تعالي يا بنتي أفتح لك المصحف

**OlaOsman** · 18-10-2008 01:06 AM

فتاة في سن ال33.. سبق لها الخطبة مرتين و ما حصلش نصيب انها تكمل.. قرأت لها في مدونتها التدوينة التالية و استغربت جدا بصراحة اننا لسه عايشين في الدجل ده لحد دلوقتي.

تعالي يا بنتي أفتحلك المصحف !!!

العنوان غريب جدا طبعا
لإننا غالبا بنسمع مصطلح : نفتح الكوتشينة أو المندل
لكن فتح المصحف ... جديدة وغريبة فعلا
من كام يوم فوجئت بإنسانة كنت باعتبرها في يوم من الأيام أخت ليا بتتصل بيا وتقولي إنها اتكلمت مع ست كبيرة بتعالج بالقرآن .....
غ : أيوة يا إيمان أنا لقيت ست طيبة وكبيرة وبتعالج بالقرآن .
أنا : أيوة طب أنا مالي ؟!!!
غ : مش يمكن معمولك حاجة بوقف الحال ... هي مش بتعمل حاجة غير إنها بتقرا قرآن ومش هاتخسري حاجة .
أنا : طب لو سمحتي يا غ ماتجيش غير لما أديكي الأوكيه ... ماشي ؟
غ : ماشي خلاص هاتنسى منك تليفون .
وفوجئت بيها في نفس اليوم الساعة 7 بالليل جايه وجايبة معاها الست إياها
طبعا رحبت بيهم أنا وماما ودخلناهم البيت
الست قعدت تتكلم عن نفسها وإنها عملت عمرة وحجيت وبدأ العجب العجاب أول ما قالت : وأنا في المدينة المصحف اتفتحلي !!!
أنا : المصحف اتفتح ؟ إزاي يعني أنا أول مرة أسمع الموضوع ده !!!
هي : لأ إزاي ده الشيخ الشعراوي اتفتحله المصحف في المدينة برضه .
أنا : الشيخ الشعراوي دلوقتي الله يرحمه خلينا في حضرتك .
استأذنت الست علشان تتوضى
بصيت لصديقتي وسألتها بعصبية : هو المصحف دلوقتي بيتفتح يا غ ؟ كلام ربنا دلوقتي بقى زي الكوتشينة والمندل ؟
ابتسمت وقاليتلي : مش هاتخسري حاجة ولو معمولك سحر المفروض تفكيه بسحر زيه مش حرام .
أنا : إزاي مش حرام ؟ إذا كان التعامل مع الجن على إطلاقه حرام وده مش كلامي ده كلام علماء موثوق فيهم ؟ والرسول قال : تداوا ولا تتداوا بحرام .
غ : مش برضوا بيقولوا فداوني بالتي كانت هي الداء ؟
أنا : يعني أسيب حديث الرسول علشان خاطر بيت شعر ؟!!!!!
غ : لأ ده مش شعر ده في الشرع !!!
أنا : شرع مين ؟ أنا جيبتلك حديث صحيح ، هاتيلي انتي بقى آية أو حديث يثبتوا بيت الشعر إللي انتي بتقوليه ده !!!!
سكتنا لما الست رجعت تاني وبدأت أنا أقرأ آية الكرسي والإخلاص والمعوذتين في سريقعدت على الأرض وقعدتني قدامها
ولعت البخور - بخور آل البيت البركة - وطلبت مني أعدي فوقيه 7 مرات
قولت أشوف آخرها
جابت ميه في طبق غويط وقعدت تقرا عليها بصوت واطي قوي فسألتها : حضرتك بتقري إيه ؟
هي : قرآن ... فيه شفاء من كل شيء هو أنا هاقرا غير القرآن !!!!
طلبت مني أشرب الميه وغسلت بيها وشي كمان
بعدين طلعت مصحف قديم جدا وطلعت مفتاح كبير وقديم مربوط فيه شريطين خضر
حطيت المفتاح جوا المصحف زي ما بنحطه في كالون الباب
وقفلت عليه المصحف ولفت الشريطين على المصحف علشان يمسك المفتاح ومايفلتش منه
ومسكت طرف المفتاح بصوباعين اتنين وبدأت تقول : السلام عليكم ، إذا كنتوا قبلتوا السلام لفوا ناحية اليمين ، وإذا كنتوا رفضتوه لفوا ناحية الشمال .
طبعا هي زقت المفتاح بصوابعها علشان المصحف يلف ناحية اليمين وأنا قاعدة قدامها وشايفة
فسألتها : حضرتك بتكلمي مين ؟
بصلتي باستغراب وقالت : دول عباد لله مسلمين وموحدين زينا بالضبط .
غ (صاحبتي) : دول خُدام المصحف .
أنا : بس المصحف مالهوش خدام ، المصحف ربنا حافظه بنفسه !!!!
الست اتنرفزت وقاليتلي : يعني انتي هاتفهمي أكتير مني ؟
أنا : أنا ماقولتش كده .
هي : اسمك إيمان بنت مين ؟
أنا : إيمان بنت حسين .
هي : !!!! اسمك أمك يا بنتي مش أبوكي .
أنا : بس حرام تسأليني عن اسم أمي .
هي : حرام إزاي هو انتي هاتفهمي أكتر مني ؟
أنا : لأ ده مش كلامي ده كلام العلماء إللي في التليفزيون هما قالوا إن ده حرام ، حتى ربنا قال في القرآن : ادعوهم لآبائهم ... (وبدأت أتنرفز على الست أنا كمان )
هي : ده في الآخرة ...
أنا : لأ ده الآية دي نزلت في الدنيا مش في الآخرة .
هي : خلاص ماهو العلماء دول بيفهموا أكتر مننا بقى وانتي أعلم مننا كلنا .
أنا : يا أمي بالله عليكي ماتقولينيش كلام ماقولتهوش .. ده كلام ناس درست وفهمت وعرفت مش كلامي ولا من دماغي .
كل ده وصاحبتي عمالة تغمزلي علشان أسكت وأتابع الموضوع وتقول للست : ماهو بتوع التليفزيون دول بيخربوا عقول الناس !!!!
وطبعا الست سألت خدام المصحف تاني وعرفت إن عليا أسياد وإن أنا سبب المشاكل إللي في البيت والابتلاءات كلها !!!
وإني إذا آمنت باللي هي بتعمله ووافقت إنها تعالجني كل ده هايروح وهانبقى كلنا زي الفل !!!!
طبعا أنا رفضت لإني مش هاخسر آخرتي علشان دجل وشعوذة
الست غضبت ولمت عزالها ومشيت
وصاحبتي جات تسلم عليا بعدت عنها
ومسكت ماما عند الباب تقولها : إيه إللي إيمان بتعمله ده ، إزاي تقول كده هي مش مؤمنة ؟!!!
المهم نزلوا هما الاتنين وطلبت من ماما إن الإنسانة دي ماتدخلش البيت تاني
تاني يوم هي اتصلت تتطمن عليا ماما دخلت فيها شمال وقالتلها إني ماعنديش أي استعداد أتعامل معاها تاني وأحرجتها جامد في الكلام .
والحمد لله على نعمة العقل والعلم
قعدت يوميها فعلا أحمد ربنا كتير إني عارفة وفاهمة ومش جاهلة
أنا مش بانكر حقيقة المس والسحر
بس فيه علاج يرضي ربنا
وفيه علاج يغضب ربنا
والحلال بين والحرام بين
أسأل الله لي وليكم أن ينفعنا بما علمنا
اللهم آمين

**moh_kamal67** · 18-10-2008 01:24 AM

كلام سليم ، المشكلة ان البشر تستغل الضعف النفسى اللى عند البشر ، يعنى واحدة ابنها عمال يسقط ، يمكن قدرات الولد موش قد كده ويمكن الدكتور ولا المدرس مستقصده ، ولأن هناك حالة ضعف نفسى ساعتها يمكن البشر ان ينزلقوا ويصدقوا ويستسلموا
دى بيسموها سيكولوجية النصاب
ممكن وانتم على الانترنت تبحثوا عنها وتقرأوا فيها
اللهم مالنا الاسواك اقدارنا بيديك احفظنا من شر كل ذى شر وجنبنا الفتن

**OlaOsman** · 18-10-2008 01:31 AM

المشكلة في الناس اللي مؤمنة تمام الإيمان بالخزعبلات دي.. هو ايه اللي جرى للناس؟ فين الإيمان و التسليم بإن لكل شئ معاد ربنا محدده ما ينفعش حد يتدخل فيه عشان يعدله بطرق غريبة زي دي و كمان استخدام المصحف في النصب ده شئ مخجل الصراحة.

**Mohd_Adel_Amin** · 18-10-2008 01:33 AM

الموضوع ده كاااارثة بكل المقاييس ..
وللأسف منتشر بين الناس جدا ...
كان حصل لنا موقف مشابه .. كان لي عمة مش بتخلف وكان بيجيلها شيخ (حسب كلامها ) وبتقول انها ارتاحت معاه وهتجيبه لينا ..
وفعلا جابته وقعد الأول مع والدي وقدر يوهمه بدجله واحتياله .. ووالدي قام من قدامه مش طبيعي ومتغير خالص .. لما الوالدة شافت المنظر ده عرفت ان الراجل ده بيتعامل مع الجن .. راحت قالت كده للوالد مصدقش فراحت اثبتت كده لينا كلنا بطريقة بسيطة جدا ..
راحت توضأت قبل ما تروحله و كانت طول ما هي قاعدة قدامه وهي تقرأ المعوذات وآية الكرسي (والدتي منتقبة علشان كده الراجل ده مكانش يعرف ) .
وبقدرة الله سبحانه وتعالى مقدرش يحرك ولا حتى انمله من أناملها .. مع انه كان مبهدل والدي بحركات لا ارادية كانت بتحصل (زي ان صوابعه تتحرك لوحدها وايديه تطلع وتنزل لوحدها)
قام والدي بعده أعاد نفس التجربة وكانت نفس النتائج ,, وبفضل الله اكتشفنا دجل الراجل ده وطلعناه خارج البيت فورا .. وبعدها حرصنا ان كل بقعة من البيت يقرأ فيها القرآن حتى اننا قرأناه على ماء ورشيناه في كل ارجاء المنزل ..

وربنا يستر علينا وعلى المسلمين جميعا من شر الفئة دهية .. ويحفظ البنت دهية لأنها بفضل الله واعية وسوية وعلى الفطرة الصحيحة .. ويرزقها بخير الصالحين في الدنيا والآخرة .....

**blazer** · 18-10-2008 01:37 AM

اللجؤ للناس دى بيكون السبب فيها اولا هو الجهل
وبعد كدا حبه حاجات منها ضعف الايمان و قله التدين

**waled369** · 18-10-2008 02:00 AM

التعامل مع هؤلاء الدجالين نوع من أنواع الشرك يجب ألا نقع فيه و بلاش نقول مبررات لا سند شرعي لها .
اللهم احفظنا منهم آمين

**أبومعاذ** · 18-10-2008 02:45 AM

أعتقد سبب اتجاه الناس لدجل و الشعوذة هو ضعف الايمان وقلة العلم وياريت اللي يعدي عليه حد زي كدا يبلغ عنه عشان الناس دي بتاذي نفسها و بتاذي غيرها كمان

**Kamal-1** · 18-10-2008 08:14 AM

فعلا ضعف النفوس وضعف الايمان هو سبب اتجاه الناس للخرافات دي
والبنت صاحبة الموضوع ده غاقلة جدا جدا حتى في ردودها

نسأل الله ان يبعدنا عن الامور دي ويرزقنا قوة الايمان به

**douha_wise** · 18-10-2008 08:58 AM

ما اكثر وسائل الشعوذة و الدجل و السحر الآن و ما اخصب الارض التى يتعامل معها هولاء السحرة و الدجالين
و لما لا و الان بعدنا عن دين الله الحق و تفرقنا الى فرق منهم الصوفية البهائية و الشيعية و غيرهم و ما اكثر تلك الفرق و اصبح كل منا يتمسك بفرقتة و يدافع عنها اكثر من دفاعة عن الله و رسولة و بهذا ضعفنا و قل الايمان
ان الدين عند الله الاسلام اى ديننا الاسلام و كتابنا القران و سنتنا هى سنة الرسول ص
نتبع سنة رسول الله و صحابتة و نتمسك بها تماما و صدقونى ستغرب شمس هؤلاء السحرة و المشعوذين و غيرهم من المشركين و الفاسقين و ستختلف الدنيا من حولنا
اخيرا ادعو الله بأن يحفظ تلك الفتاة التى قل ان تجد مثلها الآن و رزقها الله بأخ مسلم تقى يحفظها و يحبها و يرزقهما الذرية الصالحة التى تنفع الاسلام

**Noha.M** · 18-10-2008 09:58 AM

المشاركة الأصلية كتبت بواسطة douha_wise

ما اكثر وسائل الشعوذة و الدجل و السحر الآن و ما اخصب الارض التى يتعامل معها هولاء السحرة و الدجالين
و لما لا و الان بعدنا عن دين الله الحق و تفرقنا الى فرق منهم الصوفية البهائية و الشيعية و غيرهم و ما اكثر تلك الفرق و اصبح كل منا يتمسك بفرقتة و يدافع عنها اكثر من دفاعة عن الله و رسولة و بهذا ضعفنا و قل الايمان
ان الدين عند الله الاسلام اى ديننا الاسلام و كتابنا القران و سنتنا هى سنة الرسول ص
نتبع سنة رسول الله و صحابتة و نتمسك بها تماما و صدقونى ستغرب شمس هؤلاء السحرة و المشعوذين و غيرهم من المشركين و الفاسقين و ستختلف الدنيا من حولنا
اخيرا ادعو الله بأن يحفظ تلك الفتاة التى قل ان تجد مثلها الآن و رزقها الله بأخ مسلم تقى يحفظها و يحبها و يرزقهما الذرية الصالحة التى تنفع الاسلام

ملقتش كلام ازوده على مشاركة حضرتك

جزاااك الله كل خير

الموضوع: تعالي يا بنتي أفتح لك المصحف

LinkBack

أدوات الموضوع

عرض

-

-

-

-

-

المواضيع المتشابهه

حد ينقذني من بنتي

أفتح لي قلبك

مهر بنتي وصل !

الكلمات الدلالية لهذا الموضوع

المفضلات

المفضلات

ضوابط المشاركة