السلام عليكم
عايز أحكيلكم موقف حصلى مع سايس و انا عملت ايه و كان نفسى اعمل ايه
كنت فى منطقة عابدين , و لقيت ركنة فاضية عمودى على الرصيف و ركنت
نزلت و سمعت صوت بيقولى "هتتأخر يا باشا"
كان نفسى أقوله "و انت مالك !!" , بس قولتله هجيب حاجة و جاى , نص ساعة او ساعة بالكتير
قالى: طب حاسب الحاجة و شاور على واحدة كبيرة (60 سنة مثلا) قاعدة على كرسى , الحاجة هى اللى مساكة المكان هنا
بصيت ناحية الحاجة , قالتلى 5 جنيه يا ابنى
بتوع ايه يا حاجة ؟
حق الركنة يا ابنى , احنا تبع الحى , هم اللى موقفينا هنا
معاكى اى وصل او تذكرة يا حاجة
الوصولات بتطبع و هنستلمها بكرة
اسف يا حاجة ده شارع مش جراج , مش هدفع حاجة
ظهر شخص كمان لما لاحظ انى برد على الحاجة و مدفعتش من سكات
بص يا كابتن , الركنة هنا ب 5 جنيه, عاجبك اتفضل ادفع , مش عاجبك , اتفضل اركن فى حتة تانية
انا بدأت اتعصب من لهجة صاحب الحق اللى بيتكلموا بيها
انت مش هتقلى أركن فين, و مش هتقلى ادفع كام , ده شارع اركن فيه براحتى و ادفع اللى انا عايز أدفعه
الحاجة: يا ابنى الناس كلها بتدفع , متخلينيش أدعى عليك !!
بعد ربع ساعة من الكلام اللى ملوش لازمة , روحت نقلت العربية للصف التانى و مشيت
كان نفسى مردش و متكلمش مع الناس دول أصلا , بس الخوف كله ليعملوا حاجة فى العربية
على فكرة الناس دول واقفين علشان احنا بندفع , بالتالى هم بيكسبوا , لو كلنا مدفعناش هيضطروا يشتغلوا بجد علشان يكسبوا , بدل ما كل واحد ساحبله كرسى و قاعد فى الشارع و بيلم عرق اللى شغالين طول النهار زى حالتنا.
انتوا بتعملوا ايه مع الناس دى ؟
المفضلات