بصراحة يا جماعه أنا عاوز أشارككم معايا تجربتي مع العربية الصيني "شيري QQ" وهنا في الموضوع ده هانتناقش عن كل ما يخص التجربه دي بكل ما فيها سواء جيد أو سيئ

أولا أنا أخدت قرار شراء سياره صغيره فئة الـ1000cc أو 1100cc لأني محتاج عربيه صغيره للمدام والأولاد عشان زهقوني في عشتي وأحتلو العربيه الماتركس بتاعتي أحتلال أمريكاني وبصراحه زهقت خصوصا أن الأولاد مشاورهم كِترت
المهم
قرار شراء عربيه صغيره ماكنش مرتبط بماركة معينه يعني ما كنتش منحاز لماركة معينه وإن كنت افضل العربيه الـ"كيا بيكانتو" أو الـ"الدايهاتسو شاريد" لأنهم من وجهة نظري أحسن عربيتين في الفئة دي وبعدهم تيجي الـ"شيفورليه سبارك" وفي زيل القائمه تيجي العربيه الـ"شيري كيو كيو"

طيب أيه يا "بايوو" إللي خلاك تروح لديل القائمة؟
هاقول لكم
أولا البيكانتو عليها مشاكل كتيره جدا بين الوكيل القديم والوكيل الجديد لدرجة أن العربيات الكيا عموما موقوف إستيرادها لأي شركه لحين البت في القضيه وأنا سالت أكتر من حد معاه العربيه البيكانتو لقيته بيأكد أنه بيلاقي مشاكل لما بيواجه عطل معين محتاج لقطعة غيار خاصة شويه
أو بمعنى آخر طول ما العربيه محتاجه زيت وفلتر وبوجيهات وسيور مش هاتواجه مشكله لكن لو احتجت حاجه في الموتور وللا الفتيس أو أي حاجه تانيه ممكن يركنوك جنبهم شهور على مايبعتو يجبهوالك ده غير أن العربيه سعرها بقى 59500 جنيه تكييف وباور فقط ولو حبيت يكون فيها زجاج كهرباء وسنتر وأكصدامات بلون العربيه يبقى هاتدفع 62500 جنيه وبكده يبقى العربيه دخلت في فئة أعلى منها بكتير يعني الفيرنا أحسن منها في الحالة دي

العربيه الـ"الشاريد" عربيه زي الفل صناعه وتقفيل وخامات وكل حاجه ماحدش يقدر يقول عليها نص كلمه لكن شكلها مش حلو خالص (ودي مسألة أزواق) أنا شايف شكلها مش حلو وكمان سعرها زي الـ"بيكانتو" وإن كانت الـ"شاريد" كصناعه أفضل من الـ"بيكانتو"
وكمان الشاريد هاينزل منها شكل جديد على السنة الجديده وده إللي خلاني مافكرش أني أشتريها حاليا وبعد كام شهر ألاقي شكل جديد ودي تبقى قديمه

نيجي بقى للعربيه إللي كماليتها حلوه وشكلها كمان كويس وأسم وماركه وكل حاجه وسعر معقول مع كماليات كويسه
الـ"شيفورليه شبارك"
ودي بقى رحت حجزتها يوم الخميس إللي فات من فرع منصور شيفورليه سور نادي الزمالك
ولكن مالقيتش عنده ولا عربيه واحده حتى للعرض عشان أتفرج عليه على الطبيعه ولكن لثقتي في أسم شيفورليه أكتفيت بالصور الموجوده على الموقع الخاص بمنصور شيفورليه والكماليات المذكوره وثمنها 55000جنيه
وأدي الوصل طبعا كتبته باسم المدام مش خوف والله ولا حاجه يا جماعه

المهم بعد ما حجزت سألت مسئول المبيعات إللي أتعاقدت معاه وسألته على مكان او موزع أو أي حد يكون عنده ولو عربيه واحد عشان أتفرج عليها وأخد فكره برضه وبصراحه الراجل ماتأخرش دلني على موزع أسمه "الغلبان" ومكانه في عمارات أغا خان على الكورنيش
روحت للغلبان وأتفرجت على العربيه وأتصدمت
والصدمة سدت نفسي عن العربيه
بأختصار وعشان ماطولش عليكم العربيه لا تمت إلى أسم شيفورليه بصلة ولا حتى اسم دايوو إللي كانت صاحبته قبل ما شيفورليه تشتري مصانع دايوو يعني بصراحة الـ"ماتيز" القديمه برقبتها
المهم قررت أني أشتري الأرخص طالما أن الأغلى مافيهوش إللي أنا عاوزه والمدام شجعتني على كده خصوصا أنها كانت متضايقه من موضوع إننا هانستلم العربيه الشيفورليه سبارك بعد شهر

وروحت لشركة شيري إللي في طريق مصر الأسماعيليه الصحراوي وأشتريت العربيه الـQQ إللي تقفيلها وكماليتها محترمين جدا وبلذات موضوع الكماليات ده حاجه كده ماتتحطش في عربيه صغيره أبدا
يعني فيها
تكييف
باور
سنتر
راديو كاسيت
نظام امني يمنع إدارة السياره إلا بمفتحها الأصلي
4 زجاج كهرباء
مرايات كهرباء
ماكينات لرفع الزجاج عند أغلاق السياره بالريموت
مساحة خلفيه
فوانيس شبوره اماميه
فوانيس شبوره خلفيه
فتح الشنطه من الداخل
فتح التنك من الداخل
جنوط أسبور
زجاج حراري بالخلف
زجاج ملون أمامي
أمكانية طي الكنبه الخلفيه إلى جزئين كل جزء على حدا60/40
الأستبن جنط أسبور
مثلث تنبيه مع شنطة عده متكامله
ساعة رقميه بالتابلوه
عداد كيلو متر و عداد رحلات ديجيتال

العربيه مرفق معها جنش قلاووظ يتم تركيبه في الامام او الخلف لشد العربيه (تقريبا كده عاملين حسابهم أنها هاتعطل كتير وتحتاج تتشد كل شويه)




وإن شاء الله هاقول لكم أول بأول على تجربتي معاها
إللي أظاهر كده والله أعلم أنها هاتبقى تجربه مش ولا بد