حبيت افيدكم بخصوص الليبرتي 2003

**fouadamrp800** · 29-07-2014 12:43 PM

بسم الله الرحمن الرحيم

انا معايا عربيه ليبرتي موديل 2003 ليميتيد مكينه 3.7 سته سلندر وحبيت اوضحلكم تجربتي مع العربيه
العربيه بجد قويه وعفشتها بتستحمل و مشاكلها قليله اوي مع ان العربيه معايا في الكويت وانتوا عارفين ان احوال الطقس الحار هنا بيبهدل العربيات بسبب الحراره الشديده يعني لو العربيه في مصر هتعيش اكتر مع العلم ان عربيتي ماشيه كتيييييييييييييير 245 الف ميل يعني تقريبا 390 الف كيلو متر لان العربيه وارد امريكا ف العداد بيتحسب بالميل على العموم دلوقتي هوضحلكم بالظبط المزايا والعيوب

نبدا بالمزايا

1- شكلها حلو من جوا ومن بره

2- العزم حلو ولو عايز العربيه عزمها يكون احسن ركب مبرد فتيس اضافي هتقلي ليه هقولك لان مع المشاوير الطويله حراره زيت الفتيس بيسخن خصوصا في الفتيس الاوتوماتيك, ولما الحراره تسخن العزم بيقل شويه (دا طبعا عندنا هنا) وكمان بيحافظ على عمر الفتيس.

3- قله الاعطال والمشاكل (يعني نادرا ميحصل خلل او حاجا والقطعه الي تغيرها تركبها وتنساها سنين)

4- المكيف حلو اوي سواء وهيا واقفه او وهيا ماشيه.

5- القطع الاستهلاكية هنا رخيصه في مصر مش عارف بصراحه لكن اتوقع انها ارخص لانها منتشره في مصر اكتر من هنا

عيوبها

1- مش مريحه في المطبات والطرق المكسره

2- مش ثابته في السرعات العاليه يعني اقصى حاجا تمشي بيها على 150

3- عازل الهوا مش حلو يعني لو ماشي بسرعه تسمع صوت الهوا الي برا

4- اربه الميه بتنقص لتر في الشهر بس دا لان الاربه فيها بلف بينسم شويه لما الميه تسخن اوي وممكن تسدها لو عايز بس انا بعتبرها ميزه عشان الاربه متنفجرش

اما با بخصوص البنزين فانا مقدرش افيدكم لان البنزين هنا رخيص وكمان بخصوص الصيانه ومين يفهملها برضو مقدرش افيدكم لان في مصر اكيد فيه فنيين لكل حاجا وبيفهمو في العربيه دي كويس

ملاحظات مهمه

فيه ناس بتقول بتقلب وفيه ناس بتقول مش حلوه مع الفرامل خصوصا في الميه والطينه عايز افهمكم حاجا مهمه

فيه عربيات ليبرتي بتكون ب abs وفيه منغير , انا عربيتي فيها الخاصيه دي وبصراحه مبتزحلقش ابدا لكن الي من غير اي بي اس اكيد بتزحلق مع الطينه والمطر فلازم تاخدو بالكم كويس خصوصا في طرق مصر وبخصوص انها بتقلب فحبيت اقول ان اي جيب بيقلب مع السرعه في الملفات وفيه تحذير كاتبينه في الكتالوج كل العربيات الجيب .

يارب تكونوا استفادتم

**pioneerahmed** · 29-07-2014 02:27 PM

تقرير حلو بس غالبا العربية الى معاك دي غير الى بتنزل مصر

الى بتنزل هنا اعطالها كتير

**megodahab** · 29-07-2014 02:46 PM

تقرير ممتاز والله وشكرا كتير ليك انا كنت ناوي اشتريها هنا في ابوظبي بس الكل حذرني منها لسبب واحد وهو قطع الغيار نادره في السكراب اللي هو المستعمل وغاليه جدا في الجديد دا اللي خلاني احتفظ باللي معايه شيروكي ٩٨ والغي فكرت شرائها لكن هيه عربيه جميله من بره وجوه ومفهاش عيوب وسعر قطع الغيار عندك افضل من مصر لكن عندي سؤال لو هتركب مبرد الجير هتركبه فين انا عندي بعربيتي واحد راكب ما بين الشبك الامامي والرديتر فهل هتركبه بنفس المكان وشكرا لتفريرك عن العربيه

**fouadamrp800** · 30-07-2014 02:43 PM

شكرا للمرور اخي بيوتير ومش عارف بصراحه الي بتنزل مصر عامله ازاي بس هنا في الكويت فيه نوعين

نوع خليجي ونوع وارد امريكا عربيتي وارد امريكا والفرق بينهم بسيط لكن القطع واحده بس يمكن في مصر اعطالها كتير لان عفشة العربيه ناشفه ومع طرق مصر بتخرب العفشه بسرعه والله اعلم

وشكرا اخي مجود على المرور وهيا فعلا في السكراب مش كتير حتى هنا مفيش غير اربع محلات بس في السكراب وبخصوص مبرد الجير الاضافي دا بيتركب قدام ورا الشبك مع المبردات التانيا المكينه والجير . وهوا بدون مروحه يعني هات المبرد بس بدون مروحه وبيكون حجمه صغير ولما تركبه تروح لواحد كويس يركبهوله وانتبه كويس قوله عايز اركب المبرد مع الاصلي يعني متخليهوش يلغي المبرد الاصلي الموجود. وتقوله برضو عايز الزيت يروح للمبرد للاصلي الاول وبعدين يروح للاضافي مش العكس.

توضيح اكتر

الزيت بيروح للجير (الفتيس) وبعدين يرجع يروح للمبرد الاصلي وبعدين يلف ويروح للمبرد الاضافي (الي انت ركبته) وبعدين يروح للقير

وعلى فكره في الاجواء الخليجيه الجير بيخرب بسرعه والسبب في كده هوا الحراره زيت الجير لانها بتسيح السلوك والحساسات فعشان كدا بيعانوا من كثر اعطال الجير, لكن لو ركبت مبرد اضافي هيحافظ على عمر الجير . وكمان كل ستين الف كيلو غير زيت الجير مع الفلتر وتخليه يغسلك الكرتير عشان لزوجه الزيت بتروح مع الوقت وبتزيد براده الحديد وللاسف ناس كتير شايلين الموضوع ده من دماغهم ,

ويارب اكون افادتكم

**fouadamrp800** · 30-07-2014 03:00 PM

حبيت اضيف حاجا بخصوص المبرد

المبرد تقدر تشتريه من اي محل اكسسوارات وهوا رخيص مش غالي بس فيه نوعين نوع المونيوم ونوع نحاس اختار الالمونيوم احسن

وبعد ما يركبهولك خليه يزود الزيت نص لتر

هتحس فعلا بالتغير في عزم العربيه

**megodahab** · 30-07-2014 03:17 PM

ما شاء الله خبره في الشيروكي وفعلا الجير عندي شكله بيودع وعزم العربيه رايح خالص ولما ادوس بنزين من الثبات العربيه بيتفضل واقفه في مكانها تقريبا ثانيتين لما تمشي واسمع صوت طاخ تحت شكلي بغير الجير وعوضي علي الله او ببيعها واجبلي ليبرتي وسعرها رخيص هنا بتبدأ من ١٤٠٠٠ درهم اماراتي تقبل تحياتي

**fouadamrp800** · 30-07-2014 04:53 PM

شوف قبل ما تغير عربيتك او تبدل الجير , ركب مبرد الجير ,

عندي سؤال بخصوص المشكلتين الي عندك

تاخير التعشيق بيكون بعد ما تروح مشوار طويل بس ولا حتى والعربيه بارده ؟

يعني انت اول متقوم الصبح وتركب عربيتك وتعمل على d هتطلع على طول ولا بتاخد ثانيتين ؟

دا اول سؤال

السؤال الثاني

اما صوت الطاخ الي بيجيلك دا برضه لما تركب عربيتك الصبح بتعمل كده ولا بعد ما تروح مشوار ؟

وهل بتجيلك اقوى مع الفرملة القويه ولا بتيجي بدون فرمله او بدون حاجا ؟

وهل بتيجي مع كل الغيارات ولا بس لما تنزل من الغيار الثاني للاول ؟

شوف لو العربيه طبيعيه خالص الصبح ومبتحصلش فيها المشاكل دي غير بعد ما تسوق شويه اعرف انه بسبب حراره القير يعني لو ركبت المبرد هتروح كل الحجات دي لوحدها

تاخير التلقيم بيكون بسبب من الثلاثه دول

1- حراره زيت القير
2- الزيت ناقص
3-مشكله في طرمبه الزيت الجير او بلف الجير (احتمال مستبعد)

**megodahab** · 31-07-2014 05:24 AM

بص ياباشا العربيه دلوقتي سواء صبح او بعد كده مجرد ما ادوس بنزين جامد تبقي عايزه تنطلق بقوه ويروح عداد الار بي ام مرتفع واتحس العربيه صوتها علي جامد ومتمشيش الا بعد ثانيتين لما الجير يشبك واخر مره دست بنزين جامد الار بي ام وصل فوق الاحمر بالضبط والعربيه كانها مموره علي الفاضي وبعد كده طاخ شبكت ومشيت

**fouadamrp800** · 31-07-2014 02:16 PM

لا مشكلتك دي ملهاش علاقه بالسخونه دي ممكن من ضعف ضخ الطرمبة الزيت او بلف الجير مسدود او حساسات الجير على العموم انت قبل ما تبدل الجير او تجفته او تكلف نفسك فلوس ابدأ بتغير الزيت بالفلتر وخلي الميكانيكي يغسلك الكرتير كويس و يشيل البراده الحديد من المغناطيسة ولو الجير ظبط معاك وبقا تمام ركب المبرد .

ولو انت حاسس انك هتتعب في التصليحات وكده هاتلك ليبرتي واشتري دماغك هتستريح اوي خصوصا ان جميع مشاكل الحراره الي كانت في الشيروكي القديم اتعالجت في الليبرتي والحرارة ثابته في عز الحر ولو تلاحظ هتلاقي الليبرتي الرديتر فيه كبير والمكينه المونيوم لكن الشيروكي القديم المكينه حديد والرديتر صغير والحديد معرض للسخونه اكتر من الالمونيوم

**eng محمد** · 31-07-2014 07:01 PM

موضوعك جميل وكويس وانا بفكر فيها بقالى اسبوع عاوز اجيب جيب ليبرتى موديل 2003 فيما فوق ولكن مفيش اى حد قالى فى حقها كلمة كويسة ابدا مع انى مقتنع بيها جدا بس كله قالى منصحكش .. بس انا عاوز حد مجربها فى مصر يقولنا خبرته فى اسعار قطع الغيار وتكلفة الترخيص والضريبة

الموضوع: حبيت افيدكم بخصوص الليبرتي 2003

LinkBack

أدوات الموضوع

عرض

-

-

-

-

-

المواضيع المتشابهه

لملاك الليبرتي اتحدث

أسعار الجيب الليبرتي

شاري كاوتش للبومة وقلت افيدكم بالاسعار

تجربه مع فلتر 7 مراحل وحبيت افيدكم بيها

مساعدة مهمة جدا من خبراء الليبرتي

الكلمات الدلالية لهذا الموضوع

المفضلات

المفضلات

ضوابط المشاركة