فى البداية ارجو من اى واحد مركبش العربية وجربها عدم الرد على الموضوع من الاساس
عشان فى كام عضو معروفين بالاسم لا ركبوا العربية ولا يعرفوها ومتخصصين فى انهم يردوا على اى موضوع على المنتدى بكلام مستفز وشتيمة فى العربية
فى الاول لازم نبقى فاهمين ان العربية من فئة سيارات المدينة ومن السيارات الصغيرة من نيسان يعنى لما نقارنها نقارنها بسيارة من نفس الفئة ونفس السعر
العربية بقالها اكتر من سنة مع العبد لله واى حد عايز يشترى عربية ويسألنى عليها مش بعلق غير على مشكلة تيل الفرامل لان تقريبا مفيش حاجة تانية اتكلم عليها ورغم كدا تقريبا كل اللى سألنى عليها جابها وجربها ومبسوط من اداءها وانا عن نفسى بالنسبة لتيل الفرامل غيروهولى مرتين مع الطنابير تبع الضمان يعنى مدفعتش جنيه
وللعلم رداءة خامة التيل مع التأكل مبتأثرش على كفائة الفرامل باى شكل من الاشكال
بالنسبة للصاج الحمد لله مع المحافظة عمره ما هيحصله حاجة ولاقدر الله فى حالة الحوادث الكبيرة كلنا عارفين انها مش هتفرق وربنا يحفظنا جميعا
بالنسبة للثبات دى راجعة لأسلوب القيادة فى المنحنيات اللى بيعرف يسوق اكيد مش هيبقى عنده الشكوى دى واكيد العربيات الالمانى هتبقى افضل
فياريت لو فيه شكاوى فردية من اى حاجة نعرف الناس تتصرف ازاى بدل ما نعمم المشكلة ونشتم فى العربية ونكره الناس فيها واكيد فيه شركات كبيرة منزلة عربيات بأخطاء اكبر بكتير من مشكلة تيل الفرامل وبتتحل المشكلة والعربية ببتباع وتنتشر زى ما الصنى بقت منتشرة فى كل حتة واكيد اللى بيشتروها مش سارقين الفلوس دى عشان يرموها فى عربية متستاهلش