اقتباس المشاركة الأصلية كتبت بواسطة eslamhamdy مشاهدة المشاركة
الحمد الله هى صحيح فيها كام خربوش من بره بس الحمد الله لسه هاكشف عليها فالتوكيل احسن و اضمن
بس لو ممكن تحكيلنا عن موضوع النزو ل بالعربية لاني ناوي ان شاء الله
لازم تعمل التربتك قبل ما تسافر بشهر لانه بيغيب حبتين واجراءاته رخمه و عشان تعمل التربتك بيطلبو ضمانه بنكيه ودي يجي 9 الاف جنيه ولما ترجع من السفر تاخدهم تاني
اما حكايه الطريق بص انا طبعا عشان جاي من سلطنه عمان فطريقي مختلف بسيط جدا
1- بص لو فيه طريق من المدينه يوديك لحائل يبقي حلو
2- من حائل اطلع لحد تبوك
3- تبوك لحقل
4- ومن حقل لحد الدره وهناك الحدود السعوديه الاردنيه
5- هيختمولك انك خرجت من السعوديه
6- هتدخل الاردن وهيختمولك جواز السفر
7- هياخده منك 25 دولار في الاردن لجمارك ( بلطجه)
8- هتعمل تأمين لعربيتك و هتعمل تأمين لافراد اللي معاك( علي فكره كل الاماكن دي قدام الحدود الاردنيه بالظبط وهي عباره كذا كشك جمب بعض) واسم الشركه اللي بتعمل التأمين لافراد اسمها الاردنيه الفرنسيه لتأمين
9- جمب كشك التأمين بالظبط هتلاقي كشك حجز تذاكر العباره
10- هتطلع من كشك حجز التذاكر وهتروح لميناء العقبه وانت طالع من الحدود الاردنيه ميه ميه هتوه ومش هتعرف الطريق زيي والحل انك تشوف حد مصري يكون مسافر مصر زيك ويكون عارف الطريق لحد الميناء هناك
11- لما توصل هناك هتلاقي طابور عربيات وحاول تجري بسرعه عشان تبقي عربيتك في الاول
12- بعد لما تنزل من العباره و تركب عربيتك وهنا الدوخه بقي في مصر هتقف في طابور عريض فيه عربيات والظابط بينظمهم و هيجي الف واحد من الفنين يكشفو علي العربيه واسماء الكشف( بصمه - كشف موتور- ومفرقعات- طفايه- شنطه اسعافات) نسيت اقولك حاجه ابقي غير دولارات قبل ما تسافر واعمل حسابك انك تغير 400 دولار لجنيه مصري
13- بدل ما تبهدل نفسك في التأمين و الاجراءات هتلاقي الف مستخلص هناك وهيقولك جيب ورقك كله بتاع كشف الموتور والبصمه و وصل الطفايه ..... بعد تلت ساعات المستخلص هيجبلك ورقك كله بالنمر نويبع
14- تتكل علي الله وهتشوف انت رايح اي حته في مصر

ملحوظه: اشتري gps ضروري بالاخص في السعوديه واوعي تروح ميناء ضبا لانها زفت ونيله وممكن تقعد بالكذا يوم ومفيش عباره تيجي
ربنا معاك