الموضوع: أول مشاركة: حادث مروع (نوعاً ما) ومحتاج نصيحة وتسعير بعد الحادث

السلام عليكم

من حوالي شهر عملت حادثة بعربيتي (كورولا 99). الحادثة كانت عبارة عن إن عربية دخلت في عربيتي من الناحية اليمين قدام بكل قوتها (أنا اللي كنت غلطان علشان خارج من تقاطع ومش شايف الطريق). نتيجة الحادثة إن الخبطة وصلت للكارتيرة والبوية عصرت (بتشديد الصاد) غير الرفرف اللي اتعجن والاكصدام اللي اتطحن.

المهم خليت أربعة سمكرية بصوا عليها (كلِ على حدا) ، وبعدين قررت ان أنا اوديها لواحد فيهم. خلص شغله وتمام التمام والبوية اللي كانت معصرة (بتشديد الصاد برضه) جوة رجعت تاني لمكانها وماحتاجناش نرش جوه.

وبعد كده رحت أظبط زوايا (في محطة وطنية اللي في المخيم الدائم قبل مطلع المقطم) قالولي ان الشاسيه مظبوط كله تمام التمام.

معلش ان أنا قاعد أرغي.

المهم بعد شوية كده بقيت أسمع صوت صوصوة خفيف في المطبات والشوارع الغير ممهدة ، قوم ايه ، وديتها للميكانيكي على طول. لقينا ان في قاعدة من قواعد الموتور مكسورة ، القاعدة اللي هي في النص كده وبتبقى ماسكة في الفتيس. مكدبتش خبر ورحت جبتها من الوكالة (نفس القاعدة بالظبط). أنا لسه بارغي ، ما فيش فايدة فيا.

قوم ايه ، جينا نركب القاعدة لقينها مش راكبة مستريحة وكمان ضغطت على قاعدة تانية (اليمين) وطبعاً بيبىقى في صوت غلس جداً وانا ماشي. فالميكانيكي قاللي ان فردة الشاسيه اليمين ملووحة (الخبطة كانت في الجنب اليمين لو حد لسه فاكر). وقاللي ان الفرق حوالي 1.5سم ولازم ترجع للسمكري.

خلاص قربت أخلص رغي.

فا دلوقتي أنا مش عارف يا تري ممكن يكون الشاسيه معووج فعلاً ولو كان كده يا ترى ممكن يتعدل؟ وكمان لو ممكن يحد يقوللي الحكاية دي تقلل من تمن العربية قد إيه؟

شكراً جزيلاً لأنكو استحملتو تقروا كل الكلام ده. وشكراً مقدماً على النصيحة.

الله يبارك فيكو يا شباب