السلام عليكم ورحمة الله وبركاته




اولاًُ انا بفضل الله وصلت لـ 1000 كيلو من يوم 21/6/2014

وده ملخص عن مميزات وعيوب اللوجان اللي شاهدتها خلال الفترة دي

هنبتدي الاول بالعيوب كعادتي

1- صعوبة تحديد ابعاد السيارة

2- رعشه خفيفة بعصاية الفتيس وده لان الدبرياج علي وير وليس زيت فبالتالي الرعشه هنا ليست عيب بل هو أمر طبيعي في جميع سيارات رينو

3- استهلاك البنزين نوعا ما عالي نسبيا وده بسبب ان اغلب مشاويري في الزحمه والحر مع التكييف وان شاء الله الاستهلاك يقل بعد صيانة الـ 1000 كيلو

4- نوع الكاوتش ردئ واسمه باروم ومش بينزل في كل اصدارات اللوجان في عربيات كتير نازلة بكاوتش GT وعيبه معايا انه دايما بيريح وبقيت متعود يوميا اني اظبط هواء

5- بعض الناس اشتكت من تأخر في عملية الدوارة للسيارة والحمد لله مقبلنيش الموضوع ده لحد دلوقتي لاني بفتح الكونتكت وبنتظر حتي اتمام غلق جميع انوار التابلوه ويتم تدوير السيارة بصورة سلسه جدا

6- باور الدركسيون تقيل نسبيا

7- انذار مزعج لعدم ارتداء الحزام انا مش شايفه عيب بصراحه ان السيارة بتجبرك علي ارتداء حزام الامان والانذار مدته بتكون حوالي 3 دقائق متواصلين وبعدها يتم فصله اوتوماتيكي

8- سحب السيارة ضعيف في المطالع والكباري ولكن ممتاز في الطرق المستوية

9- وجود الكلاكس في زراع الاشارة بس انا عن نفسي اتعودت عليه

وأخيراً عيون الناس مش سايبه العربية طول مانتا سايقها وبتقلب مع الواحد بغم في الاخر.


اما بالنسبة للميزات فخد عندك :-

1- السيارة ناعمة بطريقة جميلة في القيادة وممتعة

2- العفشة بالنسبالي مرضية جدا ومش ناشفه ولا طرية وسط

3- السيارة مزودة بنظام ABS و2 ايرباج .

4- نظام مثبت السرعة وهو نظام روعه بمعني الكلمة وبيريح الواحد في السفر يتم ظبطه والسيارة تقود نفسها بنفسها ما عليك سوا التحكم بالدركسيون فقط

5- نظام محدد السرعه وهو نظام ايضا ممتاز ويتم تحديد سرعة معينة للسيارة لا تتخطاها ابدا مهما ضغط علي دواسة البنزين وطبعا ده نافع الواحد في الطرق اللي مليانه ردارات

6- التكييف اوتوماتيك تاتش ممتاز وفي عز الحر يدوبك دقيقتين وتكون السيارة ثلاجة ونظام التوزيع الالكتروني للهواء ممتاز

7- السيارة واسعه جدا من الداخل ومريحة جدا للعائلة كبيرة الحجم والوزن امثالي ههههه

8- الشنطه ممتازة وتسع لجميع الامتعه في السفر والاضائة ممتازة بداخلها.

9- فراملها ما شاء الله جميلة وبتفرمل باللمس

10- عالية علي الارض ومريحة في المطبات اللي عقدتني في حياتي

11- الاضاء ممتازة وكاشفه مساحة ممتازة امام السيارة

12- السيارة تتمتع بساوند سيستم جميل جدا ونقي ولا يحتاج لتركيب سماعات او جي ام وما شابه ذلك

13- نظام الداي لايت بيخليك مميز جدا وكل اللي ماشي حواليك يقولولك اطفي النور يا كابتن

14- اهم شئ كمبيوتر الرحلات الممتاز وده بيبين الاتي

- عدد كيلوات السيارة بالكسور وبدون كسور

- مستوي استهلاك البنزين للسيارة لكل 100 كيلو

- مبين مستوي البنزين المتبقي لمعرفة كام كيلو تستطيع السيارة المشي به حتي اخر نقطة بنزين بالسيارة

- مبين حرارة الجو الخارجية

- الساعة

- مستوي البنزين بالسيارة

- متوسط سرعة السيارة

- كشف بعدد الكيلوات المقطوعه منذ اخر تفويله للسيارة

15 - نظام البلوتوث والربط بين الموبيل الخاص بك والسيارة ويتم التحدث الي المتصلين عن طريق السيارة بدون استخدام الموبيل والانشغال عن القيادة

16- الكاسيت مزود بـ USB & AUX & CD

17- مسند للذراع مريح للسائق اثناء القيادة.

18- نظام أمان بزجاج الكهرباء الخلفي حيث لا يتم غلقه وهناك عائق وهذا ممتاز للاطفال بالخلف حيث لا يتم غلق الزجاج علي ايدي الاطفال .

19- نظام الاوتو لوك وده بيغلق جميع الابواب بعد سرعه 10 كيلو

20- وجود اماكن للتخزين ممتازة وكبيرة

21- امكانية طي الكنبة الخلفية لتوسيع حجم الشنطه


الشكل الجديد لا يفرق كثيرة عن الشكل القديم في قطع الغيار

والفرق فقط في البودي الخارجي والكشافات و البوابه و حساس شكمان و مانيفولد و قرب المياه و قربة زيت الباور.


انا معايا الفئة التالته كمفورت بأوفر برايس 3500 جنيه بأجمالي 95500 جنيه

ودي شوية صور للعربية هيه مش عربيتي طبعا لاني لسه مصورتهاش انا معايا اللون النبيتي






















وده بورشور السيارة للتحميل

http://www.renault.com.eg/CountriesData/Egypt/images/Brochures/Logan-2014.pdf


وخير الختام السلام

السلام عليكم ورحمة الله وبركاته




مع تحيات أخوكم ( أحمد ممدوح ) أبو محمد