الموضوع: سوء خدمة فى مركز الأقصى

أنا حبيت أحكى الموقف اللى حصل معايا فى مركز الأقصى لهدفين
الأول: انى أتأكد من خبراء المنتدى هل اللى أنا شوفته صح ولا غلط
و التانى: الاستفادة و تحذير باقى الأعضاء

الموقف كالآتى:
من شهر كان عندى صيانة عندهم و سبت العربية نتيجة لظروف شغلى, المهم رجعت بعد شهر و استلمت العربية بس نتيجة انها اتركنت بدون استخدام فترة طويلة البطارية نامت, و كشفت عليها فى كذا مكان و أجمعوا ان البطارية كده ماتت ولازم تتغير
رحت أغير البطارية, وللأسف الراجل اللى بيغير البطارية كان واضح انه جديد فى الشغلانة دى و هوه بيركب عكس الأقطاب, العربية بعدها اتبرجلت فى كل حاجة, ما بقاش فى باور ستيرينج و لمبة الباور منورة أحمر, و لمبة البكارية منورة و هيه دايرة, و التكييف ما بقاش شغال
المهم, الحمد لله المكان اللى كنت بغير البطارية فيه كان جنب مركز الأقصى, رحت طالع عليهم (طبعا سواقة الفانتازيا من غير باور ستيرنج كانت عذااااب بمعنى الكلمة) و أخيراا و صلت المركز
شرحتلهم اللى حصل, المهندس قالى هانحطها على كومبيوتر الأعطال و نشوف, بعد ما حطها نده الكهربائى اللى عندهم, قعد يكشف و جاب لمبة صغيرة بمسمار و شيك على صندوق الفيوزات, و اذا بالخبر الصادم
الكهربائى: يا باشمهندس مشط الفيوزات اتحرق
أنا: طب تمام هايتغير بكام ده
الكهربائى: 1600 جنيه و مش موجود حاليا
أنا: نععععععم!!!!!, ازاى يعنى؟, غلطة بسيطة زى عكس الأقطاب تعمل أضرار بالتكلفة دى, ازاى مافيش Safety system

الكهربائى: ده اللى حصل

و بعد مشاورات و مكالمات مع مدير المركز, قاله يا فلان العربية دى عايزينها تخلص النهارده
لقيت لهجة الكهربائى اتبدلت و قاله ادينى ساعة

و استلمت العربية زى الفل, و دفعونى 150 جنيه, المدير بيحاول يقنعنى انه عمل حاجة بلدى كده مؤقتة
بس اللى أنا واثق منه ان دى كانت اشتغالة و نصب و ان الموضوع خلص بكارت فيوزات ما يكلفش 20 جنيه
و عملوا بس الفيلم ده كله عشان أدفع ال 150 جنيه من غير ماتكلم
حقيقى الخدمة هناك زى الزفت, و بحس لما بدخل عندهم انهم نصابين و بيأفلموا كتير أوى