استفسار ضروري بخصوص موتور بيجو ٥٠٨
مساء الخير
لسه جاي من توكيل بيجو عشان بفكر اجيب ٥٠٨
المهم طبعا بدون دخول في تفاصيل العربيه فعلا تحسها من احسن العربيات حاليا مقابل القيمه و خصوصا ان الفئه الاساسيه مليانه كل الكماليات المهمه في رائيي ما عدا الزينون يمكن بس معجبنيش ان المسند اللي في الكونسول ارتفاعه ثابت و واطي لتحت فمش هيبقى مريح لليد اليمين بعكس الباسات مثلا تحس انك ساند ايدك بجد
ما علينا قلت انكش في موضوع البنزين و ايه الاخبار مع بنزين ٩٢ لقيت مسئول المبيعات بياءكد ان بدايه من موديل ٢٠١٣ العربيات اللي بتنزل مصر متعدل فيها سوفت وير نظام الانجكشن مخصوص عشان تشتغل ٩٢ و بفرض لو اتحط ٩٥ مش هيفرق فرق جوهري و يعتبر دلع زياده برضه ما علينا حتى لو بيبالغ
الغريب في الموضوع انه بياءكد ان العربيه طول عمرها ١٥٦ حصان و عمرها ما نزلت مصر ١٦٣ حصان بعكس اللي انا كنت فاهمه و قريته في المواضيع بتاعتها ان اول سنه كانت ١٥٦ حصان وبعد كده ١٦٣
و لما طولت المناقشه اداني برشور مكتوب فيه ال انها ١٥٦ حصان و احتمال الخليجي هيا اللي بتنزل ١٦٣ حصان
فياريت يا جماعه حد ملاك العربيه يقولوا راءيهم في النقطه دي
وشاكر مقدما
