بيضمهالى وأديله 10 جنيه
والدى قال لى شغلك مش حلو .... وهو أساسا ميفهمش حاجة فيها بس عقدة الصنايعية ... زمايله فى الشغل كلهم بيروحوا لصنايعية ... إلا هو ... فهو حاسس بالنقص عايز يبقى زى كل الناس يروح عند الصنايعى ههههه
جاب 2 مساعد ... وأصر إن الصنايعى المشهور دا يركبهم بنفسه .... وبالفعل رحت ووقفت عليه وهو بيركب المساعدين الجداد ... مش عايز أوصفلكم الغباء فى التعامل والخبط على اجزاء السيارة عامل إزاى
غير أنه مش طايقنى وأنا واقف جنبه وأنا بقوله على مهلك ونوهت عليه عشان حساس abs قالى بعيد قلتله بس خلينى أخلعه قالى بعيد يا بيه وسيبنى أشتغل
وهو بيجمع المساعد الجديد السوستة بيبقى ليها حد بترشق فيه من فوق فى البطاحة ومن تحت فى المساعد
المهم هو خلى بداية السوستة قبل حد المساعد وقالى لما يركب فى العربية هيضبط لوحده حاولت فيه يمين شمال مقدرتش عليه
ركب النظام وخد 70 جنيه ... وجيت أجرب لمبة ال abs نورت .... نزلت شفت لقيت حساس ال Abs مخلوع من مكانه رحتله قال لى مش أنا هو نصيبه كدا أعتبر نفسك عملت حادثة
دا غير السوستة اللى راكبة غلط دى معرفش هتبوظلى المساعد و لا هتنيل إيه بالضبط هشترى زرجينة وأفك وأعملها تانى
أمال لو مكنتش واقف معاه كان عمل إيه ... دا غير الخبط اللى خبطه على المساعد وعلى العربية من تحت بغباء وأنا بفك المساعد وأركبه بكل سلاسة ومن غير خبط بالشكل دا
فالأفضل يشتغل فيها صنايعية الرينو اللى هما موجودين بكثرة فى القاهرة والإسكندرية مش عشان أمانتهم لا هما شماطين .... بس عشان عكوا فيها كتير وحفظوها وحياتك ولسة فيه أعطال لحد الوقت بتحيرهم
بالنسبة للصيانة بعد الشراء ان شاء الله مش هازود على اللي الزميل solly1979 قالهاقتباس:
المشاركة الأصلية كتبت بواسطة mada0202
بالنسبة للصيانة قبل الشراء فالعربية اللي صياناتها توكيل الناس بتدور عليها بملقاط و اللي بيلاقيها ما بيسيبهاش :))))
و ده ما يغنيش عن الكشف طبعا
لكن برده ممكن تبص على عربيات بتعمل صياناتها برة و لما تحس ان حالتها كويسة ممكن طبعا تكشف توكيل و يقولوا لك بالظبط فيها ايه
طبعا مفيش حاجة أسمها لازم أشترى عربية تكون صيانة توكيل مش بس فى رينو فى اى ماركة ولكن هيكون أفضل طبعا لكن متخليهوش شرط ..... وممكن برضه تكون صيانة توكيل وتكون معيوبة وقليل اللى بيعمل صيانة فى التوكيل للميجان وهتدفعلك من 5 ل 10 آلاف زيادة عن سعر السوق